KENDEU 18

Abraham dage Pe na Lungh lu kera Sam kaikebeu

1 Rampaube Abraham ze peu Mamre ga tsingbang kenci dung tai gade pecu ngau gai. Abraham tingnai ge tinglum peri dau pe paiki kimui ga ntum bam ge, 2#Ibr. 13:2.pa ngangcuh ge mi hang cum cika kesap ngau lu. Pa penui ze ngau kerikezi, pa penui ze redau kera pak pet. Keumie pe zu hangdeu tung lü, 3pa rang, “Kedihme dung, keherei de mtak mene a ki tet kah di helo; I nnui ze hegia kera aika bam lie. 4Acu peu nnui pi hui kera dui pwa gwang; nnui aika rebang kang ga mtak lubui. 5I taktyei kesa teugwang beuzie; cide nnui mbeuh silu kera nnui ze tei nkieng beuzie. Nnui a ki kegwangne acu herüt peu da, cine acu peu nnui ze hegia lo.”

Penui keli eh, “Ncu tei herei, anui sui da” dedi.

6Abraham paiki ga nlüt lü Sarah dage rang eh, “Kelwa lu, n tokkui yitube roso keu lu, delü nku ru lu” debeu. 7Ciciu eh pa ketum hau da pak gwang eh ketumna kemdui nah pelui keyina ge teugwang kilabe de peu, ge pa cide lang kera telei kelwa lu. 8Pa macaa, tungdui, nah heteih be keu lü mina dung dwa ga kai beu. Tsingbang siu gade pa penui ze hegia beu, ge penui tyeilu.

9Pecai penui pecu keteu eh, “N nau Sarah daiga bam no?” dedi. Pa cu, “Pa au paiki lung ga bam lie,” debeu.

10 # Rom. 9:9. Penui hang ge cu, “Cu gade kei hekui dau#18:10 Cu gade kei hekui dau; mede nkikum aipau tingdau. I gwang dai zie, nah n nau Sarah mipeina ge mna luzie,” debeu. Sarah pecai ga paiki kimuiki gade kingnei bam. 11Abraham penai Sarah cing süt ti, nah Sarah hena lungh lu kebui ting bede kah di. 12#1 Pe. 3:6.Cine Sarah pekatei pecu nuih eh cu, “I cu cing nah ta dida, nah a naapei de cing dida, I cude kehega lubui reuni?” de di.

13Ciciu ge Rampaube Abraham ze keteu eh, “Daitei Sarah nuih eh cu, ‘I cing süt kedi caine hena lungh kesang lubui ni?’ de eh rang lano. 14#Luk. 1:37.Keheibe de Rampaube tei paah ham zie ni? I rang kebeu nzwa, cu gade kei hekui cai I caili gwang zie, nah Sarah mipeina ge nna luzie” debeu.

15Sarah ngngi kedine, pa cide mlai di. “I nuih ma” de eh pa rang di. Ge pa keli eh, “Yeo, nang nuih da” de dai di.

Abraham Sodom ziemne Kekie

16Pecai mina dung tetti delü Sodom pie nkei ngau lu kebui heni gega miedi, nah Abraham penui ze nzang miedi, penui ze penui lampui gage lang gaidi kerane. 17Ge Rampaube pekatei pecu resiu eh, “I tei lai eh kebam de Abraham dade kebai dilak. 18Pe leuhme heleuh kedi ge nah kenkieng ge tei zie, nah peda de I heleuh pelane de samlam beuzie.#18:18. nah... heleuh dung; mede I pecu samlam kebeu nzwa samlam beu lo heleuh leune ada kie zie. 19I pecu peu pe name nah pe leuhme ze kejeupwa a sam mzai nah petaube nah kemjeube tei lu kerane kedet lu. Penui mzai lu cai, I a sam kaikebeu pe ziemne keheibe de tei beuzie,” dedi.

20Pecai Rampaube Abraham dage, “Sodom penai Gomorrah ha rang mmau süt bam dida, nah penai mau dihzu dida. 21I hungh delü penai ze rang kemmau I kesiu dung de kesang mi mebi kecu pie maisia da,” dedi.

22Ciciu eh mina cipau kena de tetpwa Sodom lam miedi, dede Rampaube Abraham ze ngngwa bam di. 23Abraham Rampaube lam nreu gwang peda de, “Nang makesangme ze de kemaume ze si eh nkap dizie deni? 24Magade namdibe ga mina makesang 50 bam de nang renam pelane de nkap dizie deni? 25Nang makesangme ze kemaume ze si eh nkap dilak cika. Cii au teidau laklu! Nang cide tei gailak. Nang ciciu cai, makesangme ze kemaume ze si eh saja peu zie delu. Cide ciciu gailak. Kideu pelane tu ketiakbe bata kemjeube tei zielu,” dedi.

26 Rampaube keli eh, “I Sodom ga mina makesangme 50 ngau lu cai, I penui ziemne namdi pelane de mbai beuzie,” dedi.

27Abraham rang dai eh cu, “Keherei de I nda ge kuu eh rang si kecune a mau gi beu lo, Rampaubo. I mina ge so sima nah magede rang lu kera a keyi gah. 28Dede 45 rünne bam de ci lak 50 mene. Nang mina hang mengei cam kedine namdi pelane de nkap dizie deni?” Rampaube keli eh, “I namdi bede nkap dilak I mina makesang 45 ngau lu cai” dedi.

29Abraham rang dai eh, “40 rünne bam de ci lak,” de dai lu. Pa keli eh, “40 bam cai I cide nkap dilak” dedi.

30Abraham rang, “Keherei de n rata diso, Rampaubo, dede I rang si maisia. Camrei rünne bam cai dainzwa?”

Pa rang eh, “I 30 ngau lu cai cide tei lak” dedi.

31Abraham rang eh, “Keherei de I nda ge kuu eh rang si kecune a mau gi beu lo, Rampaubo. Magade nkai rünne ngau lu cai.”

Pa rang eh “I 20 bam eh ngau lu cai namdibe nkap dilak” dedi.

32Abraham rang eh, “Keherei de n rata diso, Rampaubo, I piage rünne rang dai zie. Hang kerei rünne ngau lu cai dainzwa?” Pa cu, “Hang kerei bam cai I cide nkap dilak” dedi. 33Pa Abraham ze ngngwa mpau cang dige, Rampaube tetti, nah Abraham ze kilung caili gwang di.

Currently Selected:

KENDEU 18: ZemeNB

Highlight

Copy