JOHN 4
4
Jisu Ngãle Samaritan Dihiak nyũ
1Jisu ma John nôma dijûnte ajah choh lahma baptijem koh ekah ngãma Pharisee hehma tatwah. 2(Lĩnlin ko Jisu ate dedema wãtheh nângjô baptijem kohhõ, ate dijûnte hehma lôlôbã kohwah.) 3Chenthû are ngĩn pa Jisu ma chohtat phûmma, ate Judea wah loatchhõan lahma Galilee nâng katwah: 4Tema Samaria pa dãnkhoam lahma Galilee nâng katwah.
5Te a Samaria wah Sychar hahko hokwah, epa Jacob ma ate chha Joseph nâng kohtah pit tâko dâng wah. 6Jacob ma thũtah joken pa ere theko dâng wah, ngãle Jisu bõankhoam lahma ere joken tâko bôantông wah. Epa rangngih mong dâng wah.
7Samaritan dihiak nyũ wãtheh jo khhoat rãng katwah, phûmma Jisu ma tenâng ngatwah, “Ngãnâng jowah jokthuk hang.” 8(Ate dijûnte heh bôjat nâng phhekchhah riakchôan wah.)
9Dihiak nyũ pumma dânthâng wah, “Nanga Jews, phûmma ngã Samaritan, nangma ngãwah chenroh jîen thajok ehanga?” (Jews hehma Samaritan hehma kep ekah tit alek, le jojok bâti heh arôam ma kepmah.)#4.9 Jews hehma Samaritan heh tit alek, le jojok bâti heh larôam kepwah; bã Jews heh Samaritan heh demnâng chenmĩn larôam kepwah
10Jisu ma dânthâng wah, “Nangma Joban ma chenni koh ekah a epa jet lohma ko, ngãle nang wah jo thâjokte pa hẽn a epa jet lohma ko, nangma ate wah chen tha joktoh, ngãle tema nangnâng rôandông kohthĩn jo chenjok thuk thoh.”
11Dihiak nyũ pumma dânthâng wah, “Hêthôte, nangnâng jo khhoat thĩn mĩn ahõ, ngãle joken pamĩn kenlũ. Nangma chenwah-rôandông chohthĩn jo jokthuk min a? 12Are joken pa ninâng nite niwa Jacob ma kohwah; ate mamĩn akowah jokwah, ate chhũ achha ngãle tema pẽmtah nyem achhah heh mamĩn akowah jokwah. Nanga Jacob nôma adong ngãma thonghûn rîî eko ã?”
13Jisu ma dânthâng wah, “Hẽnhẽn ma are jokowah jok ekah a ereheh jolân ngakrit min, 14Rohkomĩn hẽnhẽn ma ngãma koh ekãng jokowah jok ekah a ereheh chenthû mĩn jolân la ngakrîî min. Ngãma thin nâng koh ekãng jo pa, thin hûngkhhen nâng thin nâng rôandông kohte jokhô rãng edanga, ngãle thin nâng rôantang rôanjêng rôandông ekoh a.”
15Dihiak nyũ ma dânthâng wah, “Hêthôte, ngã nâng mĩn ere jo pa kohhang! eroh kobã ngã chenthû mĩn jolân larîîtû edangang, ngãle ako jo khhoat rãng lathãm kãtû edangang.”
16Jisu ma tenâng ngatwah, “Wãng lohma nang tangwã roowãng oh,” “ediko anâng ngakkã rên.”
17Dihiak nyũ pumma dânthâng wah, “Ngãnâng tangwã ahõ,”
Jisu ma dânthâng wah, “Nangma tangwã ahõ ngãeko pa toangtang lâjab toh. 18Nanga dela wãbengâ nâng lâwãng toh, ngãle athâng heh nâng rôamsõng eko delawã pamĩn nang tangwã dangmah. Nangma ngãnâng toangtang lâthôkoh thang.”
19Dihiak nyũ pumma ngatwah, “Hêthôte, ngãma nanga mõng lêlê khẽ ekĩ,” 20“Nite niwã Samaritan hehma Joban nâng are hahkõng kho ko sôam wah, rohkomĩn nê Jews hehma Joban nâng rangsôam thĩn the pa Jerusalem ngãekẽn.”
21Jisu ma tenâng ngatwah, “Dihiak nyũ, ngãnâng pũtẽ dâlem hang, sanpoat pa ehûrah, mihnyãn hehma Wã nâng are hahkõng kho komĩn lasôam min ngãle Jerusalem nângmĩn lasôam min. 22Nê Samaritan hehma hẽnnâng sôam ekẽn a epamĩn senthêmthêm laangjet met; rohkomĩn ni Jews hehma hẽn nâng sôam ekĩ a epa jet ekĩ, chenrãngma ngãko khopê pa ni Jews hehwah choh ekĩ. 23Rohkomĩn sanpoat pa ehûrah, ngãle lâhû thah, Joban Ju chân chohte mihnyãn hehma Wã nâng Ju ngãle toangtang ma esôam a, ngãle eroh sôam pa Joban Wã ma hûn ekah. 24Joban pa Ju, ngãle ate Ju chânma lôlôbã mihnyãn hehma tenâng tema hûn ekah rãngrãng toangtang ma jîensôam min.”
25Dihiak nyũ pumma tenâng ngatwah, “Ngãma Messiah ekãrah ngãma jet, ngãle chenthû ate makã thah ko, tema ninâng chentô pa ethô koh hĩ.”
26Jisu ma dânthâng wah, “Epa ngã, nang demnâng ngĩnthômînte pa Messiah.”
27Ere sanpoat ko Jisu dijûnte heh hokwah, ngãle thinma dihiak nyũ demnâng ngĩnthômîn thû khẽhû lahma nyahrãng patrit wah. Rohkomĩn dihiak nyũ ko hẽn mamĩn, “Chenni hûn eko a?” bã, “Ate demnâng chenrãngma thô mîn eko a?” ngãma ngãhõ.
28Ediko dihiak nyũ pumma ate jotit pa phethîen lahma hah nâng ngakwâng wah, ngãle tema enâng wah mihnyãn hehnâng thôkoh wah, 29“Sûkã tan rên, mihnyãn wãtheh ma ngãma chenni motek a ereheh phangtang thôkoh ehang. Te a Messiah edangthêm a?” 30Ephûmma thin hahwah mihnyãn heh Jisu sokrãng katwah.
31Ere sanpoat ko dijûnte hehma Jisu nâng ngatwah, “Hêthôte, chenni komĩn phhekchhah oh!”
32Rohkomĩn tema dânthâng wah, “Ngãnâng nêma lajetli phhekchhah tonghang.”
33Ephûmma dijûnte heh thin dede tungko jabmîn wah, “Tenâng hẽnma komĩn phhekchhah lâkep hûko tah.”
34Jisu ma thin nâng ngatwah, “Ngã phhekchhah pa, ngã chîenkatte ngĩn kepkep dang lakma tema chîen ehang moatlem râmoat pa. 35Nêma aroh rângngã en, ‘Chhahmûn rãng jeng belîî tonga.’ Rohkomĩn, Ngãma nê nâng thôkoh ekah, pit hehnâng senthêmthêm sûtan en; chhah heh lâmun tah, ngãle khhôankhhên lâthâng tah! 36Chhah khhôan khhênte hehnâng dekbĩ thã kohmin, ngãle tema rôantang rôanjêng rôandông rãng khhôan thîen ekah; eroh wah akhiette le khhôan khhênte nîî arôam ma khũhah nâhah edanga. 37Apa toangtang ngĩn, ‘wãtheh ma chhahwên ekah, ngãle ahân ma khhôan khhẽn ekah.’ 38Nêma moat wah ladang pit kowah chhahmun ekah heh khhôan khhên rãng ngãma nê chîen chhõan ekah; ere pit pa mihhân ma moat wah, phûmma thinma moatmãn kowah chhah pa nêma kep ekẽn.”
39Dihiak nyũ pumma thôkoh jũnko erehahwah Samaritan mihnyãn heh jahmõang Jisu nâng pûtê dâlêm wah, “Ngãma chenni motek a ereheh phangtang tema thôkoh ehang.” 40Ephûmma Samaritan heh ate tânâng kã lahma thin demnâng johtông rãng roatseb wah, ngãle thin demnâng Jisu jânîî johtông wah.
41Jisu nâng ate ngĩn jũnko ahân mamĩn ajahthêm ma pûtê dâlêm wah, 42ngãle thinma dihiak nyũ ko ngatwah, “Nima ade phûmma lâpũtẽ tih, rohkomĩn nangma ninâng thôkoh jũnko dangmah, ni dedema ate ngĩn lâchohtat tih, ngãle lĩnlin te a rangkhhen Pângte ngãma nima lâjet tih.”
Jisu Ma Sahhabwã Chha Paangmih Mêsiet
43Ere hahko Jisu jânîî tongthîen lahma Galilee nâng katwah. 44Chenrãngma ngãko ate dedema ngatwah, “Mõng heh thin diak akãn nâng lôlô roak atoak laweh ma hôan ekah.” 45Ate Galilee nâng hokkhhôam phûmma, enâng wah mihnyãn hehma ate roowah, chenrãngma ngãko thin khũ Dânkhôam Lõkuh rãng Jerusalem nâng katwah, eko lõkuh poatko tema chentô motah heh thinma khêwah.
46Ediko Jisu Galilee wah Cana hahko ngakkat wah, ngãle ere hahko tema jowah angurti rãng litsiet wah. Capernaum hahwah Lowang khhen nâng moatte sahhabwã chha paangmih pa khũn lahma dâng wah. 47Tema chenthû Judea wah Galilee nâng Jisu lâkã thah ngãma chohtat phûmma, tema Jisu demnâng chohmîn kã lahma Capernaum nâng wãng lahma ate chha rîî nẽmnẽm khũn ekah pa mêsiet koh rãng roatseb wah. 48Jisu ma tenâng ngatwah, “Nêma patritli le bâritli moatlem heh lakhẽ kẽn ko hẽn mamĩn pũtẽ dâlem met.”
49Sahhab pumma dânthâng wah, “Hêthôte, Ngã chha pa ritmako ngã demnâng johwãng mêng hang.”
50Jisu ma tenâng ngatwah, “Wãngoh: Nang chha pa rîîmah!”
Ere mihwã pumma Jisu ngĩn ko pũtẽ dâlem lahma wângwah. 51Ate hum nâng wâng lemko ate haa chohkã lahma thôkoh wah, “Nang chha pa lâsen tah!”
52Tema thin nâng ate chha pa chenre sanpoat ko sentah a ngãma thôngphâ wah. Thinma dânthâng wah, “Majâ sanhêmthah wantheh sanpoat tôko khoanchhet pa sên wah.” 53Ephûmma tenâng, “Nang chha pa rîîmah,” ngãma Jisu ma thôkotah pa ere sanpoat ko thôkoh wah ngãma naawã pumma thônghûn wah. Ephûmma ate ngãle ate humte tangkâ heh phangtang ma pûtê dâlêm wah.
54Apa Jisu Judea wah Galilee nâng kat diko depnîî rãng patritli moatlem moat wah.
Currently Selected:
JOHN 4: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
