JOHN 3
3
Jisu Ngãle Nicodemus
1Jews heh khhapho ate mîn pa Nicodemus ngãma wãtheh dâng wah, ngãle te a Pharisee dâng wah. 2Jâtheh rangpen nâng Jisu tânâng wãng lahma tenâng ngatwah, “Rabi, nimajet nanga Joban ma chîenkat wah hêthôte. Hẽnma mĩn nangma mo eko rãngrãng patritli heh lata momin chenthû ate demnâng Joban chân latong ekah ko.”
3Jisu ma tenâng dânthâng wah, “Ngãma nangnâng toangtang thôkoh ekĩ: hẽnmĩn depnîî la ngakchha ekah ko Joban Hahsông lachoh khẽ min.”#3.3 angak; bã rangkho wah.
4Nicodemus ma chhîen wah, “Dongchoan mihnyãn pa chenroh depnîî jîen ngakchhat min a?” “Depnîî ngakchhat rãng chenthû mĩn ate nyõng wokkhhen nâng jîen ngak lupmah!”
5Jisu ma dânthâng wah, “Ngãma nangnâng toangtang thôkoh ekĩ” “Hẽn mĩn jo ngãle Ju ma lachha ekah ko Joban Hahsông the nâng lata wãngmin. 6Mihnyãn hẽ angem phoang pa nyõng awã ma chha ehĩ, rohkomĩn ju pa Ju ma chhat min. 7Ngãma nangnâng nanga depnîî ngakchhat min ngãma ngat rãngma nekpatrîî.#3.7 angak; bã rangkho wah. 8Pông pa tema chen ngenâng pôngchhôan hûn ekah a enge nâng rângpong chhõan a; ngãle nangma pônglîn pabã rângtat oh, rohkomĩn nangma chenwah ponghû erah a, ngãle chennâng pongchhõan ekah a epa rângjet moh. Hẽnhẽn Juwah chha ekah a erehehmĩn erãngrãng jôbã dângmin.”
9“Aroh chenroh jîen dângmin a?” ngãma Nicodemus ma chhîen wah.
10Jisu ma dânthâng wah, “Nanga Israel ko hêthôte adong wãtheh, phûmma nangma epa jetmoh nẽ? 11Ngãma nangnâng toangtang thôkoh ekĩ: Nima chenni jet ekĩ a epa thôekĩ, ngãle chenni khẽ ekĩ a epa jôbã thôekĩ, rohkomĩn nêma hẽnma mĩn ni ngĩn ko pũtẽ met. 12Ngãma nangnâng are hahtokkhoh wah ngĩn heh thôkoh ko pũtẽ mahhang; phûmma ngãma nangnâng, rangkhhethung wah ngĩn heh mathôkoh eko jãtanga, nangma chenroh ejîen pũtẽ hanga? 13Ngãle hẽnmĩn rangkhhethung nâng mãthat wãng ekah, Mihnyãn Chha pa lôlôbã rangkhhethung wah kãerah.”#3.13 Are ngĩn pa vars 21 tôko chhoat raang kat ekah
14Moses ma jaan wah hôan wah pû sẽ hah nâng thãnkah ra nâng laangtah rãngrãng, Mihnyãn Chha mĩn eroh laang min, 15eroh kobã hẽnhẽn ma tenâng pũtẽ dâlem ekah a erehehma rôantang rôanjêng rôandông echoh a. 16Joban ma are hahtokkhoh ko nyahrãng hûn lahma ate Chha wãtheh lôlô pamĩn koh ekah, eroh wah hẽnhẽn ma tenâng pũtẽ dâlem ekah a ereheh larîî min rohkomĩn thin ma rôantang rôanjêng rôandông echoh a. 17Chenrãngma ngãko Joban ma ate Chha pa hahtokkhoh chhihsiet rãng chîenkat dangmah, hahtokkhoh pêpâng rãng chîenkat erah.
18Hẽnhẽn ma Chha ko pũtẽ dâlem ekah a ere heh nâng achhih la ngãmin; rohkomĩn hẽnhẽn ma lapũtẽ dâlem dang ekah a ere heh nâng achhih ngãma rângã tah, chenrãngma ngãko, thinma Joban Chha wãtheh lôlô ko pũtẽ dâlem mah. 19Achhih asen pa aroh rẽn ekah: wẽnphiak pa hahtokkhoh ko kãerah, rohkomĩn mihnyãn hehma wẽnphiak ko hûn nôma rangnyek ko hûn ekah, chenrãngma ngãko thin moatlem heh achhih. 20Hẽnhẽn ma achhihli moekah a erehehma wẽnphiak ko chhihchoh ekah ngãle wẽnphiak ko hûmah, chenrãngma ngãko thinma moatlem chhih heh khêrit hûnmah. 21Rohkomĩn hẽnhẽn ma asenli moekah a erehehma thin moatlem pa Joban jũnko moekah ngãma wẽnphiak pumma chenkhê sok a ngãma wẽnphiak ko hûekah.
Jisu Ngãle John
22Ediko, Jisu le ate dijûnte heh Judea diak ngenâng katwah, thin demko enâng jâtheh jânîî rãng tongthîen lahma baptijem kohthîen wah. 23Salim tâwah Aenon hahko John mamĩn baptijem koh lahma dâng wah, chenrãngma ngãko ere theko jo ajah dâng wah. Mihnyãn heh ate tâko hû lahma thin nâng tema baptijem kohwah. 24(Apa John phâtek nâng sekmako dâng wah.)
25John dijûnte khũtheh Jews heh demnâng nîem jũnko sek sâsôan rãngma#3.25 Jew; wanwantheh ma jews khũtheh ngãma raang ekah. chhiakmîn wah. 26Ephûmma John tânâng wãng lahma thinma thôkoh wah, “Hêthôte, nangma thonghûn ekole Jordanjo rãngma sankat nge wah nang demko mihnyãn wãtheh dangtah pa, nangma mihnyãn hehnâng ate jũnma thôkotoh pa? tema athâng heh baptijem koh ekah, ngãle angã ngã ate tânâng hûekah!”
27John ma dânthâng wah, “Joban ma lakoh ekah ko, mihnyãn ma chenmin lata chohmin. 28Ngãma jab ekãng pa nêma lâtat thah, ‘Ngã a Messiah dangmek, rohkomĩn ngã a ate mako chîenkat lã ehang.’ 29Nemnyan wã pa nemnyan nyũ rãng; rohkomĩn nemnyan wã tâwah chep lahma tenâng jetat ekah ate lemrũchha pa, nemnyan wã kahrã tat ko khũhah ekah. Ere rãngrãng ngãmĩn khũhah ekãng. 30Ate jêngdong dongwãng rêmin, rohkomĩn ngã jêngrin rinjâ rêmin.”
Rangkhhethung Wah Katte
31Rangkhhethung wah hẽn kãerah a epa chentô nôma adong. Hẽn pa hahtokkhoh wah a ereheh a hahtokkhoh thiak ngãle hahtokkhoh ngĩn ethô a, rohkomĩn hẽn pa rangkhhethung wah kãerah a epa chentô nôma adong. 32Tema chen pa khẽtah a ngãle tattah a ereheh thôkoh ekah, rohkomĩn ate ngĩn pa hẽn mamĩn pũtẽ mah. 33Rohkomĩn hẽnhẽn ma ate ngĩn pa kep ekah erehehma Joban pa toangtang ngãma jet ekah. 34Hẽn pa Joban ma chîenkat erah a epumma Joban ngĩn thô ekah, chenrãngma ngãko tenâng Joban ma ate Ju pa mênchõng koh ekah. 35Wãma ate Chha nâng hûn lahma chentô pa tenâng pên thuk ekah. 36Hẽnhẽn ma Chha ko pũtẽ dâlem ekah a erehehma rôantang rôanjêng rôandông chohmin; Hẽnhẽn ma Chha ngĩn lakep dang ekah a erehehma rôantang rôanjêng rôandông lachoh min, rohkomĩn ere heh nâng Joban ma rôantang ma echêm thuk a.
Currently Selected:
JOHN 3: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
