JOHN 11
11
Lazaras Rit Ngĩn
1Bethany hah nâng sôngte mihnyãn wãtheh ate mîn pa Lazaras pa khûn rêwah. Mary ngãle ate naa Martha nîîmĩn ere hahko sông wah. 2(Are Mary pumma Teso dãkõ tien tumli ma lokko lahma ate khochoo pumma choakhut koh wah; phûmma are khûnte pa ate naa Lazaras dâng wah.) 3Ate khãkho pumma Jisu nâng ngĩn matkat wah: “Teso, nang lemrũchha sen pa rîîtah.”
4Chenthû Jisu ma are ngĩn pa tat phûmma tema ngatwah, “Are khûn jũnwah Lazaras larîî min; apa Joban mîn dôngthuk rãng bã khũn ekah, ngãle are jũnko Joban Chha mîn edong thuk a.”
5Jisu ma Martha ngãle ate khãkho ngãle Lazaras nâng nyahrãng hûnwah. 6Rohkomĩn chenthû tema Lazaras khûn ngĩn pa chohtat lahma mĩn lakã ma ate tongtah theko jânîî tôngthîen wah. 7Ediko tema dijûnte hehnâng ngatwah, “Nãng Judea nâng ngakwãng e.”
8Dijûnte hehma dânthâng wah, “Hêthôte,” “Enâng wah mihnyãn hehma nang lõngma ritpet rãng phũngtah wah chentô mãtaang ekah; phûmma nanga enâng ngakwâng phũng eko ã?”
9Jisu ma dânthâng wah, “Jâtheh ko echhi koanta nîî dangmah nẽ? Eroh wah hẽnhẽn rangwô poatko khoam ekah a ereheh dãkho la thutrîî min, chenrãngma ngãko are hahtokkhoh kowah wẽnphiak pa thinma khẽ ekah. 10Rohkomĩn thin rangnyek nâng makhhoam ako dãkho ethut a, chenrãngma ngãko thin nâng wẽnphiak ahõ.” 11Jisu ma epa ngat diko thin nâng thôkoh wah, “Nãng lemrũchha Lazaras pa juplek rẽ ekah, phûmma ngã kã lakma ate satsiet katmin.”
12Dijûnte hehma dânthâng wah, “Teso, te a ajup madang ako, asen erẽ a.”
13Jisu ma Lazaras rîîtah ngãma ngat thiak ngatwah, rohkomĩn thinma ajup nângjô ngãthêm ekah ngãma thônghûn wah. 14Ephûmma Jisu ma thin nâng, “Lazaras rîîtah, ngãma thôkoh wah. 15Rohkomĩn ngã khũhah ekãng, chenrãngma ngãko ngã ate demko ladang pa nê rãng asen dang ekah, ade phûmma nêma epũtẽ dâlem hah. Nãng ate tânâng kã e.”
16Thomas (tenâng Didimas ngãma mĩn roowah) ma ate lemrũ hehnâng ngatwah, “Nãng phangtang nãng hêthôte demnâng johkã e, eroh kobã nãngmĩn ate demnâng ejohrîî e!”
Jisu Pa Arit wah Ngak Hînte Ngãle Rôandông
17Chenthû Jisu hokkhhôam phûmma, Lazaras pa rukattah wah jâbelîî lâdang tah ngãma tônglâ wah. 18Bethany hah pa Jerusalem kowah meenîî nôma mĩn athe dâng wah, 19ngãle Jews mihnyãn heh ajahthêm Mary le Martha tâko thin naa rit jũnko chohmîn hû lahma dâng wah.
20Chenthû Martha ma Jisu lâhû thah ngãma chohtat phûmma ate lemchoh rãng loatchhôan wah, rohkomĩn Mary pa hum ko tônglâ wah. 21Martha ma Jisu nâng ngatwah, “Teso, nang anâng dâng wah dâng nôma ko, ngã naa pa larîîmin wah! 22Rohkomĩn ngãma jet athâng heh mĩn nangma Joban wah chenni tha ekoh a epa ekoh hoh.”
23Jisu ma tenâng thôkoh wah, “Nang naa pa ngak hîn erẽ a,”
24Martha ma dânthâng wah, “Ngãma jet,” “Athhôanjâ rangwô ko ate engak hin a.”
25Jisu ma tenâng ngatwah, “Ngã a ritwah ngak hînte ngãle rôandông. Ngãnâng hẽnhẽn ma pũtẽ dâlem ehanga ereheh ritjô marẽ kohmin, ahîn erẽ a; 26ngãle hẽnhẽn ma ngãnâng pũtẽ dâlem lahma tong ekah a ereheh chenthû mĩn larîî min. Nangma ako pũtẽ dâlem ekole?”
27Tema dânthâng wah, “Teso, pũtẽ dâlem ekãng!” “Ngãma nanga hahtokkhoh ko katte, Joban Chha Messiah ngãma mĩn pũtẽ dâlem ekĩ.”
Jisu Seb
28Martha ma epa ngat diko, ngakwãng lahma ate khãkho Mary pa ahuhchha ma roowâng wah. Ate khãkho nâng thôkoh wah, “Hêthôte pa ako tonga,” “ngãle tema nang lẽm ehoh.” 29Chenthû Mary ma tat phûmma, tõanchep lahma Jisu chohmîn rãng sitsiak loatkat wah. 30(Ere poatko Jisu hahdaang nâng mãhû wãng dâng wah, ate demnâng Martha chohmîn tah theko tong lahma dâng wah.) 31Mary demnâng hum ko johtong tah mihnyãn hehma Mary tõanchep lahma sitsiak loatchhôan pa khẽ lahma ate diko jûnchhôan wah. Mary ma mengruk nâng kã lahma sebkat rãng ngãekah ngãma thinma thônghûn wah.
32Mary, Jisu tâko hûkã lahma Jisu chohkhê rienrien, Jisu dã thong ko khupjup kat wah. Tema ngatwah, “Teso,” “Nanga anâng dâng wah dâng nôma ko ngã naa pa larîî min wah!”
33Jisu ma Mary seb lahma khêwah, ngãle ate demwah mihnyãn hehmĩn seb lahma khêwah; eko Jisu mĩn nyahrãng hûngchhih wah. 34Jisu ma thin nâng, “Chenriang nâng bĩnkattet a?” ngãma chhîen wah.
Thinma dânthâng wah, “Teso, wãng lohma sûwãng roh,”
35Jisu sebwah. 36Mihnyãn hehma ngatwah, “Sûtan en tema chentô hûn ekah a!”
37Rohkomĩn khãka hehma ngatwah, “Tema mitdoak hehmĩn sensiet tah dangmah nẽ? phûmma tema Lazaras ritwah lata ngak hinsiet min nẽ?”
Lazaras Ngak Hînsiet
38Ediko mĩn nyahrãng hûng wienchhih lahma, Jisu mengruk nâng katwah, mengruk pa lõngwah thutwah, ngãle lupwâng thĩn ko lõngkhaa ma tãngsek lahma dâng wah. 39Jisu ma “Lõngkhaa pa rẽphe en!” ngatwah.
Martha, aritte nyãdem, pumma dânthâng wah, “Teso lânem tah dângmin. Ate bĩnkat tih wah jâbelîî lâdang tah!”
40Jisu ma tenâng ngatwah, “Pûtê dâlêm marẽ oko nangma Joban chân pa echohkhẽ oh ngãma la thôkoh wahnẽ?” 41Thinma lõng pa rêphê wah. Jisu ma rangkho nâng sûwên lahma ngatwah, “Wã nangma ngãnâng chohtat dĩ dangkoh a ngãekĩ. 42Ngãma jet nangma rôantang tatkat ehang, rohkomĩn akowah mihnyãn hehrãng sênrãng ma apa ngãekĩ, eroh kobã ngã a nangma chîenkat wah ngãma thinma epũtẽ dâlem a.” 43Tema epa ngat diko, chân mõang rak lahma, “Lazaras, loatkã roh!” ngãma roowah. 44Ate dek adã heh mengdoap khhet pumma doapkhhek, ngãle ate thhen phãng komĩn khhet ma doap lahma loatkat wah. Jisu ma thin nâng ngatwah, “Khhet heh jânphe koh en,” “ngãle chenwãnga.”
Jisu Lêlatnâng Ranchep
(Mt 26.1-5; Mk 14.1, 2; Luk 22.1, 2)
45Mary demnâng chohmîn rãng jahmõang mihnyãn hûtah hehma Jisu ma chenni motah a epa khẽ lahma tenâng pûtê dâlêm wah. 46Rohkomĩn khãka heh ngakchhõan lahma Jisu ma chenni motah a ereheh Pharisee hehnâng thôkoh wah. 47Ephûmma Pharisee le Sôam aroakte adong heh ngôang awang heh demnâng chohmîn lahma ngatwah, “Nãngma chenrẽ ea? Are mihnyãn pumma patritli moatlem moekah hehnâng thatsû tan en! 48Nãngma arohjû madang thuk eko, chentô ma tenâng epũtẽ dâlem a, ngãle Roman diak pênte hehma nãng lêlatnâng mo lahma nãng Rangsôamhum ngãle nãng diak pa echhih siet koh hĩ!”
49Caiaphas ngãma wãtheh ere rangpâ ko Sôam aroakte adong thhôan dâng wah, epumma ngatwah, “Nê a tabaa tet a! 50Diaktang ma chhihjâ nôma mihnyãn heh rãngma wãtheh mihnyãn rit pabã asen ngãma nêma chhẽmhûn met nẽ?” 51Lĩnlin ko ate hûngsi wah hôngjab wah dangmah; phûmma ere rangpâ ko te a Sôam aroakte hehwah adong thhôan dâng wah dâng phûmma, tema Jisu Jews heh rãngma ritmin ngãma Joban ngewah loatjab wah, 52ngãle ate lôlô rãng ladang, Joban nâng pûtê dâlêmte mihnyãn phanchhõan ekah heh wãtheh mihnyãn rãngrãng rôamsiet rãngma jabwah.
53Erejâ phûmma Jews heh thôte jabte hehma Jisu ritphê rãng phûng wah. 54Ephûmma Jisu Judea nâng mihnyãn heh mitkhê ko laloat khoam tû ma, sẽhah kêwah Ephraim hahko tôngwâng wah, eko ate dijûnte heh demnâng tôngwah.
55Dânkhôam lõkuh thâng nẽmnẽm dâng wah, ngãle mihnyãn heh jahmõang thin diak wah Jerusalem nâng lõkuh mako sek sâsôan nîemhôan rãng hokwah. 56Thinma Rangsôamhum ko khhôanhû lahma Jisu lêmsok wah, thinma wãtheh ma wãtheh nâng chhîenmîn wah, “Nangma chenroh thonghûn eko a? Lĩnlinjô te a lõkuh rãng lahû min nẽ?” 57Sôam aroakte adong ngãle Pharisee hehma ngatwah, Jisu chenriang nâng tong ekah a epa jette hehma ninâng sitsiak thôhok kohmin, chenrãngma ngãko thinma ate loatkhhek rãng ngatwah.
Currently Selected:
JOHN 11: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
