KHABÊNG 11

Babel Humchõang

1Khhabâng ko, Hahtokkhoh wah mihnyãn nyũchha heh phangtang jabtheh jâtheh ngãle ngĩntheh tutã dâng wah. 2Phûmma thin a Sankat nge nâng phôangwâng rienrien, thin a Babylon wah hahthung ko kã lahma eko sôngkat wah. 3Thinma wãtheh ma wãtheh nâng jabmîn wah, “Chepen! nãngma ita koak lihma cheh kângkâng hôan e.” Eroh wah thin nâng hum hôan rãng ita wîn dâng wah ngãle epa pângloat rãng rongnyekti dâng wah. 4Thinma ngatwah, “Chep en, nãngma rangnâng lânlep wênroh humchõang hôan e, eroh kobã nãng dedema nãngmîn eta dongsiet e, ngãle hahtokkhoh phangtang nâng la phõang phansõng edange.”

5Ephûmma thinma hôan ekah hahdaang ngãle humchõang pa sokrãng Teso katwah. 6Ngãle tema ngatwah, “Sûtan, are mihnyãn heh phangtang jattheh, ngãle thinma jabtheh jab ekah; are moekah pa thinma khhabâng moatlem bângmo ekah. Ephûmma thinma chenni moat hûn ekah a epa thinma tamo a! 7Chepen, nãngma kã lihma thin jab pa tûngmaang kã thuk e, eroh kobã thinma wãtheh ma wãtheh jab lajettat mîntû edanga.” 8Ephûmma Teso ma thin a hahtokkhoh phangtang nâng phânchhôan thuk wah, ngãle thinma hahdaang hôan pa jekwah. 9Ere hahdaang dong mîn pa Babylon,#11.9 Babylon: Are mîn pa Hebrew jabnâng “sĩsem dângjâ” nâng ngãekah. chenrãngma ngãko eko Teso ma chentô mihnyãn heh jab pa tûngmaang thukwah, ngãle ekowah tema thin a chentô hahtokkhoh phangtang jûnloat wah.

Shem Chhũ Achha Heh

(1Ngĩ 1.24-27)

10Are heh Shem chhũ achha heh. Jodông lûm diko pânîî ko, chenthû Shem châtheh rangpâ dângko, tema dela chha Arpachshad chhat wah. 11Ediko te a châ bengâ rangpâ hîn wah, ngãle ahân chhũ achha mĩn chhat wah.

12Chenthû Arpachshad pa roakrem rangpâ dângko, tema dela chha Shelah chhat wah; 13ediko te a châ belîî pârem rangpâ hîn wah ngãle ahân chhũ achha mĩn chhat wah.

14Chenthû Shelah roakrem rangpâ dângko, tema Eber chhat wah; 15Ngãle ediko te a châ belîlî pârem rangpâ hîn wah, ngãle ahân chhũ achha mĩn chhat wah.

16Chenthû Eber roakrem pâbelîî rangpâ dângko, tema dela chha Peleg chhat wah; 17ngãle ediko te a châ belîî roakrem rangpâ hîn wah, ngãle tema ahân chhũ achha mĩn chhat wah.

18Chenthû Peleg roakrem rangpâ dângko, tema dela chha Reu chhat wah; 19ngãle ediko te a chânîî pâekhũ rangpâ hîn wah, ngãle tema ahân chhũ achha mĩn chhat wah.

20Chenthû Reu roakrem pânîî rangpâ dângko, tema dela chha Serug chhat wah; 21ngãle ediko te a chânîî pâengit rangpâ hîn wah, ngãle tema ahân chhũ achha mĩn chhat wah.

22Chenthû Serug roakrem rangpâ dângko, tema dela chha Nahor chhat wah; 23ngãle ediko te a chânîî rangpâ hîn wah, ngãle tema ahân chhũ achha mĩn chhat wah.

24Chenthû Nahor roaknîî pâekhũ dângko, tema dela chha Terah chhat wah. 25ngãle diko te a châtheh echhi pâekhũ hîn wah, ngãle tema ahân chhũ achha mĩn chhat wah.

26Chenthû Terah roak engit rangpâ dângko, tema Abram, Nahor, ngãle Haran chhat wah.

Terah Chhũ Achha Heh

27Are heh Terah chhũ achha heh, te a Abram, Nahor, ngãle Haran heh wã dâng wah. Haran pa Lot wã dâng wah. 28ngãle Haran ate hahdaang ko Babylon wah Ur hah nâng ritwah. 29Abram ma Sarai kepwah, ngãle Nahor ma Milkah kepwah, te a Haran chha dâng wah ngãle Iscah wã dâng wah. 30Sarai chhahõ dâng wah.

31Terah ma ate chha Abram ngãle ate chhũ Lot sietwah, te a Haran chha dâng wah ngãle ate nem Sarai, Abram tangnyũ siet lahma thin demko Babylon wah Ur hah phethîen lahma Canaan nâng katwah. Thin a Haran nâng wãng lahma enâng sôngwâng wah. 32Terah enâng chânîî pâ bengâ ko ritwah.

Currently Selected:

KHABÊNG 11: Nokte

Highlight

Copy