PASONIR KORMO 4

Peter Aru John Sobha Aage Te

1Aru tarkhan pora manuh khan logot te kotha koi thaka homoi te, puruhit khan, girja ghor laga senapoti aru Sadducees khan tarkhan usor te ahhise, 2aru besi beya paise kilemane tarkhan pora manuh khan ke sikhai kene Jisu he mora pora ponuruthan hoise eneka sakhi di thakise. 3Aru tarkhan pora tarkhan ke dhori kene aage din nahha tak tarkhan laga haat te rakhise, kilemane hei tu homoi sham phale he thakise. 4Kintu kotha huna manuh khan besi pora biswas kori loise, aru manuh khan genti kora tu pans hazar nisna thakise.

5Aage din te taikhan laga solaongta khan, bridho khan, aru pondit khan sob Jerusalem te jama korise, 6aru logot te Annas maha-puruhit aru Caiaphas aru John aru Alexander, aru kon kon mahan puruhit laga khandan thakise tarkhan sob bhi thakise. 7Aru ketiya tarkhan pora majot te tarkhan ke anise, tetiya tarkhan pora hudise, “Tumikhan ki shakti pora nahole kon laga nam te eitu korise?” 8Tetiya Peter he Pobitro Atma pora bhorta hoi kene, tarkhan ke koise, “Neta khan aru bridho khan, 9jodi eitu lengera manuh ekjon ke bhall kam kora tu ki tagot pora korise eitu nimite amikhan ke porikhya kori ase hole 10tetiya tumikhan sob pora aru Israel manuh khan sob pora eitu jani lobi, Nazareth laga Jisu Khrista, kon tumikhan pora kros te morai dise, kon Isor he mora pora jinda uthai dise–Tar pora eitu manuh tumikhan usor te bhall hoi kene khara kori di ase. 11Eitu Jisu tu tumikhan, ghor bona manuh khan pora shari diya asol bhetimul tu ase, kon tu ghor khara kora pathor hoise. 12Aru dusera kon logot te bhi poritran nai, kilemane akash bhitor te manuh khan kon ke bhi amikhan ke bachabole nam diya nai.”

13Eitu homoi te, ketiya tarkhan pora Peter aru John tu likha porha eku nai, phaltu manuh he ase, kintu bhoi nakori kene mon dangor hua dekhise, tarkhan asorit lagise. Aru tarkhan pora tarkhan tu Jisu logot te thakise eneka jani loise. 14Kintu kon manuh bhall hoise, eitu tarkhan piche te khara kori thaka tu dekhi kene, tarkhan pora eku apoti koribole para nai. 15Kintu ketiya tarkhan tu sobha majot pora jabole hukum dise, tarkhan ekjon ekjon majot te eneka alusona korise, 16aru koise, “Eitu manuh khan karne amikhan pora ki koribo? Kilemane tarkhan pora dangor sign ekta kori loise aru eitu Jerusalem te thaka manuh khan sob pora jani kene ase aru amikhan pora eitu nahoi eneka tiyag koribo napare. 17Kintu eitu khobor tu manuh khan majot te besi najabo karne, eitu nam te kon ke bhi kotha nakobole amikhan pora tarkhan ke hukum ekta dibo.” 18Eitu nimite tarkhan pora tarkhan ke arubhi matise aru Jisu laga nam te kon ke bhi kotha nakobo nahole sikhai nadibole hukum dise. 19Kintu Peter aru John pora jawab di kene koise, “Isor laga soku aage te Isor laga kotha shari kene tumikhan laga kotha tu manibole thik ase na nahoi eitu tumikhan pora he bichar kori lobi, 20kilemane ki dekhise aru hunise eitu nakoi kene thakibole amikhan pora napare.” 21ketiya tarkhan ke dondo dibole eku upai pua nai, tetiya jur pora hukum tu di kene tarkhan ke pathai dise, kilemane manuh khan sob pora ki hoise eitu nimite te Isor ke dhanyabad di thakise. 22Aru manuh kon logot te eitu asorit sign kori kene hustho korise, tar umor tu chalis saal upor te thakise.

Bhoi Nakoribo Karne Biswasi Khan Prathana

23Ketiya tarkhan ke shari dise, tarkhan saathi khan logot te jai kene puruhit khan aru bridho khan pora ki koise eitu khobor dise. 24Aru ketiya taikhan pora eitu hunise, taikhan pora awaz eke logot te ulai kene Isor ke koise, “Mahan Isor, Kon he sorgo, prithibi, samundor, aru tate jinis sob bonai loise, 25Kon he tumar daas, amikhan laga purush pitri, David pora Pobitro Atma pora koise,

“‘Kile porjati khan khong uthi ase,

aru manuh khan pora kam nathaka yojana bonaise?

26Prithibi laga raja khan jugar hoise,

aru solaongta khan eke logot te jama korise,

Prabhu birudhi te aru Prabhu laga Abishek Ekjon birudhi te jama korise’ ––

27kilemane apunar Pobitro nokor Jisu, kon messiah hobole apuni basi loise, tar birudhi te Herod aru Pontius Pilate, aru logot te porjati khan aru Israel manuh khan, hosa bhi eitu sohor te, 28apuni laga tagot pora aru itcha te ki kam koribole bonai rakhise eitu koribole jama korise. 29Aru etiya sabi prabhu, tarkhan pora kiman bhoi khilai di ase, kintu tumar nokor khan bhoi nahoi kene, 30apuni laga haat uthai kene hustho kori diya kam aru sign aru asorit kam, ki apunar pobitro nokor Jisu laga nam te amikhan pora kori ase eitu khan loi kene amikhan mon dangor kori dibi.” 31Aru ketiya taikhan prathana kori loise, taikhan jama kori thaka jaga tu hilise, aru tarkhan sob Pobitro Atma pora bhorta hoise aru himat te Isor kotha tu narukhi kene koise.

Sampoti Sob Taikhan Eke Laga Hoise

32Etiya kiman jon pora biswas kori loise taikhan sob mon aru atma ekta hoise, aru konu manuh pora bhi nijor thaka sampoti tu nijor laga eneka bhabna kora nai, kintu sampoti sob tu eke laga hoise. 33Aru shakti dangor loi kene pasonir khan pora Prabhu Jisu ponuruthan laga sakhi di thakise, aru taikhan sob laga upor te dangor anugrah thakise. 34Taikhan majot te kon bhi dukh thaka nai, kilemane kiman jon logot te maati bari nahole ghor thakise eitu bikiri kori kene taikhan majot te anidise 35aru pasonir usor te jama korise, aru sob manuh logot te nijor dorkar thaka hisap te bhag kori kene di dise. 36Teneka, Levi manuh ekjon, Cyprus te thaka manuh ekjon nam Joseph thakise, kon ke Barnabas eneka pasonir khan pora mati thakise (ki ortho ase prirona putro) 37tar nijor laga kheti ekta bikiri korise aru toka poisa tu anikene pasonir khan usor te jama kori dise.

Currently Selected:

PASONIR KORMO 4: NagaMe

Highlight

Copy