PASONIR KORMO 3

1 Lengera Bikhyari Hustho hoise

1Eitu homoi te Peter aru John girja ghor te prathana homoi te jai thakise, eitu noh baji homoi#3:1 3:00Pm nisna ase thakise. 2Aru jonom din pora lengera manuh ekjon hodai ani thakise, aru taikhan pora girja ghor te, Sundor Dorja eneka kua dorja ekta te ghumai kene girja ghor te ahha jua kora manuh khan pora bikh mangibole rakhi dise. 3Peter aru John girja ghor te humai jua dekhi kene tar pora kiba ekta pabo nimite te hudise. 4Aru Peter pora tar logot te sidha saise aru John pora bhi eneka korise, aru koise, “Amikhan logot te sabi.” 5Aru eitu manuh pora dhyan kori kene tarkhan logot te saise, aru tarkhan pora kiba ekta pabo eneka akha kori saise. 6Kintu Peter pora koise, “Moi chandi aru sona nai, kintu moi logot ki ase eitu moi tumi ke dibo. Nazareth laga Jisu Khrista nam te uthibi aru khuj karhibi!” 7Aru tar pora tar laga daina haat te dhori kene uthai dise, aru loge loge tar laga theng aru hardi te tagot pai loise. 8Aru jap mari kene tar pora khara korise aru berabole shuru hoise, aru tarkhan logot te khuj karhi kene aru jap mari kene Isor ke dhanyabad di kene girja ghor bhitor te humai jaise. 9Aru tar pora Isor ke stuti kori kene berai jua tu manuh khan sob pora dekhise, 10aru Sundor Dorja te bohi kene bhik mange thaka manuh tu tar ase eneka manuh khan pora janise. Aru tar logot te ki hoise eitu dekhi kene asorit pora taikhan mon bhorta hoi thakise.

Peter Pora Kotha Kua

11Ketiya jonom pora lengera thaka manuh tu Peter aru John logot te jaise, manuh khan sob polai kene Solomon eneka kua jaga te jama korise. 12Aru ketiya Peter he eitu dekhise tar pora manuh khan ke koise: Israel manuh khan, eneka hua karne tumikhan kile asorit lagi ase, nahole amikhan nijor shakti pora aru morom kori kene tar ke berabole diya nisna, kile tumikhan pora amikhan logot te eneka asorit pora sai ase? 13Abraham laga Isor, Isaac laga Isor, Jacob laga Isor aru amikhan laga purush pitri laga Isor, pora Tar laga daas Jisu ke mahima korise, kon tumikhan pora morai dibole dise aru ketiya Pilate pora sharibole thakise tumikhan pora tar usor te tiyag korise. 14Kintu tumikhan pora Pobitro aru Dharmik Ekjon tu tiyag korise, aru manuh ke morai diya ekjon tu tumikhan karne mangi loise, 15aru tumikhan pora Jivon diya odhikar ke morai dise, Kon Isor he mora pora jinda kori dise. Eitu laga sakhi tu amikhan ase. 16Aru Tar laga nam te biswas kora karne, Tar laga nam te eitu manuh tagot paise, kon tumikhan pora dekhi ase aru jani ase, Jisu pora diya biswas pora tumikhan sob usor te eitu manuh ke bhall kori dise.

17“Aru bhai khan moi jane, tumikhan aru solaongta khan pora eitu nabuji kene korise. 18Kintu Isor he aage pora Tar laga bhavobadi khan mukh pora jani kene koise, Khrista tu kosto hobo lagibo, aru eitu kotha tu Tar pora hidho korise. 19Eitu nimite mon ghurai lobi, tetiya tumikhan laga paap tu khyama kori dibo, 20kilemane eneka atma notun kora homoi tu Prabhu pora he ahhibo, aru tumikhan karne basi kene rakha Khrista tumikhan ke pathai dibo, 21Tar shristi kora bostu sob tu notun kori kene nabona tak sorgot te thakibo, eitu kotha aage te Isor pora pobitro bhavobadi khan mukh pora koi dise. 22Kilemane Moses pora koise, ‘Prabhu Isor pora tumikhan laga bhai khan majot pora moi nisna bhavobadi ekjon uthai dibo. Tumikhan pora tar ki koi ase eitu sob tu hunibo lage. 23Aru eneka hobo, kon laga atma pora eitu bhavobadi ke nahune, eitu manuh tu zati majot pora khotom koridibo.’ 24Aru bhavobadi kiman jon pora kotha koise, Samuel pora loi kene kiman jon tar laga piche te ahhise, aji din laga kotha he koise. 25Tumi bhavobadi khan laga putro aru tumi laga purush pitri logot te Isor he vachan rakhi thaka nisna, Abraham logot te koise, ‘Aru tumi darai ula khandan pora prithibi sob laga porial ashish hobo.’ 26Isor pora, Tar laga nokor ke jinda uthai kene, tumikhan ke ashish dibole aru paap pora ghurai anibole, Tar he tumikhan logot te pahila pathai dise.”

Currently Selected:

PASONIR KORMO 3: NagaMe

Highlight

Copy