Rom 7

1భాయియో, ధరమ్ శాస్త్ర్ మాలమ్ ఛజకో తమాతీజ్ మ వాతే కర్రోంచుఁ కాఁయిఁ కతో, మన్క్యా బంచజత్రా దాడజ్ ధరమ్ శాస్త్ర్ ఓర్పర హకమ్ చలావచ కన్ తమేన మాలమ్ ఛేనిక?

2కూఁ కతో, ఓర్ ఘరేవాళో బంచన్ ర అత్రాదాడజ్ ధరమ్ శాస్త్రేర్వడీతి ఓర్ గోణ్ణీ ఓతీజ్ భళన్ రచ, పణ్ ఊ మర్జావతో ఓర్ ఘరేవాళేర్ వడీర్ ధరమ్ శాస్త్రేతి ఊ ఛూట్గారి పాలచ.

3జేతి ఘరేవాళో బంచన్ రజనా ఊ ఉజ్జేకేతీ భళన్ రతో, ఊ వడాళో కన్ కేరావ పణ్ ఓర్ ఘరేవాళో మర్జావతో ఊ ధరమ్ శాస్త్రేతి ఛుట్గార్ పాల్ది జేతి ఉజ్జేకేన వాయా కర్లతోయి సదా ఊ వడాళో కీదీజుఁ కేరాయెనీ.

4జేతి మార్ భాయియో, అపణ్ దేవేర్ సారూ ఫళ్ దాఁజూఁ మరన్ ఊటోజకో క్రీస్తు కజకో ఉజ్జేకేతి రేన తమ్ సదా ఓర్ జీవ్డార్ కార్ణే ధరమ్ శాస్త్రేర్ వడి మర్గేచో.

5కసేన కతోఅపణ్, జీవ్డార్, సంబంధీ వేన్ రాఁజనా, మోతేర్ కార్ణేర్ ఫళ్, ఫళేన, ధరమ్ శాస్త్రేర్ వడీతి ఆవజకో పాపేర్ కూంత్ అపణ్, జీవ్డార్ భాగేవుమా కామ్ కర్తే ర.

6అబ్బ అపణ్ కేర్వడీతి భందన్ రాఁకో, ఓర్ వడీ మర్గేజేర్నాఁయిఁ రేన్, ధరంశాస్త్రేతీ ఛూట్గారి పాల్దేంఛాఁ జేతి అపణ్ అక్షరేర్ వడీర్ జూనో హాలతేమా నరజూఁ, ఆత్మార్ వడీర్ నవీ వాటేమా చాల్తే సేవా కర్రెంచాఁ.

7హనూవతొ కాఁయిఁకీయా? ధరంశాస్త్రజ్ పాప్ కన్ కాఁ కాఁయిఁ? హనూ కేణోన. పాప కజకో కాఁయిఁ కో, ధరంశాస్త్రజ్ మన న సికాయొవతో పాప్ కజకో కసేకోకో మన మాలమ్ వేతోకోని. కసెనకతో, తూఁ ఆసా కర్మత్ కన్ ధరమ్ శాస్త్ర్ మన నకోవతో, ఖరాప్ ఆసకరేర్ కతో కాఁయిఁ కో మన మాలమ్ వేతో కొని.

8పణ్ పాప్ హకమేన ఆస్రో లేలేన్ సే తరీకార్ ఖరాప్ ఆశా మార్మా ఆవజూఁ కీదో, ధరమ్ శాస్త్ర్ నరజనా పాప్ మర్గో.

9మ సదా ఏక్ దాడేపర ధరమ్ శాస్త్ర్ నరజూఁ బంచ్రోతో పణ్ హకమ్ ఆయోజనా పాపేన ఫరన్ జీవ్ ఆయో; పణ్ మతో మర్గో.

10జనా జీవేర్ వడీర్ హకమ్ మన మోతేర్ కారణ్ వేన్ ఛజూఁ దకాయో.

11కసెనకతో, పాప్ హకమేన ఆధార్ కర్లేన్ మన ఢోకో కరన్ ఓతి మన మార్నాకో.

12జేతి ధరమ్ శాస్తర్ పవిత్తర్ ఛ. హకమ్ సదా పవిత్తరన్, నియతేతిన్, ఆచ్ వేన్ ఛ.

13హనువతో ఆచ్ ఛజకో మన మ్వోతేర్ కారణ్ వేగోక ? హనుకేర్ ఛేని. పణ్ పాప్ ఆచ్చేన ఆధార్ కర్లేన్ మన మ్వోత్ లాయొ. జేతి పాప్, పాపేర్నాఁయిఁ దకావజూఁ, కతో పాప్ హకమేన ఆస్రో లేలేన్ ఉజ్జీ జాదా పాప్ వజూఁ ఊ మన మోతేర్ కారణ్ వేగో,

14ధరమ్ శాస్తర్ ఆత్మారో సంబంధ్ కన్ అపణేన మాలమ్ ఛ; పణ్ మ పాపేన వక్జాన్, జీవ్డార్ సంబంధి వేన్ ఛూఁ.

15కసేన కతో మ కరుఁ జకో మనజ్ మాలమ్ వేనీ. మ కరూఁకన్ కేలూఁ జకో న కరూఁజూఁ, ద్వేష్ కరూఁజకోజ్ కర్రోంచుఁ.

16మ కరూనీ కన్ కేల్దోజకో మ కరూంజనా ధరమ్ శాస్త్ర్ ఆచజ్ కన్ మ ఓప్ లేరోంచుఁ

17జేతి అబ్బెతి ఓన కర్రోజకో మార్ మా ఛజకో పాపజ్ లపణ్ మ కొని.

18మార్మా కతో మార్ జీవ్డామా ఆచో కాఁయిఁజ్ ఛేని కన్ మన మాలమ్. కసెనకతో ఆచో కరుఁకన్ కజకో కూంత్ మార్ మాఁయిఁ రతోయీ, మ ఓన కర్ సక్రో కోని.

19మ కరుఁకన్ కేలుఁ జకో భలాయి నకరుఁజుఁ, మ కరూనీ కన్ కేలుఁ జకో బురాయి కర్రోంచుఁ.

20మ కరునీ కన్ కేలూఁ జకో మ కరుఁతో, ఓన కర్రోజకో మ కొని పణ్ మార్మా ఛజకో పాపజ్.

21పణ్ భాలాయి కరూఁకన్ కేలూఁ జకోమన కీడ్ కరేరోజ్ వేరోచ కన్ కజకో ఏక్ నియమ్ మన దకారోచ.

22మారోదల్ దేవేర్ ధరమ్ శాస్త్రేర్ కార్ణే ఖుషీ వేజారోచ పణ్.

23ఉజ్జేకో నియమ్ మార్ జీవ్డామా ఛజూఁమన దకారోచ, ఊ మార్ మనేమా ఛజకో ధరమ్ శాస్త్రేతి లడాయి మార్తో మార్ జీవ్డామా ఛజకోపాపేర్ నియమేర్ కార్ణే మన బంధీర్నాఁయిఁ హాప్టేమా కర్లేరోచ.

24బాపూరే మ కత్రా ఖరాబ్ ఆద్మీ? అసె మోతేర్ హాప్టేమా ఛజే జీవ్డా మాఁయిఁతి కూణ్ మన ఛోడావ?

25అప్ణో ప్రభూ ఛజకో యేసుక్రీస్తూర్వడీతి దేవేన ధన్యవాదన్ స్తుతీ కర్రోంచుఁ కసేన కతో, మనేర్వడీతి మ దేవేర్ నియమేనన్ జీవ్డార్వడీతి పాపేర్ నియమేన దాస్ వేన్ ఛూఁ.

Currently Selected:

Rom 7: Lambadi

Highlight

Copy

Compare