Rom 5

1అబ్బ విశ్వాసేర్ కార్ణే దేవేతీ అపణ్ నియత్దార్ కన్ కేరాలేన్ యేసు క్రీస్తూర్ వడీతీ దేవేతీ రాజీ వేన్ ఛాఁ.

2ఉజ్జీ ఊ అపణేన విశ్వాసేర్ కార్ణే దేవేర్ కృప మాఁయి లాయో. ఓమా అపణ్ అబ్బ బంచ్రేంచాఁ. దేవేర్ మహిమామా అపణేన హఁసొ మళచ కన్ భరోసేతీ అపణ్ ఖుషీ కర్రేచాఁ.

3అత్రాజ్ కోని; అపణ్, ఆప్తి సహనేన,

4సహన్, పర్చేనన్, పర్చో భరోసేన ఆవజూఁ కరచకన్, మాలమ్ కర్లేన్, భావేటీమా సదా ఆనంద్ కరాఁ.

5కసెనకతో ఈ భారోసో అప్ణేన లాజ్ పాయేదేని. దేవ్ అపణేన దీనోజే పవిత్తర్ ఆత్మాతీ అపణ్ దలేమా దేవేర్ ప్రేమ్ ఠలామేలోచ.

6కసెనకతో అపణ్ ఉజ్జీ కమ్ జోరివేన్ రాఁజనా, క్రీస్తు, ఛాజజే దాడూమా భక్తి ఛేని జేర్వాస మర్గో.

7కసేన కతో నియత్దారే వాస సదా కుణీ మర్ సకేని ఏకాద్వణా ఆచో ఆద్మీవాస కుణీ ఏక్ ఆద్మీ మరేన హిమ్మత్ కరన్ ఆంగ ఆయ కాఁయిఁ కొ.

8పణ్ దేవ్ అపణేపర ఓర్ ప్రేమేన దకాళ్రోచ. కూఁకతో, అపణ్ ఉజ్జీ పాపివేన్ రాఁజనా సదా, క్రీస్తు అపణ్ వాస మర్గో.

9జేతి ఓర్ లోయీర్ కార్ణే, అబ్బనీయత్ దారేర్నాఁయిఁ నేవో పాన్, ఉజ్జీ కత్రాయికో దేవేర్ రీసేతీ తపాలేన్ రక్షణ్ పావాంచాఁ.

10కసేన కతో, అపణ్ దేవేర్ దుష్మణేర్నాఁయిఁ రాఁ జనా సదా ఓర్ బెటార్ మోతేర్ కార్ణే అపణ్ దేవేతి సమాధానేతి రేన్ ఊ జీవన్ ఛజేతి తప్పనజూఁ రక్షణ్ పావాంచాఁ.

11అత్రాజ్ కోని, అప్ణో ప్రభూ ఛజకో యేసు క్రీస్తూర్ కార్ణే అపణ్ ఖుషీతి ఛాఁ. ఓర్ వడీతీజ్ అపణ్ ఆబ్బ సమాధాన్ పాల్దేంచాఁ.

12హన్ను రజనా, ఏక్ మన్క్యార్ కార్ణే పాపన్, పాపేర్ కార్ణే మోత్ జగేమా కూఁ ఆయోకో, హన్నూజ్ మన్క్యా సే పాప్ కీదే జేతి మోత్ సేర్ ఉంప్ర ఫ్యాల్గో.

13కసేనకతో. ధరమ్ శాస్తర్ ఆయొకొని జేర్ ఆంగజ్ జగేమా పాప్ ర. పణ్ ధరమ్ శాస్తర్ ఛేనిజనా కొయీ పాపేన లేకేమా లీదె కొని.

14పణ్ ఆదామేతీ సరూకరన్ మోషె లగు మ్వోత్ సేర్ ఉంపర్ ఆయి. ఆదామ్ కీదోజుఁ దేవేర్ వాత్ లంగన్ పాప్ కీదెకొని జేర్ ఉంపర్ సదా మ్వోత్ ఆయి. ఆదామ్ ఆవజేన ఏక్ నిశానేర్ నైఁ ర.

15పణ్ అప్రాధ్ ఆయోజూఁ కృపాదాన్ ఆయో కోని కూఁకతో, ఏకేర్ అప్రాధేర్ కార్ణే ఘణే మర్జావతో, దేవేర్ కృపాన్, యేసుక్రీస్త్ కజకో ఏక్ మన్క్యార్ కృరుపార్ వర్దాన్ సదా ఘణేన ఫ్యాల్గొచ.

16ఉజ్జీ పాప్ కీదోజకో ఏకేర్ కార్ణే సజా ఆయోజూఁ, ఊ వర్దాన్ మళో కోని కసేన కతో, నేవో ఏక్ అప్రాధేతి ఆయోజకో వేన్ సజా పాయేర్ కారణ్ వేగో; కృపార్ వర్దాన్ పణ్ ఘణే అప్రాధేర్ కార్ణేతి ఆయోజకో వేవ్ మన్క్యా నీయత్ దారేర్ ర్నాఁయిఁ నేవో పాయేన కారణ్ వేగో.

17మోత్ ఏకేర్ పాపేర్ కార్ణే ఆయోజకోవేన్ ఓ ఏకేర్వడీతీజ్, పాలణ్ కరతో, ఉజ్జీ జాదా కృపాన్ నీయతేర్ వర్దాన్ పావజకో జీవన్ రేన్ తప్పనజూఁ యేసు క్రీస్త్ కజకో ఏకేర్వడీతీజ్ పాలణ్ కరచ.

18జేతి నేవ్ ఏక్ అప్రాదేర్ కార్ణే ఆయోజకో వేన్, మన్క్యాన సేన సజా పావజూఁ కూఁ కారణ్ వేగోకో, హన్నూజ్ ఏక్ ధర్మేర్ కామేర్ వడీతి కృపార్ వర్దాన్ మన్క్యాన సేన జీవేర్ కార్ణేర్ నీయత్ పాయేర్ కారణ్ వేగో.

19ఏక్ ఆద్మీ హకమేన లంగో జేర్ కార్ణే వార్సేక్ జన్ కూఁ పాపి వేగేకో, హన్నూజ్, ఏక్ హకమేన మానో జేర్ కార్ణే ఘణ్ జన్ నీయత్దార్ వేజావచ.

20-21ధరమ్ శాస్తర్ ఆయొజేర్ కార్ణే పాప్ జాదవేగో. తోయి పణ్, పాప్ మోతేన ఆధార్ కర్లేన్ కూఁ పాలణ్ కీదోకో, హన్నూజ్ శాశ్వాత్ జీవ్ పాయేన నీయతేర్ కార్ణే కృపా అప్ణో ప్రభూ ఛజకో యేసు క్రీస్తూర్ వడీతి పాలణ్ కరెన పాప్ కత్త జాదా ఫ్యాలోకో ఒత్తజ్ కృపా ఉజ్జీ జాదా ఫ్యాల్గో.

Currently Selected:

Rom 5: Lambadi

Highlight

Copy

Compare