Numbers 20
20
1అగ్డీరొ మీనామా, ఇశ్రాయేలెవాళేఁవుర్ సారి మళావొ సీను కజకొ జంగలేమా ఆయెజనా, జన్, కాదేషూమా ఉత్రే. ఒత్త మిర్యామ్ మర్గిజేతి గత్భాంత్ కీదే.
2ఓ జనూన పాణి రకోని జేతి ఓ మోషేన్ అహరోనేర్ విరోధేమా గోళావేగే.
3జన్ మోషేతి ఝగ్డో కర్తే - బాపురే, హమార్ భాయి, యెహోవార్ సమ్నక్ మర్గేజనా హమ్ సదా మర్గేవాంతొ కత్రాయికొ ఆచ్చొవేతొ.
4పణ్ హమన్ హమార్ గావ్డి ఢోర్ అత్త మర్జాఁవాఁజుఁ, తమ్ యెహోవార్ జనూన ఏ జంగలేమా కస్నె లాయె?
5ఏ కామ్దేనిజకొ జాగేన లాయెన ఈజిప్టే మాఁయిఁతి హమేన కస్నె బలాలేన్ ఆయే? ఏ జాగేమా అనాజ్ ఛేని అంజూరేర్ ఫళ్ ఛేని, అంగూర్ ఛేని, దానిమ్మ ఛేని, పీయేన పాణి సదా ఛేని కన్ కే.
6జనా మోషేన్ అహరోన్ మళాయేర్ సమ్నకేతి మళావొ భళేర్ డేరార్ దర్వాజేర్ మాఁయిఁ జాన్, ఊంద్ పడేజనా, యెహోవార్ మహిమా ఉందూన దకాయెు.
7జనా యెహోవా మోషేన హన్ను హకమ్ దీనో.
8- తూఁ తార్ లక్డీన లేన్, తూన్, తార్ భాయి అహరోన్, ఏ మళాయేన గోళా కరన్, ఉందూర్ ఆంకీర్ ముణాంగ్, ఓ భాటాతి వాతెకర్, ఊ పాణి దచ. తూఁ ఉందూర్ సారు, భాటామాఁయితి పాణి ఆవజుఁ కరన్, మళాయెనన్, ఉందూర్ గావ్డి ఢోరేఁవున పీయేనద.
9యెహోవా ఓన హకమ్ దీనో జూఁ, మోషే ఓర్ సమ్నకేతి ఓ లక్డీన లేన్ డగర్గో.
10జేర్పచ్చ, మోషేన్ అహరోన్ ఓ భాటార్ సమ్నక్ మళాయేన గోళా కరన్, ఊ ఉందూతి, దుష్ట్ జనో, సామ్ళో. హమ్ ఏ భాటామాఁయితి తమార్ సారు పాణి ఆవజుఁ కరాఁక? కన్ కో.
11జేర్పచ్చ, మోషే ఓర్ హాత్ పాడన్, దీవణా ఓర్ లక్డీతి ఓ భాటాన మారొ జనా, చావత్రా పాణి ఆయెు. సారి సమాజన్ గావ్డి ఢోర్ పీదే.
12జనా యెహోవా, మోషేన్ అహరోనేతి, - తమ్ ఇశ్రాయేలేవాళేఁవుర్ ఆంకి ముణాంగ మార్ పవిత్తర్ పణేన మోట్పణ్ దజూఁ మార్పర విశ్వాస్ రకాడెకోని జేతి, ఏ జనూన మ ఉందూన దీనో జకో దేశేన తమ్ లేజా సకోని కన్ కో.
13ఊ మెరీబార్ (కతో ఝగ్డో) పాణికన్ కెరాయోచ కస్నెకతో ఇశ్రాయేలెవాళ్ యెహోవాతి ఝగ్డో కీదేజేతి, ఊ ఉందూర్ వచ్చ ఓన పవిత్తర్ కర్లీదో.
14మోషే కాదేషుమాఁయిఁతి ఎదోమ్ రాజేకన ఖబర్ కేవాళ్ ఆద్మీయూన మేలన్, - తార్ భాయి ఛజకో ఇశ్రాయేల్ కజకొ కాఁయిఁ కతో, - హమేన ఆయి జకొ సొగ్ళి భావేటీ తోన మాలమ్ వీయె.
15హమార్ బాప్ దాదా ఈజిప్టేన గే. హమ్ ఘణ్ వరస్ ఈజిప్టే మా రీదే. ఈజిప్టేవాళ్ హమేనన్, హమార్ బాప్ దాదాఁవున భావేటి పాడే.
16హమ్ యెహోవాన అర్జీకీదేజనా, ఊ హమార్ అర్జీన సామ్ళన్, సోజాన మేలన్, ఈజిప్టే మాఁయిఁతి హమేన బార లాయెు. ఇదేక్ హమ్ తార్ హద్దేర్ ఛేడాపర ఛజకొ కాదేశ్ కజకొ శారేమా ఛాఁ.
17హమేన తార్ దేశేన లంగన్ జాయెద. క్యారాఁవుఁమాఁయివేన్ క, అంగూరేర్ బాగేఁ మాఁయి వేన్ క జావాఁని. ఢాబేఁవుర్ పాణి పీయాఁని. రాజ్ బజార్ ఝల్లేన్ జావాంచాఁ. తార్ హద్ లంగన్ జాఁవాఁ జేలగు జమ్ణవతోయిక డాయెవడివతోయి ఫరాఁనజుఁ జావాంచాఁ కన్ కేన్ మేలో.
18ఎదోమె వాళ్, - తూఁ మార్ దేశేర్ మాఁయి వేన్ జాయేర్ ఛేని. మ తర్వారేతి తార్ సమ్నక్ ఆయుఁ దేకేస్ ఖబర్దాన్, కన్ ఓతి కో జనా.
19ఇశ్రాయేలెవాళ్ - హమ్ రాజ్ బజార్ ఝల్లేనజ్ జాఁవాఁచాఁ. మన్ మార్ గావ్డి ఢోర్ తార్ పాణి పీయాంతో, ఓర్ మోల్ దేదూంచుఁ. ఉజ్జి కాఁయిఁ కోని, వాట ఝల్లేన్ చాలనజ్ లంగన్ జాఁవుఁచుఁ అత్రాజ్ కన్ ఓతి కో జనా, ఊ, - తూఁ ఆయేరజ్ ఛేని కన్ కో.
20ఉజ్జి ఎదోమ్ ఘణ్ జనూంతీన్, మోటొ జోరేతి నిక్ళన్ ఉందూర్ సమ్నక్ ఆయెు.
21ఎదోమ్ ఇశ్రాయేలెవాళేన ఓర్ హద్దేర్ మాఁయవేన్ లంగన్ జాయెన హకమ్ దీనోకోని జేతి, ఇశ్రాయేలెవాళ్, ఓర్కనేతి బగ్లవేన్ డగర్గే.
22జనా ఇశ్రాయేలెవాళేర్ సారి సమాజ్ కాదేషు మాఁయితి నిక్ళన్, హోరు కజే గట్లాన ఆయే.
23యెహోవా, ఎదోమేర్ హద్దేకన ఛజకొ హోరు కజే గట్లామా, మోషేన్,అహరోనేవున హన్ను హకమ్ దీనో.
24- అహరోన్ ఓర్ బాప్ దాదాఁవుమా భళ్ జావచ. కస్నెకతో, మెరీబార్ పాణికన, మార్ వాత్ నమానజుఁ, మార్పర ఫర్పడే జేర్ కార్ణె, మ ఇశ్రాయేలెవాళేఁవున దీనొజకొ దేశేమా ఊ, జాయెని.
25తూఁ అహరోనేనన్, ఓర్ బేటా ఎలియాజరేన లేన్, హోరు కజకో గట్లా చడన్.
26అహరోనేర్ కప్డాకాడన్, ఓర్ బేటా ఛజకొ ఎలియేజరేన పెరా. అహరోన్ ఒత్త మర్జాన్, ఓర్ వడ్ బుడేమా భళాజావచ.
27యెహోవా హకమ్ దీనొజూఁ మోషే కీదో. సారి సమాజ్ దేక్తె రజనా, ఓ హోరు కజకొ గట్లా చడే.
28మోషే అహరోనేర్ కప్డా కాడన్, ఓరొ బేటా ఛజకొ ఎలియాజరేన పెరాయెు. అహరోన్ గట్లార్ ఫూంగెపర మర్గో. జేర్పచ్చ మోషేన్ ఎలియాజర్ ఊ గట్లా ఉత్రన్ ఆయే.
29అహరోన్ మర్గోకన్ సారి సమాజ్ మాలమ్ కర్లీదె జనా, ఇశ్రాయేలెవాళేర్ కట్మాళె వాళ్ సే, అహరోనెసారు తీస్ దాడ్ రోవాపీటి కీదే.
Currently Selected:
Numbers 20: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
