మార్కుర్ ఆచ్ ఖబర్ 6

1ఊ ఒత్తేతి నిక్ళన్ ఓర్ తన్నేర్ మల్కేన ఆయొ జనా ఓర్ చేలా ఓర్ లార గే.

2సబ్బాత్ దాడొ ఆయొజనా, ఊ దేవేర్ ఘరేమా బోధాకరేన సరూకీదో. ఘణ్ ఆద్మీ ఓర్ బోధా సామ్ళన్ ఆచామొ ఖాన్ – ఏవాతే, ఏన కత్తేతీ ఆయి? ఏన ఛజకో ఊ జ్ఞాన్ కసేకో ? ఈ ఓర్ హాతేతీ అస్ ఆచమ్కళార్ కామ్ కర్రోచ, ఈ కాఁయి?

3ఈ మరియార్ బేటా కొనిక? ఈ యాకోబ్, యోసే, యూదా, సీమోన్ కజేర్ భాయీ ఛజకో ఖాతి కొనిక? ఏర్ భాయి భేన్ సే అపణ్ ఢైఁ ఛ కొని కాఁయిఁ కన్ కేతే, ఓన లేకొ కీదెకొని.

4జేతి యేసు - ప్రవక్తా ఓర్ ఖాస్ గామేమా ఓర్ సెగాసేణూమాన్ ఓర్ ఘరేవాళూమా తపన్ ఉజీ కత్తిసదా మాన్ మలాజే బనా రేని కన్ కో.

5జేతి, థోడ్సేక్ రోగేవాళేర్ ఉంపర్ హాత్ మేలన్ ఉందేన ఆచో కీదో జకోజ్ తపన్ ఉజ్జి కుణ్సి ఆచమ్కళార్ కామ్ ఒత్త కర్సకోకొని. ఊ ఉందేర్మా విశ్వాస్ ఛేనిజకో దేకన్ అచామో ఖాదో.

6ఊ ఘేరన్ రజే గామూమా ఫర్తో బోధా కర్తో ర.

7ఊ బార చేలావున ఓర్ ఢైఁ బలాన్ ఉందేన దీ-దీన మేల్తో, భూత్డీయుఁర్ పర ఉందూన హకమ్ దేన్,

8–తమ్ రవాణా వేన్ జావో జనా హాతేర్ లక్డీ తపన్ బాటినక జాళ్కానక, కోత్లిమా పిసానక లేజావొ మత్.

9చేప్లూ పేర్లో, దీ ఝగ్లా పేరోమత్ కన్ ఉందేన హకమ్ దీనో.

10ఉజీ ఊ ఉందేన హనూకో - తమ్ కత్త ఏక్ ఘరేమా జావోచొకో తమ్ ఒత్తెతీ జావొజేలగు ఓజ్ ఘరేమా రో.

11కుణ్సీ జాగ జన్ తమేన ఢైఁ నకరజూఁ బలాన్ తమార్ వాతే నసామ్ళతో, తమ్ ఒత్తేతీ నిక్ళో జనా, ఉందేర్ ఉంపర్ గవాయార్ నైఁ తమార్ పగేర్ ధూడ్ ఝడ్కార్దో.

12జేతి ఓ నిక్ళన్, దల్ బద్లాలో కన్ ప్రకట్ కర్తే

13ఘణ్ భూత్డీయున డపేట్తే, తేల్ లగాడన్ వార్సేక్ రోగేవాళూన ఆచ్ కర్తే ర.

14ఓర్ నామ్ సేన మాలమ్ వేగో, జనా రాజ్ హేరోద్ ఓర్ వాత్ సామ్ళన్ – బాప్తిసమ్ దజకో యోహాన్ ఫేర్ బంచన్ ఆయొ, జేతి ఓర్ మాఁయి ఆచమ్కళార్ కామ్ దకారో కన్ కో.

15దూసర్ – ఈ ఏలీయాకనన్, ఉజ్జీ థోడ్సేక్ –ఈ ప్రవక్తా కనన్, పేనార్ ప్రవక్తఁవూర్ మాఁయిరో ఏకేర్ సరీకో ఛకన్ కేలేతేర.

16పణ్ హేరోద్ సామ్ళన్ –ఈ మ మాతో కటాయొ జకో యోహానజ్, ఊ మర్గేజేమాఁయిఁతీ ఉటోచ కన్ కో.

17హేరోద్ ఓర్ భాయి పిలిప్పూర్ బీర్ హేరోదియాన వాయా కర్లీదో జేతి యోహాన్ –తార్ భాయీర్ బీరేన లేలేర్ తోన ఆచో కోని కన్ హేరోదేన కో.

18జేతి ఊ ఓర్ సారు ఊ యోహానేన పక్డన్ జేలేమా భందాదీనో.

19హేరోదియ ఓర్ ఉంపర్ దుస్మణ్ ఘాలన్ ఓన మరానాకుఁ కన్ కూంతీ, పణ్ ఓర్ వంగాయికొని.

20కసెనకతో యోహాన్ నియత్దార్, పవిత్తర్ ఆద్మీ కన్ హేరోద్ మాలమ్ కర్లేన్, ఓతీ చమ్కన్ ఓన జతన్ కర్తో ఆయొ. ఫేర్ ఓర్ వాత్ సామ్ళోజనా, కాఁయిఁ కర్ణో కజకోయి మాలమ్ రకొనితోయి పణ్ ఖుషీతీ సామ్ళూ కీదో.

21పణ్ ఏక్ దాడొ ఆయో; కూఁకతో, హేరోద్ హుయొజకో దాడొ ఆయొజనా హేరోద్ ఓర్ ప్రధానియూన, సర్దారూన, గలిలయా మల్కేమా రజకో మోటే ఆద్మీయూన దావత్ కీదో.

22జనా, హేరోదియార్ బేటీ ఉందేర్ ముణాంగ ఆన్ నాచన్ హేరోదేన ఓతీ హారీమా బేటే జేన ఖుషీ కీదీ జేతి – రాజ్, తార్ ఖాతర్ ఆవజకో కాఁయితోయీ మన మాంగ్, మ తోన దుఁచుకన్ ఓ నాన్కీన కో.

23ఉజీ తూఁ మార్ రాజేమా అదొ రాజేలగు కాఁయిఁ మాంగస్తోయి, ఊ తోన ధూంచుఁ కన్ ఊ ఒతీ సోగన్ ఖాల్దో.

24జేతి, ఊ జాన్ మ కాఁయిఁ మాంగుఁ కన్ ఓర్ యాడీన పూచ్తేఖం, ఊ - బాప్తీసం దజకో యోహానేర్ మాతో మాంగ్ కన్ కీ.

25జన్నాజ్ ఊ జల్దీ రాజేర్ ఢైఁ ఆన్ బాప్తీసమ్ దజకో యోహానేర్ మాతో థాళీమా మేలన్ అబ్బజ్ మన దరాదేణో కన్ కూంత్రీంచుఁ కన్ కీ.

26రాజ్ అస్మాన్ దుఖ్ పాయొ పణ్ ఊ సోగన్ ఖాదొజే సోగనె జగు, ఓర్ సాత్ బేటే జేర్ సారు ఓన దూనీకన్ కేర్ వంగాయి కొని.

27జన్నాజ్ రాజ్ ఓర్ మాతో లాకన్ కేన్ హకమ్ దేన్ ఏక్ సిపాయీన మేలో. ఊ జాన్ జేలేమా ఓర్ మాతో కాటన్,

28థాళీమా ఓర్ మాతో మేలన్ లాన్ ఓ నాన్కీన దీనో, ఊ నాన్కి ఓర్ యాడిన దీనీ.

29యోహానేర్ చేలా ఈ వాత్ సామ్ళన్ ఆన్ మర్దాన పాల్డేజాన్ ఖాడేమా ఘాల్ దీనే.

30జనా, అపొస్తల్ యేసుకన గోళావేన్ ఆన్ ఓ కీదేజకో సేకామ్, ఓ కీదేజకో బోధాసే ఓన మాలమ్ కీదే.

31జనా ఊ - తమ్ జంగేలేర్ జాగేమా ఆన్, జఱ్ఱాక్ వళా ఆరామ్ కర్లో కన్ కొ; కసెనకతో ఘణ్ ఆద్మీ ఆరే జారే జేతి ఖొరాకి ఖాయేన సదా ఉందేన వేళా రకొని.

32జేతి ఓ దోని చడన్ జంగలేర్ జాగేన కుణీ ఛేనిజకో జాగ డగర్గే

33ఓ చలేజారే జనా, జన్ దేకన్ అస్మాన్ ఆద్మీ ఓన వళ్కన్ సే శారూతీ ఒత్త ధాఁసన్ ఉందేతీ ఆంగ డిగ్రీఆయె.

34జేతి యేసు ఆన్ ఓ ఘణ్ జనేర్ మళాయెన దేకన్ ఓ రక్వాళీ కరేవాళోఛేనిజకో గోర్లీర్నాఁయి ఛ కన్, ఉందేర్ ఉంపర్ దయాకరన్ ఉందేన అస్మాన్ వాతే బోధా కీదో.

35అస్మాన్ దాడొ డగర్ గో జేర పచ్చ, ఓర్ చేలా ఓర్ కన ఆన్ –ఈ జంగ్లేర్ మలక్, అబ్బ అస్మాన్ దాడొడగర్గో;

36అగల్ బగల్ గామూమా ఓ జాన్ ఖాయేన కాఁయిఁతొయీ మోల్ లేన ఉందేన మేల్ద కన్ కే,

37జేతి ఊ - తమ్ ఉందేన ఖొరాకి ఘాలోకన్ కేతేఖం ఓ - హమ్ జాన్ దీసే రూపేర్ రప్యార్ బాటీ మోల్ లేన్ ఉందేన ఘాలాఁకాఁయి కన్ ఓన పూచే.

38జేతి ఊ - తమార్ ఢైఁ కత్రీ బాటిఛకో, జాన్ దేకోకన్ ఉందేన కో. ఓ దేకన్ మాలమ్ కర్లేన్ -పాంచ్ బాటీ దీ మాచ్ళీ ఛ కన్ కే.

39జనా ఊ - ఖడేర్ ఉంపర్ సే హారీ హారీర్నాఁయి బేస్ణో కన్ ఉందేన హకమ్ దేతేఖమ్

40ఓ సొ ఆద్మీయూర్ ఏక్ హారీ పచాస్ ఆద్మీయూర్ ఏక్ హారీ హనూ బేటే.

41జనా ఊ ఓ పాంచ్ బాటిన దీ మాచ్ళీన ఝల్లేన్ ఆస్మానెసామ్ ఆంకీ ఊంచొకరన్ ఆశీజ్ దేన్ ఓ బాటీవూన తోడన్ ఉందేన ఘాలేన ఓర్ చేలావున దీనో జేర్పచ్చ ఓ దీ మాచ్ళీయున సేన వేంటే.

42ఓ సే ఖాన్ ధాప్గే జేర పచ్చ,

43బడ్గీ జకో మాచ్ళీ, బాటీర్ టొక్డా - బార ఓల్డా పాడే.

44ఓ బాటి ఖాదె జకో మాటీ పాంచ్ హజార్ జణా.

45ఊ సే జనూన మేల్దేన్ దోని చడన్ పర్లేవ్డీ రజకో బేత్సయిదా గామేన ఆంగ జావోకన్ ఊ ఓర్ చేలావున జోర్ బారీ కిదో.

46ఉందేన మేల్ దేన్ అరజ్ కరేన గట్లాపర్ గో.

47సాంజ్ పడ్గీ జనా, ఊ దోని సమ్దరేర్ వచ్చ ర, పణ్ యేసు ఏక్లో సమ్దరేర్ కనారే పర్ ర.

48జనా వాళ్ ఉందేర్ సమ్నక్ వేగీ, జేతి దోని చలాయెన ఓ ఘణో వేలాకర్రే జనా యేసు, ఊ దేకన్ కమ్ జాదా చార్ పోరేర్ రాతేమా సమ్దరేర్ ఉంపర్ చాల్తో ఉందేర్ ఢైఁ ఆన్, ఉందేన లంగన్ జావ్ణోకన్ కేల్దొ.

49ఊ సమ్దరేర్ ఉంపర్ చాల్రోజేన ఓ దేకన్ భూత్ కన్ కేలేన్, కల్కారి మారే.

50సే ఓన దేకన్ ఘబ్రావ్తేఖం, జన్నాజ్ యేసు ఉందేన వాతే కరాన్ –హిమ్మత్ లాలో మజ్. చమ్కో మత్ కన్ కో.

51పచ్చ ఊ దోని చడన్ ఉందేర్ ఢైఁ ఆయో జనా, వాళ్ థమ్గీ, జేతి ఓ ఉందేర్ ఓజ్ అస్మాన్ ఆచామో ఖాగె.

52పణ్ ఉందేర్ దల్ కఠీన్ వేగో జేతి ఓ బాటీర్ కార్ణేర్ వాత్ హర్దేలాలిదే కొని

53ఓ పర్లేవ్డీ జాన్ గెన్నేసరేతేర్ ఢైఁ కనారె ఉంపర్ ఆన్ దోనిన భాందీనె.

54ఓ దోని ఉతర్తేఖం జన్ ఓన వళక్లేన్

55అగల్ బగల్ ధాఁసన్ జాన్, ఊ ఛకన్ సామ్ళేజకో జాగేన, రోగీవున బాజేర్ ఉంపర్ పాల్డేన్ ఆయెన సరూకీదె.

56గామేమా శారేమా ఖేడీమా ఊ కత్త కత్త గోకో, ఒత్తేర్ జన్ రోగేవాళూన హాటేర్ బజారేమా రకాడన్ ఉందేన ఓర్ కప్డార్ కొస తోయ ఛీపెద కన్ ఓన నోరాకీదే. ఓన ఛీపేజకో సే ఆచ్ వేగే.

Currently Selected:

మార్కుర్ ఆచ్ ఖబర్ 6: Lambadi

Highlight

Copy

Compare