Micah 5
5
1పణ్ ఏ ఝూంటే ఝూంటేర్నాఁయిఁ గోళా వేవాళ్, ఝూంటేఁవుర్ నాఁయిఁ గోళావో. దుష్మణ్ అపణ్ శారేన ఘేర్లేరేచ. ఓ ఇశ్రాయేలేర్ నేవో కరేవాళొ హకమ్ దారేన, లక్డీతి గాలె పర మార్రేచ.
2బెత్లెహేమ్, ఎఫ్రాతా, యూదా వాళేఁవుర్ కట్మాళేఁవుమా తూఁ నాన్క్యాసొ గామ్ వేన్ రస్తోయి పణ్, మార్ సారు ఇశ్రాయేలెవాళేఁవున పాలణ్ కరేవాళొ తార్మాఁయిఁ తీజ్ ఆవచ. పేనార్ (పూర్వీర్) దాడూంతి లేన్, హర్ హమేషా ఊ దర్శణ్ దేతోర.
3(జేతి) జణేన ఛజకొ బీర్, ఛుచాబరేన జణజేలగు, ఊ ఉందూన హవాలకర్దచజనా, ఓర్ భాయియూఁమా బడన్ ఛజకొ సదా, ఇశ్రాయేలెవాళేఁవుర్ సాత్ భళన్ డిగ్రియావచ.
4ఊ హాూబ్రేన్, యెహోవార్ జోర్ పాన్, ఓర్ దేవ్ ఛజకొ యెహోవార్ నామేర్ మహిమార్వడీతి ఓర్ మందాన చరావచ. జేర్ కార్ణె ఓ టకన్ రచ. ధర్తీర్ చారి కోసా లగు ఊమోటొ వేన్ రచ.
5ఊ సమాధానేర్ కారణ్ వేన్ రచ. అష్షూర్ అపణ్ దేశేమా ధరస్ పడన్ అపణ్ శారేఁవుఁమా, ఆవజనా, ఓన హటాయెన, హమ్ సాత్ జణా గోర్లీ చరాయె వాళేఁవుఁనన్, ఆట్ జణా నాయెకేఁవున నియమ్ కరాంచాఁ.
6ఓ అష్షూర్ దేశేన, ఓర్ ఫాటకే లగూన్, నిమ్రోద్ దేశేన తర్వారేతి చరావచ. అష్షూరెవాళ్ అపణ్ దేశేమా ధర్సన్, అపణ్ ఆస్ పాస్ ఘేర్ల జనా, ఊ అప్ణేన హన్ను రక్వాళి కరచ.
7యాకోబేర్ సంతానేమా బడన్ ఛజకో, యెహోవా, పడజుఁ కరజకొ ఓసేర్నాఁయిఁన్, మన్క్యాతి కామ్ ఛేని జూఁన్, నరేఁవుర్ హోతేతి నరజుఁ ఖడేపర పడ జకొ పాణీర్ నాఁయిఁ దూసర్ జనూర్ వచ్చ రీయే.
8యాకోబేర్ వలాదెమాఁయిఁతి బడన్ రజకొ అన్య జనూర్ వచ్చన్, కత్రాయికొ జనూర్ వచ్చ. జంగలేర్ జీవ్రాసేమాఁయిర్ సింకోసేర్ నాఁయిఁన్, కుణీ ఛొడాసకే నిజుఁ మాఁయిఁ ధర్సన్, గోర్లీర్ మందాఁవున ఖూందన్, చీర్నాక జకొ బళేదార్ సింకోసేర్నాఁయిఁ రీయె.
9తార్ హాత్ తార్ విరోధియుఁ పర పాడన్ రీయే, తార్ దుష్మణ్ సే నాశ్ వేజాయె.
10ఓ దాడె పర మ తార్ మా, ఘోడ్ నరజుఁ పూరొ నాశ్ కర్దూంచుఁ. తార్ రథేఁవున నరజుఁ కర్నాకూంచుఁ.
11తార్ దేశేమా ఛజకొ శారేఁవున నాశ్ కర్దూంచుఁ, తార్ గడ్కీలేఁవున పటక్ దూంచుఁ. తార్మా మంతర్ తంతర్ కరేవాళ్ నరజుఁ నాశ్ కర్నాకూంచుఁ.
12వాదళేన దేకన్ మంత్రె కరేవాళ్ అబ తార్మారేని.
13తార్ హాతేతి కీదో జేన తూఁ న ధోకస్ జుఁ, ఛొలెజకొ మూరతేఁవుఁనన్, దేవతాఁవుర్ ఖంబావున తార్వచ్చ నరజుఁ నాష్ కర్నాకూంచుఁ.
14తార్వచ్చ దేవతాఁవుర్ ఖంబా నరజుఁ ఉందూన ఒకోడ్ణాకూంచుఁ. తార్ శారేఁవున పటక్ దూంచుఁ.
15మ ఘణో రీసేతి భరాన్, మార్ వాత్ సామ్ళేని జే జనూన బద్లీ ఫేళ్ళూంచుఁ. ఈజ్ యెహోవార్ వాత్.
Currently Selected:
Micah 5: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
