మత్తయీర్ ఆచ్ ఖబర్ 9

1ఓర్ పచ్చ ఊ దొని చడన్ సమ్దరేన లంగన్ ఓర్ శారేమా ఆయొ జనా

2ఇదేక్ పాక్తీ సుకారీజే రోగేతి పలంగే పర్ పడో జేన ఏకేన జన్ ఓర్ ఢైఁ లేన్ ఆయె. యేసు ఉందేర్ విశ్వాసేన దేకన్ - బేటా, హిమ్మతేతీ ర. తార్ పాప్ మాఫ్ వేగే కన్ పాక్తీ సుకారీ జేన కో.

3ఇదేక్ శాస్త్రీవూమా థోడ్సేక్ ఈ దేవేన దూషణ్ కర్రోచ కన్ ఉందేమా ఓ కేలేతేఖమ్

4యేసు ఉందేర్ సోంచ్ మాలమ్ కర్లేన్ తమ్ కసెన తమార్ దలేమా ఖరాప్ సోంచ్ కర్రేచొ ?

5తార్ పాప్ మాఫ్ వేగే కన్ కేరో ఆసాన్ క, ఊటన్ చాల్ కన్ కేరో ఆసాన్ ?

6పణ్ పాప్ మాఫ్ కరేన ధర్తీ ఉంపర్ ఆద్మీర్ బేటాన హక్ ఛ కన్ తమ్ మాలమ్ కర్లేణో కన్ కేన్ ఊ పాక్తి సుకారిజేన దేకన్ - తూఁ ఊటన్ తార్ పలంగ్ పాల్డేన్ తార్ ఘర డగర్-జో కన్ కేతేఖమ్

7ఊ ఊటన్ ఓర్ ఘరేన డగర్గో.

8జన్ ఊ దేకన్ చమ్కన్ ఆద్మీన అసో హక్ దీనోజే దేవేన మహిమా కీదే.

9యేసు ఒత్తెతీ జాతో పిసా వసూల్ కరేర్ జాగె కన బేటోజే మత్తయి కజె ఏక్ ఆద్మీన దేకన్ - మార్ లార ఆ కన్ ఓన కేతేఖం ఊ ఊటన్ ఓర్ లార డగర్ గో.

10ఘరేమా యేసు ఖొరాకి ఖాయేన బేటో జనా సుంకరియాన్ పాపీన్ ఘణే ఆన్ ఓర్ కన్నన్ ఓర్ చేలా కన బేటే.

11పరిసయులేవాళ్ ఊ దేకన్-తమార్ బోధాకరేవాళో సుంకరియాఁవుతీన్, పాపీఁవూతీ భళన్ కసెన ఖోరాకీ ఖారోచ కన్ ఓర్ చేలావున పూచే.

12యేసు ఊ వాత్ సామ్ళన్ - రోగేవాళూనజ్ పణ్ వారుఛజేన ఆచోకరే వాళేర్ జరూర్ ఛేని.

13మ పాపియూన బలాయెనజ్ ఆయొ పణ్ నియత్దారున బలాయెన ఆయొకొని. జేర్ వాస, మేరజ్ కూంత్రోచుఁ పణ్ భోకణేన కుంతూని కన్ కజకో వాతేర్ అరత్ కాఁయికో తమ్ జాన్ సీక్లో కన్ కో.

14జనా యోహానేర్ చేలా ఓర్ డైఁ ఆన్ - పరిసయులన్ హమ్ భూకే రేరేఁచాఁ పణ్ తార్ చేలా భూకే రేని; ఏర్ కారణ్ కాఁయిఁ కన్ ఓన పూచ్-తేఖమ్

15యేసు - వేత్డూ ఉందేర్ సాత రజనా, వాయార్ ఘరేవాళ్ దుఃఖేతి రచక? వేత్డూ ఉందేర్ ఢైఁతి జాయేర్ దాడ్ ఆవ జనా ఓ భూకేరచ

16కుణీ వతోయి జూన్ కప్డా ఊంపర్ నవొ టొక్డా జోడేని. జోడతో ఊ థీంక్ళీ టొక్డాన ఖ్యాంచ జేతి ఊ థింక్ళీ ఉజ్జీ జాదా ఫాటచ.

17ఉజ్జీ జూన్ తిత్తీమా నవో ఆంగూరేర్ రస్ ఘాలేని; ఘాలతో తిత్తీ చిరాన్ అంగూరేర్ రస్ రడ్జావచ, తిత్తీ ఖరాప్ వేజావచ. పణ్ నవో అంగూరేర్ రస్ నవీ తిత్తీ మా ఘాలచ జనా ఓదోయీ ఖరాప్ వేనిజుఁ రచ కన్ కో.

18ఊ ఏ వాతే ఉందేతీ కేతో రజనా ఏక్ హొదేదార్ ఆన్ ఓన ధోక్దేన్ - మార్ బేటీ అబ్బజ్ మర్గీ, పణ్ తుఁ ఆన్ తార్ హాత్ ఓర్ ఉంపర్ మేల్, ఊ బంచచ కన్ కో.

19యేసు ఊటన్ ఓర్ లార్ గో. ఓర్ చేలా సదా గే.

20ఓ వక్తేమా బార వర్సేర్ ప్యాడ్ చాల్రీ జకో ఏక్ బీర్ ఆన్.

21ఊ - మ ఓర్ కప్డా ఛీపూఁతో వారు వేజాఁవుచుఁ కన్ ఓర్ మనేమా కేలేన్ ఓర్ లార ఆన్ ఓర్ కప్డార్ కొస ఛీప్ లీదీ.

22యేసు ఫరన్ ఓన దేకన్ బేటి హిమ్మతేతీ ర. తార్ విశ్వాస్ తోన ఆచ్చో కీదో కన్ కేతేఖం, ఓ ఘడీమాజ్ ఊ బీర్ ఆచ్ వేగి.

23జేర్ పచ్చ యేసు ఊ హోదేదారేర్ ఘర ఆయొ. ఓత్త వాఁస్ళీ బోలాయెవాళూన ఆట్ కర్రేజే మళాయేన దేకన్

24జాగ్ దో; ఈ నాన్కి నీంద్ లేరీచ పణ్ మర్గీకొని కన్ ఉందేతీ కేతేఖమ్, ఓ ఓర్ ఠట్టాకీదె.

25పణ్ ఊ జనేర్ మళాయెన బార మేల్దేన్ మాఁయిఁ జాన్ ఓర్ హాత్ ఝల్తేఖమ్ ఊ నాన్కి ఉట్యాయి.

26ఈ వాత్ ఓ సారీ దేశేమా మాలమ్ వేగీ.

27యేసు ఒత్తేతీ జావ్తో రజనా దీ ఆందే ఓర్ లార ఆన్ - దావీదేర్ బేటా, హమార్ ఉంపర్ దయా రకాడ్ కన్ కల్కారి మారే.

28ఊ ఘరేమాయిఁ గోజనా, ఓ ఆందే ఓర్ కన ఆయె. యేసు - మ ఈ కర్సకూంచుఁ కన్ తమ్ విశ్వాస్ కర్రేచో క? కన్ ఉందేన పూచ్తేఖమ్.

29ఓ, విశ్వాస్ కర్రేంచాఁ ప్రభూ కన్ ఓన కే, జనా ఊ ఉందేర్ ఆంకీ ఛీపన్ తమార్ విశ్వాసేర్ నాఁయిఁ తమేన వేజాయకన్ కేతేఖమ్.

30ఉందేర్ ఆంకీ ఉగడ్గి. జనా యేసు - ఈ కేని మాలమ్ నవజుఁ దేక్లో కన్ ఉందేన జోరేతి హకమ్ దీనో

31పణ్ ఓ జాన్ ఊ సారీ మల్కేమా ఓర్ నామేన ప్రకట్ కీదె.

32యేసూన్ ఓర్ చేలా జావ్తే రజనా భూత్డీలాగీ జకో ఏక్ గూంగేన థోడ్సేక్ ఓర్ ఢైఁ లేన్ ఆయె.

33యేసు ఓ భూత్డీన డపేట్ దీనో జేర్ పచ్చ, ఊ గూంగో వాతే కర్తేఖమ్, జనూర్ మళావో అచామో ఖాన్ - ఇశ్రాయేలేమా హనూ కన్నాఁయిఁ దకాయో కొనికన్ కేల్దే.

34పణ్ పరిసయులేవాళ్ ఈ భూత్డీర్ హక్మీర్ జోరేతి భూత్డీవున డపేట్రోచ కన్ కే,

35యేసు ఉందేర్ దేవేర్ ఘరేమా బోధా కర్తో, రాజ్యేర్ ఆచ్ ఖబర్ ప్రచార్ కర్తో హర్యేక్ తరే తరేర్, రోగేన, హర్యేక్ తరే తరేర్ బీమారేన ఆచ్చో కర్తో సే శారేమాన్ గామూమా ఫరో.

36ఊ మళాయేన దేకన్ ఓ చరాయెవాళో ఛెనిజకో గొర్లి భూళీఖాన్ భడ్కన్, ఛజేర్ కార్ణే ఉందేర్ ఉంపర్ దయాకరన్.

37కాటేరో అస్మాన్ ఛ పణ్ కామ్ కరేవాళ్ కమ్ ఛ.

38జేర్ వాస ఓన కాటేన కామేవాళేన మేల్ కన్ ఓర్ మాలకేన నోరాకరో కన్ ఓర్ చేలావున కో.

Currently Selected:

మత్తయీర్ ఆచ్ ఖబర్ 9: Lambadi

Highlight

Copy

Compare