Exodus 37
37
1ఉజ్జి బెసలేల్, బొమోళీర్, లక్డీతి మందసమేన బణాయెు. ఊ లాంబేమా అడాయి హాత్, చోడేమా డోడ్ హాతన్, ఊంచో డోడ్ హాత్.
2మాఁయిఁన్ బార ఓన చొక్కమ్ సోనేర్ రేకేతి ఛపాన్, ఓర్ ఘేరన్ సోనేర్ గోట్ కీదో.
3ఓర్ సారు పర్గళాన్ ఉందాన్, చార్ సోనేర్ కోల్డావున బణాన్, ఏక్ బాజూన దీ కోల్డాన్, సమ్నకేర్ బాజు దీ కోల్డా రజుఁ, ఓర్ చారి టాంగేవుఁమా (కోడేవుఁమా) ఉందూన పోరోనాకో.
4ఉజ్జి ఊ, బొమోళీర్ లక్డీతి, పాడేరి లక్డీఁవున కరన్ ఉందూన సోనేర్ రేకేఁవుతి ఛపాన్.
5మందసమేన పాడేన ఓర్ పాక్తీఁవు పర ఛజకో కోల్డాఁవుమా ఓ పాడేరి లక్డీఁవున పొరోయెు.
6ఉజ్జి ఊ చొక్కమ్ సోనేతి కర్ణార్ పీడాన కీదో. ఊ అడాయి హాత్ లాంబోన్, డోడ్ హాత్ చోడోర.
7ఉజ్జి దీ సోనేర్ కెరూబేవున కీదో. కర్ణార్ పీడార్ దోయి కొసావున నక్షార్ కామేర్నాఁయిఁ కీదో.
8ఏకేక్ ఛేడా పర ఏక్ కెరూబన్, కర్ణార్ (మేరేర్) పీడాతి సాత్ ఎక్కజ్ లక్డీపర ఓర్ దోయి ఛేడావుఁ పర దీ కెరూబేవున బణాయెు.
9ఓ కెరూబేఁవుర్ పాంకె ఊంప్ర ఊ ఉప్డన్ రేన్, కర్ణార్ పీడార్ ఊంప్ర ఛాపన్ ర. కెరూబేఁవుర్ ముండా, ఏకేతి ఏక్ సాము సమ్నక్ ర. ఉందూర్ మూండా కర్ణార్ పీడా సామ్ ర.
10ఉజ్జి ఊ, బొమోళీర్ లక్డీతి, మేజ్ బణాయో, ఊ, దీహాత్ లాంబో, ఏక్ హాత్ చోడోన్, డోడ్ హాత్ ఊంచోర.
11ఊ ఓన చొక్కమ్ (ఆచో) సోనేర్ రేకేతి ఛాపన్, ఓర్ ఘేరన్ సోనేర్ గొటే (మోళ్డీ) బణాయెు.
12ఓర్ ఘేరన్, చార్ ఆంగ్ళే అత్రా పట్టీ బణాన్, ఓ పట్టీర్ ఊంప్రేతి ఘేరన్, సోనేర్ గోట్ (మోళ్డి) కీదో.
13ఓర్ సారు చార్ సోనేర్ కోల్డావున పర్గళాన్ కరన్, ఓర్ చారి టాంగేవున రజకో చారీ మూలామా ఓ కోల్డావున ఘాలో.
14మేజేన పాడేన, పాడేరి లక్డీమా రజకో ఓ కోల్డా, ఓర్ పట్టీర్ ఢఁయిసిర.
15మేజేన పాడేన బొమోళీర్ లక్డీతి పాడేరి లక్డీవుఁన తయార్ కరన్ ఉందూన సోనేర్ రేకేఁవుతి ఛపాయెు.
16ఉజ్జి ఊ మేజేపర రజకొ ఓర్ ఠామ్, కతో ఓర్ గంగ్నాళ్, ధూఁవాడిదేర్ ఠామ్ (విస్రా), ఓరి కటోరిన్, పీయేర్ అర్పణ్ దేన ఓర్ ఠామ్ చొక్కమ్ సోనేతి కీదో.
17ఊ, చొక్కమ్ సోనేతి, దీయేర్ ఝాడ్ (ఖంబ్) బణాయెు. ఓ దీయేర్ ఝాడేన, ఓర్ డాండినన్, ఓర్ డోళాన నక్షార్ కామేర్ నాఁయిఁ బణాయెు. ఓర్ కచోళీ, మెుగ్గా (డోడా) న్ ఫూల్ ఎక్కజ్ కడ్డీతి బణాయెు.
18దీయేర్ ఝాడేర్ దోయి బాజూతి తీన్ తీన్ డోళా, హన్ను ఓర్ పాక్తిమాఁయిఁతి ఛో డోళా బార నిక్ళన్ ర.
19ఏక్ డోళామా మెుగ్గా (డోడా) న్ ఫూల్ ఛజకో. బాదామేర్ సరీక్ తీన్ కచోళీ, దీమో డోళీ మా, మెుగ్గాన్ ఫూల్ ఛజకొ బాదామేర్ సరీక్ తీన్ కచోళీ; హన్ను దీయేర్ ఝాడె మాఁయిఁతి నిక్ళేజకో ఛోయి డోళాన ర.
20ఉజ్జి దీయేర్ ఝాడేమా ఓర్ డోడాన్, ఓర్ ఫూల్ ఛజకో బాదామేర్ రూపేమా రజకో చార్ కచోళి ర.
21దీయేర్ ఝాడె మాఁయిఁతి, నిక్ళజకో ఛో డోళాఁవుమ దీదీ డోళాఁవుర్ హేట ఎక్కజ్ కడ్డీ (డాండీ) తి ఛజకొ డోడా.
22ఉందూర్ మెుగ్గాన్, ఉందూర్ డోళా ఎక్కజ్ కడ్డీర్ టొక్డార్ వేన్ ర. ఊ సారి ఎక్కజ్ చొక్కమ్ సోనేర్ కడ్డీతి నక్షార్ కామేర్ నాఁయి బణాన్ కీదే.
23ఉజ్జి ఊ ఓర్ సాత్ దీవ్టీఁవునన్ (దీయేఁవునన్) కతణ్ణీనన్ కతణ్ణి మేలేర్ ఠామేన, చిమ్టాన చొక్కమ్ సోనేతి కీదో.
24కిలోచొక్కమ్ సోనేతి కీదో.
25ఉజ్జి ఊ బొమోళీర్ లక్డీతి ధూఁవాడీర్ పీడాన కీదో. ఊ ఏక్ హాత్ లాంబోన్ ఏక్ హాత్ చోడో. ఊ చారి చ్వాకూంట్ ఏకత్రాజ్ ర. ఓర్ ఊంచో దీ హాత్. ఓర్ సీంగ్ ఎక్కజ్ లక్డీతి బణాయెు.
26ఓన, కతో, ఓర్ ఛాపేన, ఓర్ చారిబాజునన్, ఓర్ సింగేఁవున చొక్కమ్ సోనేర్ రేకేఁవుతి ఛపాన్, ఓర్ ఘేరన్ సోనేర్ గోట్ కీదో.
27ఓర్ పాడేన పాడెర్ లక్డి సారు జాగ్ రజుఁ, ఓన దీకోల్డాన సోనేతికరన్, ఓర్ దోయి పాక్తీవుఁమాన్, ఓర్ దోయి మూలాఁవుఁమా, ఓర్ గోటేర్ హేటేసి ఉందూన కీదో.
28ఓర్ పాడేర్ లక్డీన బొమోళీర్ లక్డీతి కరన్, ఉందూన సోనేర్ రేకేఁవుతి ఛాపో.
29ఊ పవిత్తర్ ఛజకొ అభిషేకేర్ తేలేనన్, పర్మళ్ దజకొ చీజేన సువాసేర్ చీజే తయార్ కరే వాళేర్ హాత్ కరాయెు.
Currently Selected:
Exodus 37: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
