Mako 16

Okuyimbooka kwa Yesu

(Mat 28:1-8; Luk 24:1-12; Yok 20:1-10)

1Ekiro ekya Sabbiiti nikyaweireku, oMalyamu Magudaleena, oSaalume nʼoMalyamu oma wa Yakobo, ni bagula ebyabuwoowo, leke baabe basiige omulambo gwa Yesu. 2Emambya mambya ekiro ekikwekeera omu wiiki, eisana niryakawuluka, ni baaba oku mbi, 3nibakubuulyangana bati, “Naani eyatuyiringitirya eibbaale okulitoola oku mulyango gwa mbi?”

4Nibaimwire amaiso, ni babona ngʼeibbaale eryo eryali erikooto omuno nibaliyiringitirye okuzwa oku mulyango gwa mbi. 5Nibaingiire omu mbi, ni babona omusigazi aikaire oku rubaju olwa gulyo, nazwaire ekizwalibwa ekyeru, ni batiina.

6Omusigazi nʼabakoba ati, “Mutatiina. Mmaite mukutoolya Yesu oMunazaaleesi eyabambirwe oku musaalaba. Ani taliwo. Ayimbookere. Mubone, kini nikyo kifo webaali bamutaire. 7Mwabe mukobere abeegesebwa baamwe amwei nʼoPeetero nti, ‘Ayabire okubeekerayo e Galiraaya. Eyo nigyo mwamubonera nka niyabakobere.’#Mak 14:28 ”

8Awo ni bawuluka, ni bairuka okuliga oku mbi, nibakukankana era nga bawuniikiriire. Tibaakobeireku muntu gonze omwei, kubba baali bakutiina.

[Ebyawandiikibwe ebimwei ebyairai ebyekereire tebirina Mako 16:9-20]

OYesu akubonekera oMalyamu Magudaleena

(Mat 28:9-10; Yok 20:11-18)

9OYesu niyayimbookere ekiro ekikwekeera omu wiiki, ni yeekeera kubonekera Malyamu Magudaleena gweyaali napekereku emizumu musanju. 10OMalyamu oni nʼayaba nʼakobera abaabbanga nʼoYesu abaali bakukunga nʼokukungubaga. 11Baitu nibaawuliire nti oYesu ayimbookere, era nti oMalyamu Magudaleena amuboineku, ni bataikiriza.

OYesu akubonekera abeegesebwa ababiri

(Luk 24:13-35)

12Ebyo ni byaweire, oYesu nali omu ngeri egindi, nʼabonekera babiri oku beegesebwa nga bakwaba omu kyalo. 13Awo ni bairayo, ni bakobera abaira baabwe. Baitu bo ni bataikiriza.

OYesu akubonekera abeegesebwa baamwe eikumi nʼomwei

(Mat 28:16-20; Luk 24:36-49; Yok 20:19-23; Bik 1:6-8)

14Oluzwannyuma, oYesu nʼabonekera abeegesebwa baamwe eikumi nʼomwei, nibaikaire bakulya. Nʼabanenya olwa butaikiriza bwaabwe, nʼolwa bubbani bwa mitima gyabwe, kubba tibaikiriize bigambo byʼabo abeekereire okumubona namaare okuyimbooka.

15Era nʼabakoba ati, “Mwabe omu nsi zoona zoona, mubuulire abantu boona boona Amawuro Agasai. 16Buli aliikiriza nʼabatizibwa, alijunwa, baitu ataliikiriza omusango gulimusinga. 17Abaikiriza balikola ebyamaano bini omwibara ryange: balipeka emizumu oku bantu; balibaza omu ndimi, eziyaaka, 18ni balikwata enjoka, oba ni banywa ekintu kyona kyona ekiita, tibalibbaaku kabbi. Balikwata oku balwaire, ni batambwa.”

OYesu akutwalibwa omwiguru

(Luk 24:50-53; Bik 1:9-11)

19Awo oMukama oYesu niyamaare okubaza nabo, nʼatwalibwa omwiguru nʼaikaara oku rubaju olwa gulyo olwa Kanca. 20Awo abeegesebwa baamwe ni baaba ni babuulira woona woona Amawuro Agasai. OMukama nʼabbanga amwei nabo era nʼakakatyanga obukwenda bwabwe nakubakolesya ebyamaano.

Currently Selected:

Mako 16: RUULI-NYALA

Highlight

Copy