Matayo 8

OYesu akutamba omugenge

(Mak 1:40-45; Luk 5:12-16)

1OYesu niyaligire oku lusozi, ekibiina kyʼabantu ni kimusengeerya. 2Awo omugenge#8:2 Omugenge Niye muntu eyakabbanga nʼendwaire yoona yoona eya kikobba kya mubiri. nʼaiza gyali nʼakubba amajwi omu maiso gaamwe, nʼakoba ati, “Mukama, niwaabba osiimire, ntamba.” 3OYesu nʼagolola omukono nʼamukwataku, nʼakoba ati, “Nsiimire. Ale, wona.” Amangu ago ebigenge ni bimuwonaku. 4OYesu nʼamukoba ati, “Kini otakikoberaku muntu gonze omwei, baitu oyabe weerange ewa kabona oweeryeyo ekiwongwa nkʼoMusa niyalagiire, leke bakakatye nti owonere.”#Lev 14:2-32

OYesu akutamba omwiru wa oSencuriyo

(Luk 7:1-10)

5OYesu niyaingiire omu kibuga Kaperenawumu, osencuriyo#8:5 Osencuriyo Yaabbanga muduumiri wʼabasirikale kikumi omwiye ryʼaBarooma. nʼaiza gyali, nʼamwesengeerya nakukoba ati, 6“Sebo, omuweereza wange ali eka, obulwaire bumusarairye, akulumwa muno.” 7OYesu nʼamukoba ati, “Kannyize mmutambe.” 8OSencuriyo nʼairamu ati, “Sebo, tinsemeire, we okwingira omu nyumba yange, baitu bazambe kigambo, omuweereza wange yawona. 9Nanje ndi muntu mutwalibwa, era nga ndina abasirikale bentwala. Ninkoba oni nti, ‘Yaba,’ ayaba; nʼowondi nti, ‘Iza,’ aiza; nʼomwiru wange nti, ‘Kola kini,’ akikola.”

10OYesu niyawuliire ebyo, ni yeewuunya, nʼakoba abaali bakumusengeerya nti, “Kambakobere amananu, tinsangangaku muntu yeena yeena omwIsirairi alina okwikiriza nka kuni! 11Era kambakobere, baingi abaliriga e buwuluka nʼe bugwa, ni baikala oku bugenyi nʼoIbbulaimu, nʼoIsaaka nʼoYakobo omu bukama obwa mwiguru, 12baitu abo abaakububbairemu, ni bapekerwa enzai omu kiiruma, awalibba okukunga nʼokulumwa omuno.”#Mat 22:13; 25:30; Luk 13:28 13Awo oYesu nʼakoba osencuriyo oyo ati, “Yaba, kikukoorwe nka noikiriize.” Omuweereza wa oSencuriyo oyo nʼawona omu kaseera akombe.

OYesu akutamba abalwaire abaingi

(Mak 1:29-34; Luk 4:38-41)

14Awo oYesu nʼaingira omu nyumba ya Peetero. Niyaingiire nʼabona onyibyala wa Peetero nali oku kitabu, nakulumwa omusuja. 15Nʼamukwata oku mukono, omusuja ni gumuwonaku, nʼaimuka, nʼaweereza oYesu. 16Obwire nibwaikire akasweko, ni baleetera oYesu abantu abaingi abaaliku emizumu, nʼagibapekaku nakugiboigoora, era abaali abalwaire boona boona, nʼabatamba. 17Ekyo kyali kityo, omulangi oIsaaya kyeyabazire leke kiikiire, ekikukoba kiti, “Ye omwenyenere yatwaire obwongi bwaiswe, nʼaiyawo endwaire zaiswe.”#Isa 53:4

Abaakuli abasengeerya ba Yesu

(Luk 9:57-62)

18OYesu niyaboine ngʼabantu abamweruguliirye baingi, nʼalagira abeegesebwa baamwe ati, “Tusomoke twabe enseeri.” 19Awo omwegesya wʼamateeka omwei nʼaiza, nʼakoba oYesu ati, “Mwegesya, naakukusengeeryanga gyewaakwabanga woona woona.”

20OYesu nʼamukoba ati, “Ebbuwa zirina ebiina mwezibba, nʼebinyonyi birina ebinyumba. Baitu oMwana wa Muntu talina waakuwumuura.”

21Omuntu owondi, omwei oku beegesebwa baamwe, nʼamukoba ati, “Mukama, banza ondeke nnyabe nziike oite wange.”

22Baitu oYesu nʼamukoba ati, “Nsengeerya, leka abali nkʼabafu, baziike abafu baabwe.”

OYesu akugwagwania ompungo

(Mak 4:35-41; Luk 8:22-25)

23Awo oYesu nʼatemba obwato, abeegesebwa baamwe ni baaba naye. 24Amangu ago, ompungo owa maani nʼaimuka oku nyanja, ebinyege ni bisweka obwato, baitu oYesu nawungukire. 25Abeegesebwa baamwe ni baaba waali, ni bamususumula nibakukoba bati, “Mukama waiswe, tujune, tukulika!” 26OYesu nʼabakoba ati, “Kamutiinire? Okwikiriza kwanywe ka kudooli!” Nʼaimuka, nʼalagira ompungo nʼebinyege okugwagwana, enyanja nʼeteekera kimwei. 27Boona boona ni beewuunya, ni bakoba bati, “Oni muntu wa ngeri ki awurwa ompungo nʼebinyege?”

OYesu akutamba abasaiza ababiri abaaliku emizumu

(Mak 5:1-20; Luk 8:26-39)

28Awo oYesu niyaikire enseeri, omu nsi yʼaBagerasene,#8:28 ABagerasene Omu biwandiiko ebimwei beetebwa Bagadara. abantu babiri abaaliku emizumu, ni bamwitirana nibakuliga omu mbi.#8:28 Mbi Embi ezʼaBaisirairi zaabbanga mu mpuku. Abasaiza baali bandi muno, nga ndoowo muntu asobola okwakala omu muwanda ogwo. 29Ni bakokooma nibakukoba bati, “Okutujunaana ki, we oMwana wa Kanca? Oizire okutubonereza ekiseera ekyageerwe kitakaikire?”

30Waaliwo eigana rya mberege erikooto niryenagireku akabbanga okuliga webaali, nirikulya. 31Emizumu ni gyesengeerya oYesu giti, “Niwaabba okutupeka oku bantu bani tusindike omwigana rya mberege.”

32OYesu nʼagikoba ati, “Mwabe.” Ni gibaligaku, ni gingira omu mberege. Eigana ryona ryona ni rijumbutuka, ni riwanaisuka aiguru oku kasirimuko ka lusozi, ni ryenaga omu nyanja, emberege zoona zoona ni zifeera omu maizi. 33Abaali bakuziriisya ni bairuka, ni baaba omu kibuga, ni babaza ebibbairewo byona, nʼebikukwata oku badi abaabbaireku emizumu. 34Boona boona ni baliga omu kibuga okwitirana oYesu. Nibaamuboine, ni bamwesengeerya alige omu kitundu kyabwe.

Currently Selected:

Matayo 8: RUULI-NYALA

Highlight

Copy