Matayo 6

OYesu akwegesya oku kugabira abaseege

1OYesu ni yeeyongera nʼabakoba ati, “Mwerinde obutakooranga bikolwa byanywe ebisai omu maiso gʼabantu leke bababone, kubba nimukola mutyo, oIte waanywe ali omwiguru talibaweerya kasiimo.

2“Olwʼekyo, nogabiranga abaseege, tiweeyembeeranga nkʼabagobya nibakola omu makumbaaniro nʼomu myanda, abantu babaweerye ekitiinisya. Kambakobere amananu, akasiimo kaabwe bakafunire. 3Baitu nogabiranga abaseege, omukono gwamu ogumoso gulekenge okumanya ogulyo kyegukoore. 4Okugaba kwamu kubbenge kwa ibbise, obwo oIteewo abona ebikolebwa omwibbise alikuweerya akasiimo.”

OYesu akwegesya oku ngeri ya kusaba

(Luk 11:2-4)

5OYesu ni yeeyongera nʼabakoba ati, “Era nimubbanga mu kusaba, timubbanga nkʼabagobya, kubba bendya okusaba nibeemereire omu makumbaaniro nʼoku ntando wa myanda, abantu leke bababone. Kambakobere amananu, akasiimo kaabwe bamaare okukafuna. 6Baitu we nobbanga okusaba, oingiranga omu kisiika kyamu, nʼokingawo olwige, ale osabe oIteewo mwibbise. OIteewo oyo abona ebikolebwa omwibbise alikuweerya akasiimo.

7“Nimwabbanga mu kusaba, timubazanga bigambo bingi ebinyambula makulu nkʼabantu aba nsi nibakola, abalowooza nti baawurwa olwa bigambo byabwe ebingi. 8Muleke kubaisana kubba oIte waanywe amanya byemukwendya nimucaali na kumusaba.

9“Ale musabenge muti,

‘Ite waiswe ali omwiguru,

eibara ryamu riweebwenge ekitiinisya,

10obukama bwamu bwize.

Byʼokwendya bikolebwe omu nsi

nka nibikolebwa omwiguru.

11Otuweerye emere yaiswe eya leero.

12Otusaasire ebibbi byaiswe,

nka iswe nitusaasira abatukola okubbi.

13Otatuleka kwoyeerwa,#6:13 Kwoyeerwa Omu Luyonaani ekigambo kini kirina amakulu ga mirundi ebiri agandi kugezesebwa.

baitu otutaatire egiri omubbi.’#6:13 Ebyawandiikiibwe ebimwei byongeraku biti, kubba obukama, obuyinza nʼekitiinisya byamu ebiro nʼebiro. Amiina.

14“Nimwasaasiranga abantu ebibbi byabwe, oIte waanywe ali omwiguru naanywe yaakubasaasiranga. 15Baitu nimutaasaasirenge bantu, naanywe oIte waanywe tiyabasaasirenge bibbi byanywe.

OYesu akwegesya oku kusiiba

16“Nimusiibanga, timubbanga nkʼabagobya, abeenatira oku maiso. Bafoolafoola obusyo bwabwe, abantu leke bababone nti bakusiiba. Kambakobere amananu akasiimo kaabwe bamaare okukafuna. 17Baitu we nosiibanga, onaabanga obusyo, ni weesiisiriza amagita, 18abantu baleke kumanya nti osiibire, okwiyaku oIteewo ataboneka niye amanye. Era oIteewo oyo abona ebikolwa omwibbise alikuweerya akasiimo.”

Obuguuda omwiguru

(Luk 12:33-34)

19OYesu ni yeeyongera nʼakoba ati, “Timwebiikiranga buguuda ku nsi kuni kwe busiisirwa enyenje nʼobutalagi era nʼabaibbi gyebayenda ni baibba. 20Baitu mwebiikirenge obuguuda omwiguru, gyebutasiisirwa nyenje gonze obutalagi, era abaibbi gyebatayenda ni baibba. 21Kubba obuguuda bwamu gyebubba, nʼomutima gwamu nigyo gubba.”

Ekyengeezi kya mubiri

(Luk 11:34-36; Luk 16:13)

22OYesu ni yeeyongera nʼabakoba ati, “Eriiso niryo taala ya mubiri. Eriiso ryamu niribba eryomi, omubiri gwamu gwizula ekyengeezi. 23Baitu eriiso ryamu niritabba ryomi, omubiri gwamu gwona gwona gwizula ekiiruma. Ale ekyengeezi omu we nikibba ekiiruma, ekiiruma ekyo kibba kingi muno.

24“Ndoowo mwiru asobola okubba nʼabakama baamwe ababiri; akiri anoba omwei nʼayendya owondi, oba agumira okwomwei, nʼaleka owondi. Timusobola kubba bairu ba Kanca, era ni mubba abairu ba buguuda bwa nsi.”

Mwesige oKanca

(Luk 12:22-31)

25OYesu ni yeeyongera nʼabakoba ati, “Nikyo nkubakobera nti timutunturanga nimukwebuulya kyemwalya nʼekyemwanywa okukuuma obwomi bwanywe, gonze kyemwazwala. Obwomi ti bwa muwendo okusinga emere? Nʼomubiri ti gwa muwendo okusinga ebyakuzwala? 26Mubonere oku binyonyi: tibisiga, tibikungula era tibibiika, baitu oIte waanywe ali omwiguru abiweerya emere. Nywe timubikira muno? 27Naani oku nywe natuntura, asobola okwongera akaire gonze akadooli oku bulai bwa bwomi bwamwe?

28“Lwaki mutuntura olwa bizwalibwa? Muroleere amalanga; tigakola mulumo, gonze okutata engoye. 29Baitu nkubakoba nti gonze oSolomooni omu kitiinisya kyamwe kyona, tiyazwalanga nkʼerimwei oku go. 30OKanca niyaabba nimwo azwalikisya atyo ekisiko ekya mu ndumiro, ekibbaawo ekiro kyaleero, enceege ni kinagibwa omu muuro, nywete abanyakwikiriza okudooli talibazwalikisya okukirawo? 31Olwʼekyo timutunturanga nimukwebuulya nti, ‘Twalya ki?’ Oba nti, ‘Twanywa ki?’ Oba nti, ‘Twazwalaki ki?’ 32Ebyo byona byona nibyo abantu aba nsi byebeemaaraku. Nywe oIte waanywe owa mwiguru amaite nti ebyo byona byona mubyetaaga. 33Baitu mwekeerenge kwemaara ku kutoolya bukama bwamwe, nʼokukola ebya bwikiiri, ebyo byona byona biribaweebwa.

34“Olwʼekyo timutunturanga olwʼebyo ebyabbaawo emambya, ekiro ekya mambya kyabba nʼebizibu byakyo, kubba buli kiro kibba nʼebikukimala.”

Currently Selected:

Matayo 6: RUULI-NYALA

Highlight

Copy