Matayo 12
12
Eiteeka rya Sabbiiti
(Mak 2:23-28; Luk 6:1-5)
1Omu kaire ako, oYesu nʼayakala omu ndumiro za ngaano ekiro kya Sabbiiti. Abeegesebwa baamwe baali bakulumwa enzala, ni batandika okuwulula eŋaano, ni balya. 2ABafarisaayo abamwei nibaaboine ekyo, ni bakoba oYesu bati, “Bona, abeegesebwa baamu bakukola oku Sabbiiti ekitaikirizibwa omu mateeka ga Musa.”
3OYesu nʼabairamu ati, “Timusomangaku oDawudi kyeyakoore, ye nʼebeyaali nabo ni baalumirwe enzala? 4Yaingiire omu nyumba ya Kanca, ye nʼebeyaali nabo ni balya oku migaati egyali giwongerwe egiri oKanca, ekintu ekitaikirizibwa mu mateeka gaiswe okukola okutoolaku abakabona bonkai.#Lev 24:9; 1Sam 21:1-6 5Oba timusomangaku omu mateeka ga Musa nti #Kub 28:9,10; 1Mir 9:32oku Sabbiiti abakabona nibakukola emirimo gyabwe omwIramyo,#Kub 28:9-10 bayenda eiteeka rya Sabbiiti ni batabba na musango? 6Kambakobere, akusinga eIramyo ekitiinisya ngoni ani. 7Nimwakuli mumaite amakulu ga kyawandiikiibwe ekikoba kiti, ‘Ekisa nikyo nyendya baitu ti biwongwa,’#Kos 6:6 timwakunenyere abatalina musango, 8kubba OMwana wa Muntu niye Mukama wa Sabbiiti.”
OYesu akutamba omuntu owa mukono ogusaraire
(Mak 3:1-6; Luk 6:6-11)
9Awo oYesu nʼazwa omu kifo ekyo, nʼayaba omwikumbaaniro ryabwe. 10Omwikumbaaniro eryo mwalimu omusaiza owa mukono ogwasaraire era mwalimu nʼaBafarisaayo. Abo nibaali bakwendya okujunaana oYesu, ni bamubuulya bati, “Kiikirizibwa omu mateeka gaiswe okutamba oku Sabbiiti?”
11OYesu nʼabairamu ati, “Naani oku nywe ontaama waamwe nagwire omu kiina oku Sabbiiti, atamukwata nʼamwiyamu? 12Omuntu takira muno ontaama omuwendo? Olwʼekyo kiikirizibwa omu mateeka ga Musa okukola okusai oku Sabbiiti.”
13Awo nʼakoba omusaiza owa mukono ogwasaraire ati, “Golola omukono gwamu.” Nʼagugolola, ni gutambirwa kimwei, ni gubba nka gudi ogundi. 14Baitu aBafarisaayo ni baaba, ni bateesa nka nibaita oYesu.
Omuweereza wa Kanca
15OYesu niyeetejerye olukwe olwa kumwita, nʼazwa omu kifo ekyo era abantu baingi ni bamusengeerya. Nʼatamba abalwaire boona boona. 16Baitu nʼabakunkuniza obutamubazaku egiri omuntu yeena yeena, 17leke omulangi oIsaaya kyeyabazire kiikiire, ekikoba kiti,
18“Oni niye muweereza wange gwenkomerye,
gwenyendya era ansemeerya.
Ndimutaaku omwoyo wange,
nʼakobera amanga goona goona engeri gyaligalamula omu bwenganiza.
19Taliteera mpaka gonze okukokooma,
era taliimula iraka ryamwe mu nguudo.
20Ekibingo ekicwacwanuki talikitiica
gonze okulikirya enfuuzi,
baitu obwenganiza alyanga abwice oku businguli.
21Era amanga goona goona galisuubiriira omu ye.”#Isa 42:1-4
OYesu nʼoBbeeluzebbuli
(Mak 3:20-30; Luk 11:14-23)
22Ekiro kimwei ni bamuleetera omuntu aliku omuzumu, nga mwigali bʼamaiso era nga takubaza. OYesu nʼamutamba nʼalibbulya era nʼatandika nʼokubaza. 23Abantu boona boona ni beewuunya, ni bakukoba bati, “Oni ti niye Mwizukulu wa Dawudi?”
24Baitu aBafarisaayo ni baawuliire, ni bakoba bati, “Oni apeka emizumu oku bantu, nakukolesya maani ga Bbeeluzebbuli, omukulu waagyo.”
25OYesu niyeetejerye ebirowoozo byabwe, nʼabakoba nti, “Obukama bwona nibwetiicaamu ni bulwanangana, obukama obwo bugwa. Era ekibuga oba amaka, nibyetiicaamu byona bigwa. 26NʼoSetaani napeka oSetaani oku bantu, abba yeesareemu, nʼobukama bwamwe bubba tibwayemeerewo. 27Ale ninaabba mpeka emizumu ninkukolesya maani ga Bbeeluzebbuli, abeegesebwa baanywe bakolesya ga naani? Abo nibo baabba abalamuli baanywe. 28Baitu ninaabba nga emizumu ngipeka oku bantu ninkukolesya maani ga Mwoyo wa Kanca, kini kikumanyisya nti obukama bwa Kanca bwizire gyemuli.
29“Omuntu tayinza kwingira omu nyumba ya munyamaani nʼanyaga ebintu byamwe, ateekereire kumukwata nʼamubbwa ale nʼanyaga ebya mu nyumba yaamwe.
30“Oyo atabba ku lwange munyanzugu wange, nʼoyo atakumbaanirya amwei nanje, ararangya. 31Olwʼekyo nkubakoba nti abantu balisaasirwa buli kibbi nʼokuzuma oKanca. Baitu buli azuma oMwoyo Akwera, talisaasirwa. 32Era buli abaza ekigambo ekibbi oku Mwana wa Muntu, alisaasirwa. Baitu oyo abaza okubbi oku Mwoyo Akwera talisaasirwa emirembe nʼemirembe.”
Omusaale nʼebyana byagwo
(Luk 6:43-45)
33OYesu ni yeeyongera nʼabakoba ati, “Omusaale gumanyirwa ku byana byagwo; nigubba gusai ebyana byagwo bibba bisai, nigubba gubbi ebyana byagwo bibba bibbi. 34Nywe abaana ba fulugundu, musobola mutyai okubaza ebisai nga muli babbi? Kubba ebiizula omu mitima, omunwa nibyo gubaza. 35Omuntu omusai, aiya ku bisai ebiri omu mutima gwamwe okukola ebisai; nʼomuntu omubbi, aiya oku bibbi ebiri omu mutima gwamwe okukola ebibbi.
36“Baitu nkubakoba nti buli kigambo ekitalimu mugaso abantu kyebabaza, balikisoboora ekiro ekyakusaaraku emisango. 37Kubba oku bigambo byamu nikwo olisaarwa omusango nʼogusinga oba ni gukusaarwa okukusinga.”
ABafarisaayo bakusaba oYesu akabonero
(Mak 8:11-12; Luk 11:29-32)
38Awo abamwei oku beegesya bʼamateeka nʼaBafarisaayo ni bakoba bati oYesu, “Mwegesya, tukwendya okubona akabonero kokutuwa, okukakatya obuyinza bwamu.”
39OYesu nʼabairamu ati, “Abantu ba mulembe guni ababbi, abaazwire oku Kanca, basaba akabonero. Baitu ndoowo kabonero kakwiza kubaweebwa, okwiyaku akabonero ka Yona omulangi. 40Kubba nkʼoYona ni yabbaire omu nda ya ncwi ebiro ebisatu, obwire nʼemisana, nimwo kityo nʼoMwana wa Muntu alibba omwitakali ebiro bisatu, obwire nʼemisana.
41“Ekiro kya kusaaraku omusango abantu ba Nineeve baliimuka ni nʼalumiirya abantu ba mulembe guni omusango okubasinga. Kubba beenenyeze oYona niyababuuliire. Baitu ati bona, akukira oYona ali ani. 42OMukama omukali owa Sebba aliimuka ekiro kya kusala omusango nʼalumiirya abantu aba mulembe guni, kubba yaligire oku mpero ya nsi nʼaiza okuwuliirya ebigambo ebya magezi ebya Solomooni, ati akukira oSolomooni, aliwo ani, baitu timukumuwuliirya.”
Okwira kwa muzumu
(Luk 11:24-26)
43OYesu ni yeeyongera nʼabakoba ati, “Omuzumu niguliga oku muntu, gwaba awambula maizi nigukutoolya ekifo we gwawumuura nigutakibona. 44Nigutakibona gukoba, ‘Nairayo omu nyumba yange mwenazwire.’ Nigwira, gugisanga gyereere neyeyeibwe era neteekaniziibwe kusai. 45Obwo ni guleetana emizumu egindi musanju egikugusinga obubbi, ni gyaba ni gibba omwo. Embeera ya muntu oyo eya luzwannyuma ebba gibbi okukira eyeekereire. Nimwo kiribba kityo nʼoku bantu aba mulembe guni ogubbi.”
Abaganda ba Yesu nʼoma waamwe
(Mak 3:31-35; Luk 8:19-21)
46OYesu niyaali acaabaza nʼekibiina kyʼabantu, onyina nʼabagande ni baiza, ni beemeera enzai nibakwendya okubaza naye. 47Omuntu omwei nʼamukoba ati, “Omaawo nʼabagandaabo mbadi beemereire enzai, bakwendya okubaza naawe.” 48OYesu nʼamwiramu, “Oma wange niye naani era abaganda bange nibo banaani?” 49Nʼasolya oku beegesebwa baamwe nakukoba ati, “Oma wange nʼabaganda bange nibo bani. 50Buli akola Oite wange owa mwiguru byayendya niye abba muganda wange, omunyaanya wange nʼoma wange.”
Currently Selected:
Matayo 12: RUULI-NYALA
Highlight
Share
Copy
Want to have your highlights saved across all your devices? Sign up or sign in
Matayo 12
12
Eiteeka rya Sabbiiti
(Mak 2:23-28; Luk 6:1-5)
1Omu kaire ako, oYesu nʼayakala omu ndumiro za ngaano ekiro kya Sabbiiti. Abeegesebwa baamwe baali bakulumwa enzala, ni batandika okuwulula eŋaano, ni balya. 2ABafarisaayo abamwei nibaaboine ekyo, ni bakoba oYesu bati, “Bona, abeegesebwa baamu bakukola oku Sabbiiti ekitaikirizibwa omu mateeka ga Musa.”
3OYesu nʼabairamu ati, “Timusomangaku oDawudi kyeyakoore, ye nʼebeyaali nabo ni baalumirwe enzala? 4Yaingiire omu nyumba ya Kanca, ye nʼebeyaali nabo ni balya oku migaati egyali giwongerwe egiri oKanca, ekintu ekitaikirizibwa mu mateeka gaiswe okukola okutoolaku abakabona bonkai.#Lev 24:9; 1Sam 21:1-6 5Oba timusomangaku omu mateeka ga Musa nti #Kub 28:9,10; 1Mir 9:32oku Sabbiiti abakabona nibakukola emirimo gyabwe omwIramyo,#Kub 28:9-10 bayenda eiteeka rya Sabbiiti ni batabba na musango? 6Kambakobere, akusinga eIramyo ekitiinisya ngoni ani. 7Nimwakuli mumaite amakulu ga kyawandiikiibwe ekikoba kiti, ‘Ekisa nikyo nyendya baitu ti biwongwa,’#Kos 6:6 timwakunenyere abatalina musango, 8kubba OMwana wa Muntu niye Mukama wa Sabbiiti.”
OYesu akutamba omuntu owa mukono ogusaraire
(Mak 3:1-6; Luk 6:6-11)
9Awo oYesu nʼazwa omu kifo ekyo, nʼayaba omwikumbaaniro ryabwe. 10Omwikumbaaniro eryo mwalimu omusaiza owa mukono ogwasaraire era mwalimu nʼaBafarisaayo. Abo nibaali bakwendya okujunaana oYesu, ni bamubuulya bati, “Kiikirizibwa omu mateeka gaiswe okutamba oku Sabbiiti?”
11OYesu nʼabairamu ati, “Naani oku nywe ontaama waamwe nagwire omu kiina oku Sabbiiti, atamukwata nʼamwiyamu? 12Omuntu takira muno ontaama omuwendo? Olwʼekyo kiikirizibwa omu mateeka ga Musa okukola okusai oku Sabbiiti.”
13Awo nʼakoba omusaiza owa mukono ogwasaraire ati, “Golola omukono gwamu.” Nʼagugolola, ni gutambirwa kimwei, ni gubba nka gudi ogundi. 14Baitu aBafarisaayo ni baaba, ni bateesa nka nibaita oYesu.
Omuweereza wa Kanca
15OYesu niyeetejerye olukwe olwa kumwita, nʼazwa omu kifo ekyo era abantu baingi ni bamusengeerya. Nʼatamba abalwaire boona boona. 16Baitu nʼabakunkuniza obutamubazaku egiri omuntu yeena yeena, 17leke omulangi oIsaaya kyeyabazire kiikiire, ekikoba kiti,
18“Oni niye muweereza wange gwenkomerye,
gwenyendya era ansemeerya.
Ndimutaaku omwoyo wange,
nʼakobera amanga goona goona engeri gyaligalamula omu bwenganiza.
19Taliteera mpaka gonze okukokooma,
era taliimula iraka ryamwe mu nguudo.
20Ekibingo ekicwacwanuki talikitiica
gonze okulikirya enfuuzi,
baitu obwenganiza alyanga abwice oku businguli.
21Era amanga goona goona galisuubiriira omu ye.”#Isa 42:1-4
OYesu nʼoBbeeluzebbuli
(Mak 3:20-30; Luk 11:14-23)
22Ekiro kimwei ni bamuleetera omuntu aliku omuzumu, nga mwigali bʼamaiso era nga takubaza. OYesu nʼamutamba nʼalibbulya era nʼatandika nʼokubaza. 23Abantu boona boona ni beewuunya, ni bakukoba bati, “Oni ti niye Mwizukulu wa Dawudi?”
24Baitu aBafarisaayo ni baawuliire, ni bakoba bati, “Oni apeka emizumu oku bantu, nakukolesya maani ga Bbeeluzebbuli, omukulu waagyo.”
25OYesu niyeetejerye ebirowoozo byabwe, nʼabakoba nti, “Obukama bwona nibwetiicaamu ni bulwanangana, obukama obwo bugwa. Era ekibuga oba amaka, nibyetiicaamu byona bigwa. 26NʼoSetaani napeka oSetaani oku bantu, abba yeesareemu, nʼobukama bwamwe bubba tibwayemeerewo. 27Ale ninaabba mpeka emizumu ninkukolesya maani ga Bbeeluzebbuli, abeegesebwa baanywe bakolesya ga naani? Abo nibo baabba abalamuli baanywe. 28Baitu ninaabba nga emizumu ngipeka oku bantu ninkukolesya maani ga Mwoyo wa Kanca, kini kikumanyisya nti obukama bwa Kanca bwizire gyemuli.
29“Omuntu tayinza kwingira omu nyumba ya munyamaani nʼanyaga ebintu byamwe, ateekereire kumukwata nʼamubbwa ale nʼanyaga ebya mu nyumba yaamwe.
30“Oyo atabba ku lwange munyanzugu wange, nʼoyo atakumbaanirya amwei nanje, ararangya. 31Olwʼekyo nkubakoba nti abantu balisaasirwa buli kibbi nʼokuzuma oKanca. Baitu buli azuma oMwoyo Akwera, talisaasirwa. 32Era buli abaza ekigambo ekibbi oku Mwana wa Muntu, alisaasirwa. Baitu oyo abaza okubbi oku Mwoyo Akwera talisaasirwa emirembe nʼemirembe.”
Omusaale nʼebyana byagwo
(Luk 6:43-45)
33OYesu ni yeeyongera nʼabakoba ati, “Omusaale gumanyirwa ku byana byagwo; nigubba gusai ebyana byagwo bibba bisai, nigubba gubbi ebyana byagwo bibba bibbi. 34Nywe abaana ba fulugundu, musobola mutyai okubaza ebisai nga muli babbi? Kubba ebiizula omu mitima, omunwa nibyo gubaza. 35Omuntu omusai, aiya ku bisai ebiri omu mutima gwamwe okukola ebisai; nʼomuntu omubbi, aiya oku bibbi ebiri omu mutima gwamwe okukola ebibbi.
36“Baitu nkubakoba nti buli kigambo ekitalimu mugaso abantu kyebabaza, balikisoboora ekiro ekyakusaaraku emisango. 37Kubba oku bigambo byamu nikwo olisaarwa omusango nʼogusinga oba ni gukusaarwa okukusinga.”
ABafarisaayo bakusaba oYesu akabonero
(Mak 8:11-12; Luk 11:29-32)
38Awo abamwei oku beegesya bʼamateeka nʼaBafarisaayo ni bakoba bati oYesu, “Mwegesya, tukwendya okubona akabonero kokutuwa, okukakatya obuyinza bwamu.”
39OYesu nʼabairamu ati, “Abantu ba mulembe guni ababbi, abaazwire oku Kanca, basaba akabonero. Baitu ndoowo kabonero kakwiza kubaweebwa, okwiyaku akabonero ka Yona omulangi. 40Kubba nkʼoYona ni yabbaire omu nda ya ncwi ebiro ebisatu, obwire nʼemisana, nimwo kityo nʼoMwana wa Muntu alibba omwitakali ebiro bisatu, obwire nʼemisana.
41“Ekiro kya kusaaraku omusango abantu ba Nineeve baliimuka ni nʼalumiirya abantu ba mulembe guni omusango okubasinga. Kubba beenenyeze oYona niyababuuliire. Baitu ati bona, akukira oYona ali ani. 42OMukama omukali owa Sebba aliimuka ekiro kya kusala omusango nʼalumiirya abantu aba mulembe guni, kubba yaligire oku mpero ya nsi nʼaiza okuwuliirya ebigambo ebya magezi ebya Solomooni, ati akukira oSolomooni, aliwo ani, baitu timukumuwuliirya.”
Okwira kwa muzumu
(Luk 11:24-26)
43OYesu ni yeeyongera nʼabakoba ati, “Omuzumu niguliga oku muntu, gwaba awambula maizi nigukutoolya ekifo we gwawumuura nigutakibona. 44Nigutakibona gukoba, ‘Nairayo omu nyumba yange mwenazwire.’ Nigwira, gugisanga gyereere neyeyeibwe era neteekaniziibwe kusai. 45Obwo ni guleetana emizumu egindi musanju egikugusinga obubbi, ni gyaba ni gibba omwo. Embeera ya muntu oyo eya luzwannyuma ebba gibbi okukira eyeekereire. Nimwo kiribba kityo nʼoku bantu aba mulembe guni ogubbi.”
Abaganda ba Yesu nʼoma waamwe
(Mak 3:31-35; Luk 8:19-21)
46OYesu niyaali acaabaza nʼekibiina kyʼabantu, onyina nʼabagande ni baiza, ni beemeera enzai nibakwendya okubaza naye. 47Omuntu omwei nʼamukoba ati, “Omaawo nʼabagandaabo mbadi beemereire enzai, bakwendya okubaza naawe.” 48OYesu nʼamwiramu, “Oma wange niye naani era abaganda bange nibo banaani?” 49Nʼasolya oku beegesebwa baamwe nakukoba ati, “Oma wange nʼabaganda bange nibo bani. 50Buli akola Oite wange owa mwiguru byayendya niye abba muganda wange, omunyaanya wange nʼoma wange.”
Currently Selected:
:
Highlight
Share
Copy
Want to have your highlights saved across all your devices? Sign up or sign in