Matayo 10

OYesu akukomya abakwenda eikumi nʼababiri

(Mak 3:13-19; Luk 6:12-16)

1Awo oYesu nʼayeta abeegesebwa baamwe eikumi nʼababiri, ni baiza waali nʼabaweerya obuyinza okupeka emizumu oku bantu, nʼokutambanga abantu endwaire zoona nʼobwongi bwona. 2Amabara gʼabakwenda eikumi nʼababiri nigo gani: akwekeera Simooni ayetebwa oPeetero ale nʼAndereya omugande, oYakobo nʼomugande oYokaana abataani ba Zebbedaayo; 3oFiripo, oBatulumaayo, oTomasi, oMatayo omusoroorya wa musolo, oYakobo omutaani wʼAlufaayo; oTadaayo, 4oSimooni omulwaniiri wa iyanga ryamwe,#10:4 Omu Luyonaani oku ibara oSimooni bongeraku Omuzerote. nʼoYuda Isikariyooti eyaliiraine oYesu.

OYesu akutuma abeegesebwa baamwe eikumi nʼababiri

(Mak 6:7-13; Luk 9:1-6)

5Eikumi nʼababiri abo oYesu nʼabatuma, nakubakoba ati, “Mutayaba mu banyamanga, era mutaingira mu bibuga byʼaBasamaliya. 6Baitu mwabe egiri abantu ba Isirairi abaabuure. 7Mwabe mubuulire abantu nti, ‘Obukama obwa mwiguru bwigereire,’ 8Mutambe abalwaire, muyimboole abafu, mutambe abagenge#10:8 Abagenge Baabbanga balwaire ba ndwaire eza kikobba kya mubiri. basoborokoke, mupeke emizumu oku bantu. Mwagabiirwembe naanywe mugabembe. 9Mutatwala zaabbu, gonze efeeza, gonze esente eza kikomo omu nsawu zaanywe, 10gonze ensawu, gonze ekizwalibwa ekyakabiri, gonze enkaito, gonze omwigo; kubba omukoli asaanira okuweebwa byakwetaaga.

11“Buli kibuga na buli kyalo byemwakwingirangamu, mutoolye omuntu eyasiima okubatangiira, mubbe e waamwe okwica nimuliriga omu kifo ekyo. 12Nimwingiranga omu nyumba, mukobenge muti, ‘Emirembe gibbe nʼabantu aba mu nyumba gini.’ 13Abantu ba mu nyumba eyo nibaakubatangiiranga, emirembe gyemubasabiire gyakusigalanga na bo. Baitu nibataabatangiirenge, emirembe gyemubasabiire gyakwiranga egyemuli. 14Nibaakugaananga okubatangiira omu nyumba oba omu kibuga oba okubawuliirya, nimwakubbanga mukuligayo, mwekubbaigulyengeku nʼocuucu abba nabakwaite oku magulu.#10:14 Kani kaali kabonero kʼaBayudaaya akaakolebwanga okulanga nti bayenderewo enkolagana nʼabantu abo. 15Kambakobere amananu, ekiro ekya kusaaraku emisango, oSodoma nʼoGomora birikwatirwa ekisa okukira ekibuga ekyo.”

Okwasayasanizibwa okukwaba okwiza

(Mak 13:9-13; Luk 21:12-17)

16OYesu ni yeeyongera nʼabakoba ati, “Mwetegereze; nkubatuma nga muli nkʼentaama akati omu bibbwene. Olwʼekyo mubbe beetegeerya nkʼenjoka, era mubbe baculeeri nkʼenkaiba. 17Mwerinde, kubba waalibbaawo abantu abalibakwata ni babaweeryayo omu mbuga zʼamateeka ni babakubbira omu makumbaaniro gaabwe. 18Oku lwange mulitwalibwa omu maiso gʼabaami nʼagʼabakama okwewozaku; ale bo nʼabanyamanga nywe mubaiceeku Amawuro Agasai. 19Baitu nibabakwatanga ni babaweeryayo, timutunturanga nimukwebuulya nti, ‘Twabaza ki?’ Oba nti, ‘Twabaza tutyai?’ Muliweebwa omu kaseera ako, kyemulibaza, 20kubba tiniinywe mulibaza, baitu oMwoyo wa Ite waanywe niye alibazira omu nywe.

21“Omuntu aliweeryayo omuganda waamwe okwitibwa, nʼoite wa mwana aliweeryayo omwana waamwe. Abaana balijeemera ababyaire baabwe, ni babaweeryayo okwitibwa. 22Nywe, abantu boona boona balibanoba kubba muli basengeerya bange. Baitu oyo aliguma okwica oku mpero, alijunwa. 23Nibabaasayasanianga omu kibuga ekimwei, mwirukiranga omu kindi. Kambakobere amananu, timulimalayo bibuga bya Isirairi oMwana wa Muntu atakaizire.

24“Akwegesebwa takira akumwegesya, nʼomwiru takira mukama waamwe. 25Akwegesebwa kikumumala okubba nkʼomwegesya waamwe, nʼomwiru okubba nkʼomukama waamwe. Oba ngʼoisemaka bamwetere Bbeeluzebbuli,#10:25 Bbeeluzebbuli Rini ibara erindi erya Setaani. aba mweka yaamwe kiki kyebatalibeeta!”

Oyo ateekwa okutiinibwa

(Luk 12:2-7)

26OYesu ni yeeyongera okwegesya ati, “Olwʼekyo timutiinanga abo ababatunturya, kubba buli kintu ekibbisirwe kirikwekulwa, era buli kyama kirimanyibwa omu lwatu. 27Kyenkubakobera omu kiiruma, mukibazanga mwiyangwe. Kyemuwuranga omu kaweewe, mukirangiiranga oku nkanga zʼamanyumba. 28Era timutiinanga abo abaita omubiri, nga tibasobola kwita mwoyo. Baitu mutiinenge Kanca asobola okuzica omwoyo nʼomubiri omu muuro ogutalikira. 29Enyomyalubuga eibiri zigula erupiiya emwei; baitu ndoowo gonze omwei oku zo agwa okwitakali oIte waanywe atamaite. 30Era naanywe eisoke erya ku mitwe gyanywe ryona ryona ribale. 31Olwʼekyo mutatiina; muli ba muwendo okukira enyomyalubuga ezingi.”

Okwatula nʼokwegaana oYesu

(Luk 12:8-9)

32OYesu ni yeeyongera nʼabakoba ati, “Buli anyatuuranga omu maiso gʼabantu, nanje ndimwatuura omu maiso ga Ite wange ali omwiguru. 33Baitu oyo aneegaana omu maiso gʼabantu, nanje ndimwegaana omu maiso ga Ite wange ali omwiguru.”

Ti mirembe baitu mpirima

(Luk 12:51-53; 14:26-27)

34OYesu ni yeeyongera nʼabakoba ati, “Mutalowooza nti naizire kuleeta mirembe oku nsi. Tinaizire kuleeta mirembe, naizire kuleeta mpirima. 35Naizire ‘okwawukania omwana nʼoite waamwe, omwara nʼonyina, omweiryana nʼonyibyala waamwe. 36Era abazugu ba muntu baakubbanga ba mu nyumba yaamwe.’#Mik 7:6 37Ayendya oite waamwe oba onyina okukira nayendya nje, tasemeire kubba mwegesebwa wange. Era ayendya omutaani waamwe oba omwara okukira nayendya nje, tasemeire kubba mwegesebwa wange. 38Nʼoyo ateetiika musaalaba gwamwe nʼansengeerya, yeena tasemeire kubba mwegesebwa wange. 39Buli ataatira obwomi bwamwe, alibufeerwa. Baitu buli alibufeerwa oku lwange, alibulamya.”

Okuweebwa empeera

(Mak 9:41)

40OYesu ni yeeyongera nʼabakoba ati, “Atangiira nywe abba atangiriire ninje, ate atangiira nje, abba atangiriire oyo eyantumire. 41Atangiira omulangi olwakubba omulangi, alifuna empeera nkʼeya mulangi. Era atangiira omwikiiri, kubba mwikiiri, alifuna empeera nkʼeya mwikiiri. 42Kambakobere mananu; buli muntu aweerya omwei oku bani abagayibwa olutayo lwa twizi otukufuka okunywa, olwa kubba mwegesebwa wange, mananu alifuna empeera yaamwe.”

Currently Selected:

Matayo 10: RUULI-NYALA

Highlight

Copy