Bikolwa Enyanjula
Enyanjula
Ekitabo kya Bikolwa byʼaBakwenda kirimu ebigambo ebitukobera entandikwa ya kanisa nʼengeri gyeyasaasainemu okuliga e Yerusaalemu nʼeika omu Buyudaaya, omu Samaliya nʼokweyongerayo, nkʼoYesumbe niyakobere abeegesebwa baamwe, nacaali kutemba mwiguru (1:8). OLuka niye yawandiikire ekitabo kini, nʼekyʼAmawuro Agasai nka nigaawandiikiibwe oLuka.
OLuka yaali musawo, era olwa kwendya okuwandiika ebiikire, yawandiikire nʼobwetegeerya bwingi. Ebiwandiiko bikali bibiri, ekyʼAmawuro Agasai nʼekya Bikolwa byʼaBakwenda, yabiwandiikiire Tewofiiro eyaali oMuyonaani, baitu era kikusoboka okubba nti ebiwandiiko bini yaali abiwandiikiire Bakurisitaayo, omwali aBayonaani nʼaBayudaaya (1:1).
Ekitabo kini ekya Bikolwa byʼaBakwenda obba olaawo kyawandiikiibwe akati wa myaka 60-64 oYesu nabyairwe, kubba kikufundikira oPawulo atakaligire mu nkomyo. OLuka yatambwire nʼomukwenda oPawulo era obba olaawo ekitabo kini kyawandiikiirwe mu kibuga kyʼAntiyookiya. Ekitabo kini nyongeerya yʼAmawuro Agasai nka nigawandiikirwe oLuka era kitandika na kutemba kwa Yesu omwiguru.
Ekigendeerwa kya Luka okuwandiika ekitabo kini, kikwisana nʼekyo ekyawandiikisirye Amawuro Agasai. OLuka yayenderye oTewofiiro amwei nʼaBakurisitaayo abaali bakweyongeranga obwingi beesigire kimwei byebaayegeseibwe. Olwʼekyo yawandiikire ebikufa oku bwomi bwa Yesu nʼobwetegeerya era nʼawandiika nʼoku nsaasaana ya bukurisitaayo.
Ekitabo kya Bikolwa byʼaBakwenda kituweerya ekyakuboneraku ekya kanisa eyeekereire era kitulanga ekiisani kyayo omu kwikiriza oYesu. Ebyakuboneraku byʼabakwenda, bitulanga engeri ya kwesigamu amaani ga Mwoyo Akwera omu kusaasaanya obukwenda bwʼAmawuro Agasai egiri abandi.
Ensoronga
1. Okwiza kwa Mwoyo Akwera oku beegesebwa nʼekanisa okutandika okukula (1:1–8:1)
2. Okwasayasanizibwa kwa Kanisa kukutandika era nʼesaasaanira ebitundu ebindi, nekuligira omu Yerusaalemu (8:2–12:23)
3. OPawulo akwaba oku lugendo lwamwe olwa buminsani olwekereire (12:24–14:28)
4. Olukiiko lukwikaara omu Yerusaalemu okusalawo ebikwetaagisibwa omu baikiriza omu banyamanga (15:1-35)
5. OPawulo akwaba oku lugendo lwamwe olwakabiri olwa buminsani (15:36–18:22)
6. OPawulo akwaba oku lugendo lwamwe olwakasatu olwa buminsani (18:23–20:38)
7. OPawulo akukwatibwa omu Yerusaalemu (21:12–26:32)
8. OPawulo akutwalibwa e Rooma (27:1–28:31)
Currently Selected:
Bikolwa Enyanjula: RUULI-NYALA
Highlight
Share
Copy
Want to have your highlights saved across all your devices? Sign up or sign in