Bikolwa 8

1NʼoSawulo yaaliwo era nʼasiima okwitibwa kwa Siteefano.

OSawulo akwasayasania ekanisa

Ekiro ekyo ekanisa eyaali e Yerusaalemu nʼetandika okwasayasanizibwa omuno. Boona boona abaikiriize oKurisito, okwiyaku abakwenda, ni bararangira omu bitundu bya Buyudaaya nʼe Samaliya. 2Abasaiza abajwawuki ba diini ni baziika oSiteefano, era ni bamukungira muno. 3Baitu oSawulo nʼagezaku okuzica ekanisa nakwingira omu buli nyumba, nʼakwata abasaiza nʼabakali nʼabata omu nkomyo.

Amawuro Agasai gakubuulirwa omu Samaliya

4Awo abaararangire ni baaba woona woona nibakubuulira abantu ekigambo kya Kanca. 5OFiripo nʼayaba omu kibuga ekya mu Samaliya, nʼabuulira abantu baayo oku Kurisito.#8:5 Oba “Oyo eyasukirweku amafuta.” 6Abantu nibaawuliire oFiripo byakubaza, ni babona nʼebyewuunyo byakukola, boona boona ni bata muno omwoyo okwebyo byakwegesya. 7Emizumu egyabbanga oku bantu ni gibaligaku nigikukunga nʼeiraka eryanguki, era embenja nʼabalema baingi ni batambwa 8era ni wabbaawo okusemereerwa kwingi omu kibuga ekyo.

OSimooni omufumu

9Waalowo omusaiza gwebaayetanga oSimooni, eyakolanga ebya bufumu omu kibuga ekyo, ni yeewuunyisya aBasamaliya. Yeewaisyanga nti wa kitalo muno. 10Boona okuliga oku wʼansi okwika oku wʼaiguru baamuwuranga, ni bakoba bati, “Omuntu oni niye maani ga Kanca ageetebwa, ‘Againgi’” 11Baamuwuranga, olwakubba okumala eibbanga lirai, yabeewuunyisyanga nʼebyabufumu byamwe. 12Baitu oFiripo niyabuuliire abantu Amawuro Agasai agakufa oku Bukama bwa Kanca nʼokwibara rya Yesu Kurisito, abasaiza nʼabakali ni baikiriza ni babatizibwa. 13NʼoSimooni omwenyenere nʼaikiriza. Era niyamaare okubatizibwa, nʼabba amwei nʼoFiripo. Niyaboine obubonero nʼebyamaano ebyakaaliiri oFiripo byeyakoore, nʼawuniikiira. 14Awo abakwenda abaali omu Yerusaalemu nibaawuliire aba mu Samaliya nka nibaikiriize ekigambo kya Kanca, ni babatumira oPeetero nʼoYokaana. 15Bani nibaikireyo ni basabira abaikiriza bafune oMwoyo Akwera, 16kubba omu bo timwalimu gonze omwei eyaalina oMwoyo Akwera. Baali babatiziibwembe omwibara lya Mukama oYesu. 17Awo oPeetero nʼoYokaana nibaabataireku emikono, ni bafuna oMwoyo Akwera. 18OSimooni niyaboine abakwenda nibakuta emikono oku bantu, nʼabantu abo ni bafuna oMwoyo Akwera, nʼaleetera abakwenda empiiya, 19nʼakoba ati, “Njeena mumpeerye amaani ago; buli gwenaakutangaku emikono, afune oMwoyo Akwera.”

20Baitu oPeetero nʼamukoba ati, “Empiiya zaamu kafe nazo, olwakubba olowoize okufuna ekitwo kya Kanca nokukigulambe! 21Obuweereza buni tobulinamu mugabo, era tosobola kukola naiswe, olwakubba omutima gwamu tigusai omu maiso ga Kanca. 22Ale weenenye ekibbi kyamu, osabe oMukama, acaasobola okukusaasira ekirowoozo ekyo ekiri omu mutima gwamu, 23kubba nkubona oizwire obwiya, era ngʼoli ku mukoligo gwa kibbi.”

24OSimooni nʼairamu, “Munsabire egiri oMukama, ebigambo ebyo byemubazire watabbaawo gonze ekimwei ekikunyizaku.” 25OPeetero nʼoYokaana nibaamaare okujuura nʼokubaza ekigambo kya Mukama omu bantu, ni bairayo e Yerusaalemu, ni baaba babuulira abantu aba mu byalo bya Samaliya Amawuro Agasai.

OFiripo nʼomukungu wʼEsiyopiya

26Awo omalaika wa Mukama nʼakoba oFiripo, “Imuka oyabe oku rubaju lwa gulyo, okwate omuwanda ogwakaara omwirungu, era oguliga e Yerusaalemu okwaba e Gaaza.” 27OFiripo nʼaimuka nʼayaba. Baitu niyaali omu muwanda, nʼaitirana oMwesiyopiya omulaawe, omukungu wa mukama omukali oKandake owʼEsiyopiya, era omubiiki waamwe omukulu eyaali aizire e Yerusaalemu okuramya oKanca. 28Niyaali nakwirayo eka, naikaire omu kigaali kyamwe, era nakusoma ekitabo kya mulangi oYisaaya, 29oMwoyo Akwera nʼakoba oFiripo, “Yaba oike oku kigaali ekyo okyabiirweku.”

30OFiripo nʼairuka nʼakiikaku, nʼamuwura nakusoma ekitabo kya mulangi oYisaaya, nʼamubuulya ati, “Byokusoma okubyeteja?”

31Ye nʼamwiramu ati, “Nkusobola ntyai okubyeteja nga ndoowo akubinsoboora?” Awo nʼayeta oFiripo atembe omu kigaali, aikale amwei na ye.

32Ekitundu kya Byawandiikiibwe kyeyaali akusoma kikoba kiti,

“Yaali nkʼontaama akutwalibwa okwitibwa,

yaali nkʼomwana wa ntaama atakunga nibakumusalaku ebyoya,

tiyabazire kigambo gonze ekimwei.

33Yajurungiibwe, era tiyawozeseibwe na bwenganiza.

Naani asobola okusoboora obubyale bwamwe?

Olwakubba obwomi bwamwe bwaiyiibwe omu nsi.”#Isa 53:7-8

34Omulaawe nʼakoba oFiripo, “Nkobera, omulangi akubaza ku naani? Akwebazaku ye omwenyenere kanda akubaza ku wondi?” 35OFiripo nʼatandikira oku kyawandiikiibwe ekyo, nʼamubuulira Amawuro Agasai agakukwata oku Yesu.

36Nibeeyongeire omu maiso, ni baika awaali amaizi, omulaawe nʼakoba oFiripo, “bona amaizi! Ngani, ekikungaana okubatizibwa kiki?” [37OFiripo nʼakoba, “Niwaabba oikiriize nʼomutima gwamu gwona, osobola okubatizibwa.” Ye nʼairamu, “Nnyikiriize oYesu oKurisito niye omwana wa Kanca.”]#8:37 Ebiwandiiko ebimwei ebya irai tibirina lunyiriri luni.

38Awo nʼalagira ekigaali kyemerezebwe. Bakali babiri, oFiripo nʼomulaawe, ni baingira omu maizi, oFiripo nʼamubatiza. 39Nibaaligire omu maizi, amangu ago oMwoyo wa Mukama nʼatoolawo oFiripo nʼamutwala, omulaawe nʼatairayo kumubona, baitu nʼakwata omuwanda gwamwe naizwire okusemereerwa. 40Awo oFiripo ni yeizuukiirya nali omwAzotaasi, nʼayakalayakala omu bibuga byona okwika e Sisaariya, nakwaba abuulira abantu Amawuro Agasai.

Currently Selected:

Bikolwa 8: RUULI-NYALA

Highlight

Copy