Esaburi 32
32
Okhwekanira nende Okhuverwa
Esaburi ya Daudi. Esomo.
1Ali nekhavi oyo overwa embi chichie,
oyu owoni wuwe wulekherwa.
2Ali nekhavi omunju oyu OMWAMI achavalira eviononi,
nundi mumwoyo kukwe awumamo owuveyi.
3Olu nali ninjeyama owoni wange, omuviri kwange kwawechekhereranga,
mukhulira khwange olutalo lwosi.
4Sikira esiro nesiteche omukhono kukwo kwasitoeranga;
amaani kange komerera ngakakhupirwe nomumwi kwesiminyu. Selah
5Neyama owoni wange khwiwe,
nundi sinakisa owuvi wange ta.
Nawola, “Njia okhweyama embi chiange khu OMWAMI”,
mana wamala wambera owusicho wowoni wange. Selah
6Khanu lekha yesiyesi omusuvirwa aleche amasayo khwiwe,
muvise viowutinyu, mumukhula kwamachi ni kuvicha,
sivichia khumwolakho ta.
7Ewe oli esiekisiro siange,
ewe wungisanga okhuchula muwutinyu;
ewe wundinyirisanga nowunanuli. Selah
8Njia okhukhukerakira nundi khwekese,
engira eyi wenyekha olondekho;
Njia okhukhukololosa nikhulengera owulayi.
9Ochava ngefarasi namwe esukhiri, echichawuliranga ta,
echienyanga mbo vawowemo omukoye nolusala kho chikenda,
nausa sichilondana nawe ta.
10Avamayanu vachia okhunyola owutinyu owungi;
nausa owusimi wa wuli lwosi wawotokhana oyo osuviranga mu OMWAMI.
11Sangalira mu OMWAMI, mana wekhoye, enywe avalungi,
nundi mukalakase muwusangafu, enywe mwesi avalungi mumwoyo!
Currently Selected:
Esaburi 32: LNTPP
Highlight
Share
Copy
Want to have your highlights saved across all your devices? Sign up or sign in
©The Bible Society of Kenya, 2024
