Matayo 26
26
Enganakani Emayanu
(Mrk. 14.1-2; Lk. 22.1-2; Yoh. 11.45-53)
1Olu Yesu kali namalire okhuwola amakhuwa kano, kawolera avalondi vave, 2“Mumanyire mbo endalo chiviri nichiakhawa linave esao lia Pasaka, Omwana womunju achia okhuanwa avambwe.” 3Kho evise evio, avakuhani vakhongo nende avasakhulu vavanju vakhung'ana alala ango womukuhani mukhongo, owalangwa mbo Kayafa, 4mana vanyola ekerako okhutira Yesu muwekisi mana vamwiche. 5Nausa vawola, “Khuchakhola khuchio musao muno ta, avanju vanyala okhulecha esiwawa.”
Yesu Avakhwa Amafucha Bethania
6Nga Yesu kali Bethania munju ya Simoni owamakere, 7omukhasi wundi kengiramo namafucha akowukusi owukali muchupa, kachukha amafucha khumuchwe kwa Yesu olu kali nikekhaye aamesa. 8Nolu avalondi vave vawona, veng'ulung'unya nivawola, “Akononerasi? 9Amafucha kano kakhakusiswe khusende enyingi mana chiakhonya avamanani!” 10Nausa Yesu olu kamanya enganakani chiawe, kavawolera, “Munyasira sina omukhasi oyu? Kakholeye ekhuwa elayi muno. 11Muli navamanani enyinga chiosi, nausa simuchia okhuva nange enyinga chiosi ta. 12Achukhire amafucha khumuchwe kwange okhunjekekha khukhuyavirwa khwange. 13Muwung'ali vawolera, awunju wosi aa Injili yino yichia okhwirwachwa musialo, ekhuwa eliakholire lichia khuchumbulwa khulwa okhumukhewulira niye.”
Yudasi Keyama Okhumuchama Yesu
(Mrk. 14.10-11; Lk. 22.3-6)
14Yudasi Iskarioti, mulala khu ekhumi navaviri avo, kachia khu avakuhani vakhongo, 15kavacheva, “Muli okhumberesa sina nimbaana Yesu khwinywe?” Navo vamuwa evitonye viefesa amakhumi katachu. 16Ne okhuchula evise evio, katakha owiyangu wokhumuchama.
Yesu Alia Esiokhulia sia Pasaka Navalondi Vave
(Mrk. 14.12-21; Lk. 22.7-13,21-23; Yoh. 13.21-30)
17Olutalo lwamberi olwa esao lia Emikati kiwumamo Emera, avalondi vacha khu Yesu vamucheva, “Wenya khukhucheresere ena eyulira esiokhulia sia Pasaka?” 18Kavawolera, “Chie mwitookho mulikhunyola omunju mulala, mana mumuwolere, ‘Omwekesi awola, evise Viange violire, ndikhulia Pasaka alala navalondi vange munju wuwo.’ ” 19Avalondi vakhola nga Yesu kali navawoleye, mana vacheresa esiokhulia sia Pasaka.
20Angolove, kekhala aamesa navalondi vave ekhumi navaviri, 21nga vali nivalia, kavawolera, “Evawolera muwung'ali, mulala khwinywe alikhunjama.” 22Vava nesivera esikali. Vanja okhumucheva wuli siamulala, “Omwami, nise?” 23Yesu kavachipa, “Oyo owakhachonga musaani nange, achiakhunjama. 24Omwana womunju achia okhufwa nga kaandikirwa, nausa esilaamo khuyo omuchama! Wakhavaye wulayi omunju oyo akhaywa okhwiwulwa.” 25Yudasi, oyo owamuchama kamucheva, “Omwami, nise?” Yesu kamuwolera, “Niwe owoye ochio.”
Esao lia Omwami
(Mrk. 14.22-26; Lk. 22.14-20; 1 Avk. 11.23-25)
26Nga vali nivalia, Yesu kawukula omukati, kakusavira ekhavi, kakumekula, kawa avalondi vave mana kawola, “Wukule mulie, kuno njomuviri kwange.” 27Nundi kawukula esikombe, nikakhasiweresa ekhavi, kaweresa avalondi, kawola, “Nywe mwesi, 28kano njamalasire kange akendakaano embiakha akachia okhwitiswa khulwa avangi, khulwa okhulekherwa embi. 29Evawolera, sinjia khunywakho nundi khutunda liomusabibu lino ta okhwola olutalo olu njia okhuyinywa embiakha ninanywe muwami wa Papa wange.” 30Olu vali nivakhemba olwembo vachia khusikulu sia Miseituni.
Yesu Achumbula Petero Okhumwekana
(Mrk. 14.27-31; Lk. 22.31-34; Yoh. 13.36-38)
31Mana Yesu kamala kavawolera, “Muli okhunjirukha esiro sino, esikira liaandikwa, ‘Njia okhukhupa omwayi, ne amakondi ketuuli kachia okhusalana.’ 32Nausa ninakhasisimuswa, njia okhuvachangirira Galilaya.” 33Petero kamuwolera, “Ata vosi nivakhwirukha, ese sinyala khukhulekha ta.” 34Yesu kamuwolera, “Ng'ali ekhuwolera, esiro sino, etaywa niyichakholiokha, oli khunjikana amakhavi katachu.” 35Petero kamuwolera, “Ata niva mbo okhwola efwe ninawe, sinjia okhukhwikana ta.” Avalondi vandi vosi vawola vachio.
Yesu Asala Mumukunda kwa Gethsemane
(Mrk. 14.32-42; Lk. 22.39-46)
36Kho Yesu kachia navalondi awunju aalangwa mbo Gethsemane, kavawolera, “Yikhale ano nange njie amberi okhusala.” 37Kawukula Petero, navana va Sebedayo, mana kanja okhuverera nokhunyakhana mumwoyo. 38Kho kavawolera, “Omwoyo kwange kuvereye, ata eviokhufwa, tong'e ano muve meso alala nange.” 39Nikakhesendakho esinao, kakwa nafumaye mana kasala, “Papa Wange, nikanyalikhana, esikombe siokhunyakhana sino sinjulekho, Ata kachio, lichava elienya liange ta nichasi live elienya lilio.” 40Kakoola khuvalondi vave kavanyola nivakona, kawolera Petero, “Simwakhavaye meso nange ata wusa esa ndala ta? 41Vemeso, musaye kho mukhaywe okhukwa mumatemo, roho yenya nausa omuviri kuweye amaani.” 42Kachia nundi olwakhaviri kasala, “Papa Wange, niva esikombe siokhunyakhana sino nisichanyala sianjulakho okhwola esinywe, lekha elienya lilio liekholekhe.” 43Nundi kakoola kanyola nivakona, sikira emoni chiawe chiali chisitoyire. 44Kavalekha nundi, kachia kasala olwa khatachu, nachumikhira amakhuwa malala ako. 45Kakoola khuvalondi kavawolera, “Musikona nokhuluwuukha? Lengere, evise violire, ne Omwana womunju achamwa mumakhono kavoni. 46Yinyokhe khuchie, wone, owokhunjama kolire.”
Okhutirwa khwa Yesu
(Mrk. 14.43-50; Lk. 22.47-53; Yoh. 18.3-12)
47Olu Yesu kali nasilomaloma, Yudasi, mulala khu ekhumi navaviri kacha nesituma esikhongo okhuchula khu avakuhani vakhongo navasakhulu vavanju, neng'esi nevikong'o. 48Khanu owokhumuchama kali avekesise esimanyiro nawola, “Oyu njia okhususuna, nje niye, mutire.” 49Kacha khu Yesu lwangu kamuwolera, “Mulembe Omukhongo.” Mana kamususuna. 50Yesu kamuwolera, “Omwicha, mbo sina nuliano?” Kho vasuta aa Yesu kali, vamutira. 51Mulala khuvali nende Yesu kachusa olung'esi, kakhupa omukhalavani womukuhani mukhongo, kamuchema okhuchwi. 52Kho Yesu kamuwolera, “Vikha olung'esi lulwo, esikira vosi avatumikhiranga olung'esi vachia okhufwa olung'esi. 53Mupara mbo sinyala okhucheva Papa wange naye awene nawene achume evituma viavamahe ekhumi na viviri eviengelosi? 54Ne khanu amaandiko kosereswa kachie mbo ndwolu kenyekha kekholekhe?” 55Evise evio Yesu kawolera esituma, “Mwichire ngavenya okhutira omunuli neng'esi, nesimbo okhundira ese? Wulinyinga nikhalanga mu Etemperi ninekesa, ne simwandirakho ta. 56Nausa kano kekholekhire kho amaandiko kavanabii kosereswe.” Avalondi vave vamulekha vamwirukha.
Yesu Emberi Wesiina
(Mrk. 14.53-65; Lk. 22.54-55,63-71; Yoh. 18.13-14,19-24)
57Avali nivatiye Yesu vamuyira khu Kayafa omukuhani mukhongo, eyi avekesi vamalako nende avasakhulu vali nivakhung'anire. 58Nausa Petero kamulondakho aasinao, okhwola mulwanyi lwomukuhani mukhongo. Kengira mukachi kekhala nende avalindi okhuwona esichiririra. 59Avakuhani vakhongo nende avesikhaso vosi vatakhatakha owuloli wowuveyi khu Yesu kho vanyalirwe okhumwicha, 60nausa ata liava mbo avaveri avangi vewukha, sivanyola liosiliosi elimuwoa tawe. 61Olunyuma avanju vaviri venyokha vawola, “Omunju ono kawola achi, ‘Enyala okhusasia Etemperi lia Nyasaye, mana eliombakhe munyinga chitachu.’ ” 62Omukuhani mukhongo kenyokha kamucheva, “Owuma eliokhuchipa khu akavanju vano vakhuchakho kano?” 63Nausa Yesu kawuleera wusa. Omukuhani mukhongo kamuwolera, “Mulicha lia Nyasaye olimwoyo, ekhwesaya, chuwolere niva niwe Kristo, Omwana wa Nyasaye.” 64Yesu kamuwolera, “Niwe owoye. Nausa khuwolera, okhuchula evise vino, ochia okhuwona Omwana womunju nikekhaye khumukhono mulungi okwa Onyala Viosi, nende okhwicha khumaleesi komwikulu.” 65Omukuhani mukhongo kosula ekanju yiye, kawola, “Kekerania khu Nyasaye. Khwenyera sina avaveri vandi? Muwuliye okhwekerania khukhwe khu Nyasaye! 66Mukhalaka muchie?” Navo vachipa, “Kolanire efwa.” 67Vamufucha mumoni, vamukhupa, avandi vamukhupa embi, 68nivamucheva, “Ewe Kristo chusa owunabii! Njanu okhukhupire?”
Petero Kekana Yesu
(Mrk. 14.66-72; Lk. 22.56-62; Yoh. 18.15-18,25-27)
69Khanu Petero kali kekhaye enje wesiina mulwanyi. Omukhalavani mulala kamwichira kamuwolera, “Ewe wesi ovaye nende Yesu Omugalilaya.” 70Petero kekana emberi wavanju vosi, kawola, “Simanyirekho eli munawolanga ta.” 71Nga kali nachula erwanyi, omukhalavani wundi kamuwona, kawolera avali nivemireo, “Omunju ono avaye nende Yesu Omunasareti.” 72Kechuva, kekana, “Simanyirekho omunju oyu tawe.” 73Evise niviakhavichakho vititi, avali avokhwewonerakho wusa vacha khu Petero vamuwolera, “Kang'ali ewe oli mulala khunivo, esikira ata elomaloma lilio liene liekesa wusa.” 74Petero kanja okhwilaama nokhwechuva, “Simanyirekho omunju oyu tawe.” Ne evise evio etaywa yakholiokha. 75Petero kechulira amakhuwa aka Yesu kawola, “Etaywa niyichakholiokha, oli okhunjikana amakhavi katachu.” Kachula erwanyi kalira nowusiva.
©The Bible Society of Kenya, 2024