Yohana 13

Yesu Asavia Avalondi Vave Amakulu

1Khanu Olutalo nilusikaye lulala okhwola khusao lia Pasaka, olu Yesu kamanya achi evise vivie viokhuchula musialo okhukoola ewa Papa violire. Kali kasima avave avali musialo, ne kavasima okhwola olumalirisi. 2Nolu vali musiokhulia siangolove, olu setani kali namalire okhwingira mumwoyo kwa Yudasi Iskarioti, omwana wa Simioni, okhumuchama, 3Yesu namanyirisise mbo Papa wuwe kali achaye wulisinju mumikhono kikie, ne kali kachula khu Nyasaye ne kali anachianga khu Nyasaye. 4Kenyokha khumesa, kacha eluveka enguo yiye, ne kewoya etawulo. 5Mana kachukha amachi khu lukaye, ne kanja okhusavia avalondi vave amakulu, ne kavapangusa netawulo eyikali nikewoyire. 6Olu kola khu Simoni Petero, ne Petero kamuwolera, “Omwami, wenya okhusavia sesi amakulu?” 7Yesu kamuchipa, “Esindakholanga simumanyire tawe, nausa enyuma wako olikhumanyirisa.” 8Petero kamuwolera, “Sunyala okhusavia amakulu kange ta.” Yesu kamuwolera, “Ninjakhusavia, owuma siosisiosi ninange.” 9Simoni Petero kamuwolera, “Omwami, Ochasavia amakulu kong'ene ta, nausa savie amakhono nomuchwe!” 10Yesu kamuwolera, “Oyo owiyokire awuma elienya liokhusava, nichasi amakulu kake, sikira mulafu omuviri kwosi, nenywe mulivalafu, nausa simuli mwesi avalafu tawe.” 11Sikira kali amanyire owali khumuchama, njesiakira nawola, “Simuli mwesi avalafu tawe.” 12Olu kali nikakhavasavia amakulu, nawukuye enguo yiye, nakooye khusisala sisie, kavawolera, “Mumanyire esifune siesinju esinakhavakholera sino? 13Enywe nga munanga Omwekesi nende Omwami, ne muli ng'ali, esikira nje mbo ndi. 14Niva ese, Omwami nende Omwekesi wenywe, nakhavasavia amakulu, mwesi mwenya mwasavania amakulu. 15Evawaye esiloleso, kho mwesi mukhole nga nakhavakholera. 16Ng'aling'ali vawolera, omukhalavani siakhira omukali wuwe ta, namwe oyo ochumwa kakhira omuchumire. 17Nimumanyire evinju vino, muli nekhavi ni muvikhola. 18Sindawoleranga enywe mwesi tawe, emanyire avo avanawula, kali kachio mbo endakaano yosereswe, ‘Oyo owalia omukati kwange, kanyinyoseye esisisiro.’ 19Evawolera luno, nivisiri okhukholekha, kho nivikholekha musuvire mbo nise niye. 20Ng'aling'ali, vawolera, oyo owingisa yesiyesi eyinjuma kanyingisa, noyo owunyingisa kengisa owanjuma.”

Yesu Achumbula Okhulondekhana Nokhuchaamwa Khukhwe

(Mat. 26.20-25; Mrk. 14.17-21; Lk. 22.21-23)

21Olu Yesu kali nikakhalomaloma, kanyakhana mumwoyo, ne kachusa owuloli, “Ng'aling'ali vawolera, mulala khwinywe alikhunjama.” 22Avalondi valengeranakho, vakochwa njanu oyu kali nawola. 23Mulala khuvalondi, oyu Yesu kali kasima, kali ayekhire aambi nesirifu sia Yesu. 24Simoni Petero kamusakula kamuwolera, “Chuwolere njanu oyu anawolanga.” 25Kho nayekhire aambi nesirifu sia Yesu, kamuwolera, “Omwami, njanu?” 26Yesu kavachipa, “Njoyo yindi okhuweresa esitonye siomukati kuno ninakhakuchonga.” Kho olu kali kakhachonga esitonye siomukati, kaweresa Yudasi, omwana wa Simoni Iskarioti. 27Kho nikakhamuweresa esitonye siomukati, Setani kamwingiramo. Yesu kamuwolera, “Esi wenya okhuchia okhukhola, khola lwangu.” 28Khanu awumao yesiyesi khumesa owamanya esiakira namuwolera achio. 29Valala vapara mbo, sikira Yudasi njowali omuvikhi wesende, Yesu kali amuwolera, “Kula esienyekha, khusao lino”, namwe akhonye avamanani nesinju. 30Kho nikakhawukulanga esitonye siomukati, kachula lwangu, ne siali esiro.

Elako Eyakha

31Olu kali nikakhachula, Yesu kawola, “Vino njevise evi Omwana womunju anyola oluyali, ne muniye Nyasaye anyole oluyali; 32Niva Nyasaye anyola oluyali muniye, Nyasaye nundi alikhumuwa oluyali mu omwene, ne amuwe oluyali lwenolwo. 33Vana vatiti, evise vititi nisiri ninanywe. Muli khundakha; ne nga nawolera Avayahudi khokhanu vawolera, ‘Eyi njia simunyala mwachayo ta.’ 34Elako eyakha evaweresa, mbo musimane, nga navasima, mbo eywe mwesi musimane. 35Nimukhola muchio, avanju vosi valikhumanya mbo muli valondi vange, nimusimana.”

Yesu Achumbula Petero Okhumwikana

(Mat. 26.31-35; Mrk. 14.27-31; Lk. 22.31-34)

36Simoni Petero kamucheva, “Omwami, ochia ena?” Yesu kamuchipa, “Eyi njia sunyala wanondakho evise vino ta, nausa olinonda khale.” 37Petero kamuwolera, “Omwami, sikira sina sinyala okhukhulondakho evise vino ta? Ndi khuana owulamu wange khulwewe.” 38Yesu kachipa, “Olikhuana owulamu wuwo khulwese? Ng'aling'ali ekhuwolera, etaywa siyiri khukholiokha, nusiri okhunjikana amakhavi katachu ta.”

Currently Selected:

Yohana 13: LNTPP

Highlight

Copy