Evikholwa 6

Avayeti Saba ava Avachumwa

1Munyinga echio, olu avalondi vali ni vanametekhanga, Avagiriki vava nokhweng'ulung'unya khu Avaebrania mbo ava namulekhwa vawe vevirirwanga mukhukavana elienya liawe lia wulinyinga. 2Avachumwa ekhumi navaviri valanga avalondi vosi vavawolera, “Siviri wulayi mbo efwe khulekhe okhwirwacha ekhuwa lia Nyasaye khulwokhukava eviokhulia ta. 3Kho khanu vasiefwe, wukulane mwinywe avanju saba avefuma endayi, avechula Roho Muchwenufu nende owukesi, ava khunyala khwachakho omukhono khulwa omulimo kuno. 4Nausa efwe khulikhweana fwavene mwisala nende owukhalavani wekhuwa.” 5Aka vawola kasimisa esituma siosi, vawula Stefano, owechula esuvira nende Roho Muchwenufu, nende Filipo, Prokoro, Nikanori, Timona, Parimena, nende Nikolao owa Antiokia, owali nikengiye mudini ya Avayahudi. 6Vayira vano emberi wavachumwa, vavasalira nundi vavachakho amakhono.

7Ekhuwa lia Nyasaye liachianakana okhuvalaa. Avalondi navo vametekha olukali mu Yerusalemu, ne avakuhani avangi vanyola esuvira.

Okhutirwa khwa Stefano

8Stefano nikechuye embavasi namaani, kakhola akokhuwukia nende evimanyiro muvanju. 9Kho valala khwavo avali vesinagogi Yavalekhule (nga vayilanganga), nende ava Kurene, nende Avaleksandria, nende Silisia, nende Asia, venyokha vanja okhuyingana nende Stefano. 10Nausa sivanyala okhukhaya owukesi nende Roho eyi kalomalomeramo tawe. 11Vawomberesia avanju muwekisi, vawola, “Khuwuliye nawola amakhuwa kesifwavi khu Musa nende Nyasaye.” 12Vachwayirisa avanju nivalimo avasakhulu nende avekesi vamalako, vamwichira vamutira nokhumuyira emberi wesikhaso, 13vachekekha avaveri vowuveyi vawola, “Omunju ono sialekhangakho okhulomaloma amakhuwa kesifwavi khu Etemperi nende khumalako ta. 14Esikira khumuwuliye nawola achi Yesu Munazareti ono achiokhusakula Etemperi, ne nundi achia okhukalusania amalako aka Musa kachuwa.” 15Olu vamukhang'asa, vosi avali musikhaso vawona mbo oweni wuwe wali ngowengelosi.

Currently Selected:

Evikholwa 6: LNTPP

Highlight

Copy