Evikholwa 2

Okhwicha khwa Roho Muchwenufu

1Olutalo lwa Pentekote nilwakhola, vali vosi awunju alala. 2Evise evio omwoyo kwachula mwikulu ngekhungu engali niyiwucha, kwechula munju omuvali nivekhaye. 3Enimi chiavaonekhanira echifwanana nende omuliro, ni chiekavira khu wuli mulala. 4Vosi vechuswa nende Roho Muchwenufu vanja okhuwola munomo chiaukhanire, nga Roho kavanyalira.

5Khanu khwali nende Avayahudi avali nivamenya mu Yerusalemu, avanju varia Nyasaye okhuchula embeka chiosi echiesialo. 6Olu vawulira oluyoka, avanju avangi vewusao, ne vesindukha olukali sikira wulimunju kavawulira nivalomaloma mululomo lulwe. 7Vesindukha mana vawuka vawola, “Avalomaloma vano vosi sivanju va Galilaya? 8Ne kali kachie mbo khunawuliranga, wuli mulala khwifwe olulomo lulwe? 9Avaparitia, Avamedi nende Avaelamu; avandi vamenya mu Mesopotamia, Yudea nende Kapadokia, avandi vachula Ponto nende Asia. 10Khulimo Avafurikia, Avapamfilia, Avamisri nende avachula mumbeka chia Libia aambi nende Kurene; avandi vakeni okhuchula Ewuroma, Avayahudi nende avanju vacha okhulonda esuvira lia Avayahudi, 11Avakrete nende Avaarabu, khuvawulira nivalomaloma munomo chiefwe akemilimo emikhongo kia Nyasaye.” 12Vosi vesindukha mana vawuka, ne vatong'a nivachevana, “Kano kekesa sina?” 13Avandi vavachekherera nivawola vachi koo, “Vano vameye edivai mbiakha.”

Ekhuwa lia Petero

14Petero kema alala nende avachumwa vandi ekhumi na mulala kavalokhera nawola achi, “Avanju va Yudea nende vosi avamenyire Yerusalemu, nenya mumanye kano, ne nundi muchekerese amakhuwa kange. 15Avanju vano sivameye nga mupara tawe, esikira mbo khuli wusa musa yakhatachu eyasibuyi. 16Amakhuwa kano njaka omunabii Yoeli kawola:

17‘Ne munyinga malirisi kachia okhuva, Nyasaye awola,

mbo njia okuchukha Roho wange khuvanju vosi,

navana venywe avasoliri nende avesikhana vachia okhuchusa owunabii,

avawukha vanakhawone amalola

ne avakofu vanakhaloche amalocho;

18Yee, ata khuvakhalavani vange, avasacha navakhasi,

njia okhuchukha Roho wange, ne vachia okhuchusa owunabii.

19Njia okhukhola amangayimwa mwikulu amukulu

nende evimanyiro aasi musialo,

khuchiakhuva nende esivanga, omuliro nende elisi ekali.

20Enyanga yichia okhumaliya,

omwesi nakwo kuchia okhukalukhana kuve ngamalasire,

endalo ya Omwami niyisiri okhwola,

enyinga yichia okhuva engali nundi eyowukhumi.

21Ne kachia okhuva mbo yesiyesi olanga khulicha lia Omwami achia okhunyola owuwonia.’

22“Avanju va Israeli, wulire amakhuwa kano: Yesu Omunazareti, omunju wekeswa emberi wenywe ni Nyasaye mwene, okhuva omunju wevikhole evikhongo, okhuvichira khu akokhuwukia nende evimanyiro evi Nyasaye kakhola emberi wenywe. Enywe avene mumanyire amakhuwa kano, 23mbo Yesu kacha emberi wenywe khulienya nende emanya lia Nyasaye mwene, nanywe mwamuvamba mana mwamwicha okhuvichira khumakhono kavoni. 24Nausa Nyasaye kamusisimusa, nikakhamukangulula okhuchula musiwoo siefwa, esikira sikakhanyalikhire mbo efwa limuwoe tawe. 25Okhuvera Daudi kawola kano okhulondana naye,

‘Nawona Omwami emberi wange evise viosi,

kemire khumukhono kwange mulungi mbo ndekhe khuchenga.

26Khulwako, omwoyo kwange kwasangaye, nolulimi lwange lwekhoya.

Nundi omuviri kwange kulikhumenya muwunai.

27Esikira suchia okhulekha omwoyo kwange emakombe ta,

nomba olekhe omuchwenufu wuwo aolere muvafu.

28Wunjekesise engira yowulamu,

oli khunjichusa owusangafu okhulondana nende eva lilio alala nange.’

29“Vasiefwe, nenya okhuvawolera awulafu okhulondana nende omukuka wefwe Daudi owafwa kasikhwa, ne esirindwa sisie sisiri ano nafwe. 30Okhuva mbo kali munabii, ne kamanya mbo Nyasaye kali kamulaka mbo achia okhulomba mulala khuvisoni vivie okhuva omuchuki mu musirenge sisie, 31Kawona nundi kalomaloma khusisimukha lia Kristo, mbo sikakochera muvafu tawe, nundi omuviri kukwe sikwawolera musirindwa tawe. 32Yesu ono ngwoyu Nyasaye kakingula ne fwesi khuli vaveri khumakhuwa kano. 33Kho, esikira mbo kakingulwa khumukhono mulungi okwa Nyasaye, ne nundi Nyasaye kachulakirisa okhuchuchumira Roho Muchwenufu, kho akamuwona nokhuwulira kano nje Roho wuwe oyu achuchukhiye. 34Okhuvera Daudi sikakulukha okhuchia mwikulu tawe, nichasi omwene awola achi,

‘Nyasaye kawolera Omwami wange, yikhala khumukhono kwange mulungi,

35okhwola nombe avasiku vavo vave enjeve yamakulu kako.’

36Kho enju ya Israeli yosi yimanye muwung'ali mbo, Yesu oyu mwavamba ono, Nyasaye amulombire okhuva Omwami nundi Kristo.”

37Kho olu avanju vawulira kano vanyakhana mumioyo, vacheva Petero nende avachumwa vandi vosi, “Vasiefwe khukhole khuchie?”

38Petero kavawolera, “Yekanire, mana muvatiswe mwesi mulicha lia Yesu Kristo kho muverwe owoni wenywe; ne muchiakhunyola esianwa sia Roho Muchwenufu. 39Okhuvera endakaano yino yiri khwinywe nende khuvana venywe, ata khuvosi avali esinao, vosivosi ava Omwami Nyasaye alanga aambi ninaye.” 40Petero kavachusira owuloli navatinyirisa okhuvichira mumakhuwa kandi amangi navawolera achi, “Yewonie okhuchula mulwiwulo lumayanu luno.” 41Avo vosi aveyama ekhuwa lilie vavatiswa. Avanju avola eelefu chitachu vametekha khusituma olutalo olwo. 42Avanju vano vosi vechusa nomwoyo kwosi okhulonda amekeso kavachumwa nende okhusanga alala khukhumeka omukati nende mumasayo.

Emenya Liavasuviri

43Owuchi wavechula mumioyo olu vawona avachumwa nivakhola akokhuwukia nende evimanyiro evingi.

44Ne vosi avasuvira vachiririra okhuva alala nivakholera amakhuwa kawe kosi alala, 45vakusianga viosi evi vali navio nivakavana vosi okhulondana nende elienya lia wulimunju. 46Vachianakana okhusanga alala wulinyinga, nivachia mu Etemperi alala nende okhumeka omukati alala mungo chiawe, valia esiokhulia siawe nowusangafu nende emioyo kiowuani, 47Vafumianga Nyasaye nokhusimwa navanju vosi. Ne Omwami kachianakana okhumeta wulinyinga avawonisiwanga.

Currently Selected:

Evikholwa 2: LNTPP

Highlight

Copy