Rutsi 2
2
Rutsi yaruluma mumukunda kwaBoazi
1Ne Naomi yali nende omwikhowe, omundu omukhongo omuyinda, oweshilibwa shiabwe Elimeleki; neliiralie liali Boazi. 2Naye Rutsi, omukhaana oyo omuMoabu, nasunjila Naomi ari Chama enzie mumukunda, mbu erulume imele inyuma womundu yesi owakhangoosia. Naye ari Khatsie, mukhaana wanje. 3Kho natsia, niyoolayo naruluma mumukunda inyuma wabachesi. Ne yeetsukhana nali mushitonye shiomukunda eshiali shiaBoazi, owali oweshilibwa shiabwe Elimeleki. 4Mana Boazi niyeetsa okhurula eBetelehemu, nashiesia abachesi, ari OMWAMI abe halala nineenywe. Nibakalusia mbu OMWAMI akhuheelesie ikhabi. 5Mana Boazi nareeba omusumbawe, owali nasinjilila abachesi, ari Omukhaana uno nowawina? 6Omusumba oyo owali nasinjililanga abachesi nakalusia mbu Nomukhaana tsana omuMoabu, owa Naomi yachelela ninaye, okhurula mushibala shiaMoabu; 7yasabile mbu Ochame erulume inyuma wabachesi nikhung'aasia ebili hasi webinywa; kho niyeetsa, ne ashiliho okhurula mutsuli okhuula bulaano, narahuluukhakhwo kata hatiiti ta.
8Mana Boazi nasunjila Rutsi ari Mukhaana wanje, hulila; oratsia okhuruluma mumukunda kundi kwosi, kata okhurula hano ta; ne otong'e hano, ewa abakhaana banje bali. 9Tsimonitsio tsihenjenje omukunda okwa bachesa, nobalondakhwo; shindachile abasooliili mbu baleshe okhukhutiilakhwo? Kata olwa oba noli nobuloho, otsie khutsisiongo tsilia, onywe khumatsi aka abasooliili batayile. 10Naye nasikama, nabunamia obwenibwe hasi, namusunjila ari Nasi engoosibwa endie imbeliwo, iwe okhunzitsulilakhwo, olwa endi omusuku? 11Boazi nakalusia namusunjila mbu Embooleelwe bulayi amakhuwa kosi aka wakholeele nyakhufialawo, okhurula khukhufwa khwomusaatsawo, khandi shinga olwa walekha so nende mawo nende eshialo eshia weebulilwamwo, niwitsa ewabandu aba oramanyilekhwo ta. 12OMWAMI akhurunje khulwa ebikholebio, khandi oheebwe amatani amalamba nOMWAMI, Nyasaye waIsiraeli, owa witsile okhwibisa mumbahatsie. 13Naye nasunga mbu Engoosibwe imbeliwo, omwami; okhuba unemiye omwoyo, khandi umbooleele isie omukholiwo akeshisa, kata nindali shinga mulala wabakhaana abakholibo ta.
14Mana khusaa yokhulia Boazi namulanga, ari Yitsa, olie khumukaate kuno, notonga mudivai eyiraanyile yino. Kho niyeekhala nabachesi; Boazi namukaamila imele inziyile, nalia, niyeekura, ebindi nibitong'a. 15Nolwa yali nabuushile natsiile okhuruluma, Boazi nalaka abasooliilibe ari Leshe arulume kata hakari mubinywa, ni nuramuloshela ta. 16Kata mutsomolekhwo eyindi mubinywa, muchileshe, arulume; muramuhalabila ta.
17Kho yaruluma mumukunda okhuula olwa bweela, nahuula eyo eya yali naruluume, niyiba shinga efa ndala yeishayiri. 18Nachiyila natsia mwitaala, namanyia nyakhufialanyene eya yali naruluume; khandi yarusia ebio ebia yatong'a ninabio olwa yali niyeekuure, namuheelesia. 19Nyakhufialanyene namureeba mbu Oruluume heena leelo? Okholilenje heena? Aheebue ikhabi oyo oukhwitsuliile. Mana yamuboolela nyakhufialanyene akomundu owa akholileyo emilimo, ari Eliira liomundu owa ekholileyo emilimo leelo niye Boazi. 20Naomi nasunjila nyakhufialanyene ari Aheebwe ikhabi yOMWAMI, ouraleshile okhubakholela akeshisa abalamu nende abafu bosi ta! Naomi namuboolela mbu Omundu oyo nomwikho weefwe, omuluyia ouli ahambi. 21Rutsi omukhaana omuMoabu nakalusia mbu Khandi yambooleele mbu Otong'e ahambi nabakholi banje, okhuula olwa balaba nibamalile lichesa lianje liosi. 22Naomi nasunjila Rutsi nyakhufialanyene ari Mukhaana wanje, nobulayi mbu otsiitsenje nabakhaanabe, abandu baleshe okhukhukwakhwo mumukunda kundi. 23Kho yatong'a ahambi nabakhaana baBoazi okhuruluma, okhuula khubumaliilishi bwelichesa lieishayiri nende elieingano; ne namenyanga nanyakhufialanyene.
Currently Selected:
Rutsi 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975