Tsinjelo 24
24
1Orakhaayilwa abandu ababii,
kata oreekomba okhuba halala ninabo ta.
2Okhuba emioyo chiabwe chiyililisinlia akamahababa,
ne eminwa chiabwe chiboolanga amatamaanu.
3Inzu yumbakhungwa nobuchesi,
niyiralisibwa nokhumanyilisia.
4Ne mubumanyi, ebisika biitsusibungwamwo emiandu chiosi emilayi echiolukoosi muno.
5Omundu omuchesi ashila owetsingufu;
nomundu wobumanyi ashila owamaani.
6Okhuba khumeebaalo amachesi, olaseera lihe;
ne mubachesiyii abanji nimwo omwa obuhuli buli.
7Obuchesi buyomba omusilu;
shiachinga omunwa muluyia ta.
8Oyo oukasinjia okhukhola obubii;
abandu balamulanga mbu omundu weinzoka.
9Okhukasia akobusilu nobwonooni;
omukokonyi naye neshisinyo khubandu.
10Noba nokuyanguya munyanga yeshibii,
amaaniko namatuutu.
11Ohonie abo abayilungwa okhufwa,
ne abeekhwesanga nibatsia okhwirwa, obakayile.
12Noba noboola ori Lola, shikhwamanya yaka ta;
kho ouchelanga emioyo shiakheetsulilanga noho?
Oulindanga omwoyokwe, shiakamanyile?
Ne shialarunga buli mundu omulimokwe shinga olwa kuli?
13Mwana wanje, oliitsenje obuushi, okhuba nobulayi;
khandi okhuroonya khweshicheyo neshimilamili khumunwakwo.
14Ne omanye mbu obuchesi buli burio khumwoyokwo;
noba nobunyoolile, kho tsindaalo tsishili imbeli,
obunaayibwo nabwo shibulapaya ta.
15O iwe omutamaanu, orakoneshela eshimenyo shiomulunjishi;
orasasia hangowe tawe;
16Okhuba omulunjishi akwitsanga eshimusaafu, nabuukha;
ne amasila kakwisilia elala abatamaanu.
17Oreekhoya olwa omusukuwo akwitsanga,
kata omwoyokwo kurasangaala olwa yeesichirala ta;
18OMWAMI yakhalola, mana nikamusinyisia,
nashiukhasia oburimabwe okhurula khuye.
19Orahenda khulwa abakholi bobubii,
kata okhukhaaywa abatamaanu ta;
20okhuba akeinziayo kabula khumubii;
itaha yomutamaanu yilasimibwa.
21Mwana wanje, oriitsenje OMWAMI nende omuruchi;
ne orabakhaya ta;
22okhuba amasila khalabuukha meetsukhana akarula khubo,
kata niwina oumanyilekhwo okhutiba okhunyala okhurula khubo?
23Kano khandi namasungo kabachesi; mbu
Mubukhalachi, shibuli bulayi okhukhola ebiela mubandu ta.
24Oyo ouboolelanga omumayaanu ari Iwe oli omulunjishi,
abandu balamunyeka; alasinya amahanga kabandu.
25Ne abakuuma ababii balakaasa,
ne ikhabi indayi yilabakwira.
26Oukalusinjia likhuwa habwene,
atsunzuunanga omunwa.
27Kasia omulimokwo elwanyi, ne omukunda okurecheshe;
mana olunyuma wumbashe inzuyo.
28Orarumbula obuloli khuwashio harali eshufune,
kata okhukaatinjia nomunwakwo ta.
29Oraboola ori Ndalamukholela shinga olwa yayakholeele;
ndalamurunga omundu oyo obukholibwe shinga olwa buli, tawe.
30Ndabirila khumukunda kwomukara,
khumukunda kwemitsabibu kwa oyo oubula oburechelefu
31khane kwali nikwayumba ebisisia kwosi, mwosi nimwalandamwo isambakhulu;
olukaka lwakwo lwamachina nalwo lwali nilwalibulukha.
32Mana nihenga, niyililisia bulayi;
nindola, mana ninyoola obuchesiyibwi.
33Mbu orutoolo rutu, nokhurenjeetsa khutu,
nokhwifumbeelela hatu khulwa okhuhuluukha;
34nolwa obumananibwo bulakhwitsila shinga omunuuli,
ne obutakhabwo shinga omundu owiboyile ebilasanilo.
Currently Selected:
Tsinjelo 24: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
