Filemoni 1
1
Lishiesio
1Eyirula khuPaulo, omubohe waKristo Yesu nende khuTimotseo omwana weefwe; yule khuFilemona, omuheelwa weefwe, omukholi owashieefwe, 2nende khuApofia omukhaana weefwe, nende khuArikipo omusikari owashieefwe, nende khukanisa eyili munzuyo. 3Obukoosia bube khwinywe, nende omulembe, ebirula khuNyasaye Seefwe nende Omwami Yesu Kristo.
Obuheeli bwaFilemona, nobusuubilibwe
4Emuupilanga Nyasaye wanje mbu orio tsindaalo tsiosi, nikhurumbula mukhusaaya khwanje, 5nimbuliile akobuheelibwo nende obusuubili obwa oli ninabwo khuMwami Yesu, khandikhubatakatifu bosi. 6Ekhusaayilanga mbu obusanjilani bwobusuubilibwo bube nobunyali mubumanyi bwabuli lilayi elibeetsanga mwifwe khulwa Kristo. 7Shichila ndali nobusangaali obunji nende obuhabinwi mubuheelibwo, okhuba emioyo chiabatakatifu chiahuluusiibwe khululwo, mwana weefwe.
Paulo yasaayila Onesimo
8Niko akachila, kata olwa ndakhanyala muKristo okhukhubiila katong'ane khukakhoyeele 9khane khulwa obuheeli ndakhakhusaaya busaaya; shichila nisie Paulo omusaakhulu, khandi bulaano endi omubohe waKristo Yesu. 10Ekhusaayile khulwa omwana wanje owa ndeebula mumbohe yanje; niye Onesimo.
11Khale, toto, shiyali oweinganga khwiwe ta; ne bulaano noweinganga khwiwe khandi nende khwisie. 12Emuruma bulaano akhukalushile, ye omwene, shia omwoyo kwanje kwene. 13Ndakhachamile okhumwikhasia hano aha endi mbu yakhalabanile mububohe khulwa injiili, mushilenjeshio. 14Nebutswa shinzenya okhukholakhwo likhuwa liosi harali okhunyoola omunwakwo ta; mbu obulayibwo buraba obwokhuhachilisibwa ta, habula obwokhuchama. 15Okhuba haundi lino nilio eliachilile nakhurulakhwo eshise, mbu mana obeetsenje ninaye inziayo. 16Ne araba omusumba khandi ta, habula ashila omusumba, ne nomwana weefwe omuheelwa khwisie muno muno; nokhushila muno khwiwe, kata mumubili, kata muMwami.
17Kho noba niumbasia mbu endi oweshisango shilala ninawe, omwinjisie shinga olwa wakhanzinjisia isie. 18Ne naba niyakhwonoonela, kata nali nelikobi liosi, olibale khwisie. 19Isie Paulo engahandiika nomukhono kwanje omwene, mbu Ndalarunga; endeshe okhukhuboolela shinga olwa oli nelikobi lindi khwisie, nikwo omwoyokwo kwene. 20Toto, mwana weefwe, enyoole lilayi elirula khwiwe muMwami; umbuluusie omwoyo muKristo.
21Ekhuhandiichila nikhwisiika mbu umbulilanga, nimanyile mbu olakhola kata akashila kano aka emboola. 22Ne halala nende ako, ungasilie aha okhukona; shichila enaaya mbu khulwa okhusaaya khweenywe ndalafuchiililwa okhuula ewa muli.
Amashiesio akahelelesia
23Epafura, omubohe owashianje muKristo Yesu, akhushiesiye, 24nende Mariko ario, naArisitariko, naDema, naLuka, abakholi abashianje.
25Obukoosia bwOmwami weefwe Yesu Kristo bubeetsenje naroho tsieenywe. Amina.
Currently Selected:
Filemoni 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
