Isaya 58
58
Akokhulinda lsindaalo tsiokhuhonga inzala
1Lanjilisia butinyu, oralekha ta;
chinga omwoyo shunga olwika,
boolela abandu banje akobukhayi bwabwe,
nende abeinzu yaYakobo akebionoono biabwe.
2Ne khane bakhaabanga khatsotselo,
nibasangaalila okhumanya tsinjila tsianje;
shinga lihanga liabakholanga akobulunjishi,
nibaralekha obukhalachi bwa Nyasaye wabwe ta,
nolwa basabanga obukhalachi bwobulunjishi,
nibasangaalila okhusita ahambi nende Nyasaye.
3Bari Mbushiina nikhuhonjile inzala, nawe noralolanga ta?
Mbushiina nikhwinyasiye abeene,
nawe noramanyanga ta?
Lole, khunyanga eya muhonjelangamwo inzala, mwinyoolelanga abeene ebia muchama,
nimunyasia abakholi beenywe bosi.
4Lole, muhonganga inzala mbu musoolane nende okhuyingana,
nende okhuupana netsifuusi tsiobumayaanu;
okhuhonga khweenywe khwaleelo shikhulachila emioyo chieenywe chihulilwe mwikulu tawe.
5Ne okhuhonga okhwa ndalobola khufwana khurio noho?
Mbu inyanga olwa omundu yeenyasie omwoyokwe?
Nokhwinamia omurwekwe shinga olusi,
nokhwala ingubo yelikunia nende likoshe hasiwe noho?
Kho wakhalanga yino eyokhuhonjelamwo inzala,
kata inyanga eyifuchiililwa nende OMWAMI noho?
6Khuno shikhuli nikhwo okhuhonga okhwa ndalabola?
Mbu okhutendeyia emikoye chiobumayaanu,
nokhuboholola tsikhoba tsielikokolo,
nokhulekhuula abamiinungwa,
khandi mbu mufunache buli likokolo?
7Shikhuli nikhwo okhukabila abali inzala ebiliibwabio,
nokhuleera munzuyo omumanani oubula eshimenyo?
Nolwa olola ouli eshihechenye, mbu omufwalekhwo,
khandi mbu oleshe okhwibisila abali bamabanga malala ninawe?
8Mana obulafubwo bulafwinda shinga okhushia khwomutsuli,
okhuhonibwakhwo nakhwo khulamela bwangu;
khandi obulunjishibwo bulakhuranjilila;
oluyali lwOMWAMI lulakhumaliilishila inyuma, mbu lukhulinda.
9Mana olalanga, ne OMWAMI alakalusia;
olamuhaabila, naye alakalusia mbu Endi hano.
Noba norusia hakari mwiwe likokolo,
nende okhusiomesia olwala nende okhuboola obumayaanu;
10khandi noba nohaanila oulumwa inzala, shieneshio eshia omwene wenyile,
niwikusia oyo ousanda;
mana obulafubwo bulalangaalila mushiilima,
mushiisisieshio nishiba shinga eshiteere;
11khandi OMWAMI alakhwibaalilanga injila obushia nobushia,
nakhwikusia mubuumu,
natinyisia amakumbako;
ne olaba shinga omukunda okutsushiililungwa amatsi,
khandi shinga isebele yamatsi,
eya amatsi kayo shikaakamanga ta.
12Nabandubo baloombakha mumakundako kakhale;
olasinjisia tsinzu khumise chietsinzibulo tsiakhale;
khandi olalangwa mbu Omusinjisii weshibanga,
Omukalusii wetsinjila etsiokhumenywakhwo.
Akokhulinda isabato
13Noba niwikalila eshilenjeshio khusabato,
oburakhola aka omwene wenya khunyanga yanje indakatifu ta;
nolanga isabato mbu eyokhusangaala,
khandi inyanga indakatifu yOMWAMI mbu eyoluyali;
nochiheelesia oluyali, norakholelanga khunjila ylyo omwene,
kata okhukhaaba aka omwene wenya,
kata okhuboola amakhuwa koko omwene ta;
14mana olasangaalila OMWAMI;
nasi ndalakhuchesia, nikhubisia habundu hachinguukhu hosi weshialo;
nikhuliisia obulaame bwaYakobo, so;
okhuba omunwa kwOMWAMI nikwo okuboolile.
Currently Selected:
Isaya 58: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
