Isaya 51
51
Amakhuwa kobulemia khuSayuni
1Murechele amarwi, inywe abalondanga obulunjishi,
inywe abakhaabanga OMWAMI;
lole olwanda okva mwabataswakhwo,
nende obwina obwa mwayabwamwo.
2Lole Aburahamu kuuka weenywe,
nende Sara owamwibula;
okhuba olwa yali mulala yenyene ndamulanga,
nimuheelesia ikhabi, nimwinjiyia.
3Okhuba OMWAMI yalemiye Sayuni omwoyo;
yalemiye amakunda kalio kosi omwoyo,
nakhola eshitsiimi shialio shinga Edeni,
nende eshitsiimi shialio shiomuyeshe shinga omukunda kwOMWAMI;
omwikhoyo nende obusangali bilanyoolekhamwo,
tsinyimbo tsiokhumwishiela Nyasaye, nende omwoyo kwobukhana.
4Mumbulile, inywe abaana banje;
nimurechela amarwi inywe abelihanga lianje;
okhuba obwibaali bularula khwisie,
obuyaasii bwanje obwatoto nibuba obulafu khumbia tsiabandu.
5Obuhuli bwanje buli ahambi,
obuhonia bwanje burulile ebulafu,
khandi amakhono kanje kalaruka tsimbia tsiabandu;
tsinguku tsilaninda,
nitsiisiika omukhono kwanje.
6Chinguule tsimoni tsieenywe muhenje mwikulu,
nimulola eshialo hasi;
okhuba likulu lilakhamuukha shinga omwosi,
eshialo nashio shilakofula shinga eshiifwalo,
nabo abamenyangamwo balafwa shinga tsinyende;
habula obuhonia bwanje bulabeetsangaho obushia nobushia,
obunyali bwanje obuhoninjia shibularusibwaho ta.
7Murechele amarwi, inywe abamanya obulunjishi,
abandu aba obwibaali bwanje bubeetsangaho mumioyo chieenywe;
murarie okhuseywa nabandu,
kata okhufwa omwoyo olwa bamunyeka ta.
8Okhuba amatsilili kalabalia kutu shinga ingubo,
khandi tsinyende tsilabalia shinga obwoya bwamakondi;
ne obunyali bwanje obuhoninjia bulabeetsangaho obushia nobushia,
obuhonia bwanje okhuula khubisoni nebisoni.
9Buukha, buukha, wifwale amaani,
iwe omukhono kwOMWAMI;
buukha shinga mundaalo tsiakhale,
munzibulo tsiakhale.
Shiwali iwe owarema Rahabu ebitonye ebltonye,
owafumira okuyokha?
10Shiwali iwe owakhamia inyanza,
amatsi kolusiba olukhongo;
owakhola tsisiba tsiomunyanza injila,
mbu abanunulwa mana babirekhwo?
11Nabanunule bOMWAMI balachelela,
niboola eSayuni nibeemba.
Okhwikhoya khwobumeli khulaba khumirwe chiabwe;
balanyoola obusangaafu nende omwikhoyo,
neshibeela nende okhushenya bilahwaho bwangu.
12Isie omwene nisie oulemia omwoyo;
nawe obeele orie, ouriitsanga abandu abeetsa okhufwa,
nende abaana babandu abeetsa okhukholwa shinga obunyasi,
13niwibiliile OMWAMI Omulonjiwo,
owabambula likulu,
nakhupa eshialo omuse;
noriitsanga obushia nobushia, inyanga yosi,
khulwa obululu bwa oyo oukhusandia,
olwa yeekasia okhutibia?
Ne obululu bwa oyo oukhusandia buli heena?
14Omuhambe alabohololwa bwangu;
shialafwa niyeeshela mubuko ta,
kata ebiliibwabie shibilaakama tawe.
15Shichila nisie OMWAMI Nyasayewo,
outubuulanga inyanza, amarunda kayo nikahoola;
OMWAMI omwene mahe nilio eliiralie.
16Khandi ndareele amasungo kanje mumunwakwo,
nikhushinga neshiinikha shiomukhono kwanje,
mbu embambule likulu,
nikhupa eshialo omuse,
nisunjila Sayuni mbu Niwe oluyia lwabandu banje.
17Buukha, buukha! Osinjile, iwe Yerusalemu,
iwe ounyweele, khumukhono kwOMWAMI,
khushikombe sluobululubwe;
eshisanda shiokhumeesia,
onyweelekhwo nomalila elala.
18Abulaho oumwibaalila injila mubaana bosi aba yeebula;
kata abulaho oumutiila omukhono khubaana bosi aba yoola.
19Kano kabili kakhukwiliileowanokhwikhuule niwina?
Mbu okhukwisibwa likunda nokhumululwa, khandi inzala nolukanga;
owanokhulemia omwoyo niwina?
20Abaanabo, olungoyi lubakwisiye,
bakona hashihesi wemihanda chiosi,
shinga imbongo mulukhanda;
beetsuulemwo obululu bwOMWAMI,
obulosheli bwaNyasayewo.
21Khulwako, kho bulaano ohulile lino, iwe ousandile,
nomeelile, ne shikhuli khulwa idivai ta;
22kano niko aka Omwamiwo, niye OMWAMI,
khandi Nyasayewo oufunaanila eshiina shiabandube,
aboola; mbu
Lole, erusiye mumukhonokwo eshikombe shiokhumeesia,
nishio eshisanda shiobululu bwanje;
shiolishinyweelakhwo khandi ta;
23ne ndalara eshikombe eshio mumukhono kwabasandiibo,
abakhusunjiile bari
Yinama, mbu khubirekhwo;
nawe walile omukongokwo shinga liloba,
khandi shinga omuhanda, mbu babirekhwo.
Currently Selected:
Isaya 51: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
