Isaya 1
1
Lihanga elionooni
1Lino nilio libisulo liaIsaya waAmozi, elia yalola khuYuda nende Yerusalemu, mundaalo tsiaUzia, naYotamu, naAhazi, nende Hezekia, abali abaruchi baYuda.
2Iwe likulu, hulila, nawe eshibala reka amarwi;
okhuba OMWAMI aboola ari Ndaliisiye abaana nimbakhusia,
nabo nibakhaya.
3Ing'ombe yamanya omweneyo,
isishili nayo yamanya olwelo Iwomwami wayo;
ne Isiraeli shiyamanyile,
abandu banje babula obumanyilisii.
4Woowe, lihanga elionoonanga,
abandu abasitoheelwe nobumayaanu,
olwibulo lwabakholi betsimbii,
abaana aboonooneeshe!
Bamuleshile OMWAMI,
bamufwolile Omwenoyo Omutakatiful waIsiraeli,
bamufutariile nibakalukha inyuma.
5Mbushiina nimushienya okhuupungwa,
olwa mumeetanga murio okhukhaya?
Omurwe kwosi kulwala,
omwoyo kwosi nakwo kutorile.
6Okhurula khubilenje okhuula khumurwe,
hahumaho ahalamba;
yaha lifumire, yaha omuchishila,
yaha likhupache elishiraatsa;
ne okhufwinywa ta, kata okhubohwa,
kata okhutosilibwa amafura.
7Eshialo shieenywe nelikunda;
amataala keenywe kasambilwe nomulilo;
liloba lieenywe, abarende baliliitsanga nimulola;
likwile likunda, shinga elimuluulwe nabarende.
8Naye omukhaana waSayuni aleshilwe shinga litili mumukunda kwemitsabibu,
shinga liyindu mumukunda kwamahondo,
shinga litaala elibotokhaanwe nende abasuku.
9Narali OMWAMI omwene mahe owakhulesheele abahonamwo abatiiti,
khane khwakhabeela shinga Sodomu,
khwakhafwanaane shinga Gomora.
Omulango kwobwikalukhasii bwatoto
10Inywe abaruchi baSodomu,
hulile likhuwa liOMWAMI;
inywe abandu baGomora,
mureche amarwi khubwibaali bwaNyasaye weefwe.
11OMWAMI aboola mbu Obunji bwemisango chieenywe echia mumalilanga bungaasila shiina?
Enyaliishe emisango emisambe chiamamiiku,
nende amasinya kebinulu;
kata shisangaalila amalasile ketsisurusi,
kata akamakondi, kata aketsikhole tawe.
12Olwa mwinjilanga okhulolekha imbeli wanje,
niwina owenyile likhuwa lino khwinywe,
mbu mutubanjile munyanyi tsianje?
13Muraleera khandi ebihaanwa ebiabutswa ta;
amalesi kelubuuliesi neshisinyo khwisie;
omwesi omutoro nende isabato,
okhukhung'aasia emikhung'aano
akobumayaanu nende libukaana kanyoonyiye.
14Emiesi chieenywe emitoro, nende emilukha chieenywe,
bisinyanga omwoyo kwanje;
bisitoheele;
enjoonyile okhubiisimilisilia.
15Nolwa mukalikha amakhono keenywe,
emubisila tsimoni tsianje;
toto, olwa muboolanga amasaayo amanji shimbulilanga ta;
amakhono keenywe keetabaliile amatsayi.
16Mwiyosie nimwilabia;
yinieho mumoni mwanje obubii bwebikhole bieenywe;
leshenje okhukhola obubii;
17mweche okhukhola obulayi;
khaabe obukhalachi bwatoto,
khoonye abeenabo abasandibwa,
kabukhasilie ababisandu amakhuwa,
soole abakhasi abalekhwa.
18OMWAMI aboola koo:
Bulaano mwitse khukhalache amakhuwa;
kata ebionoono bieenywe nibili shinga iranji iranzayi,
bilalaba shinga itsaluchi;
kata nibiakhanya shinga ipala,
bilaba shinga obwoya bwamakondi amalafu.
19Nimuba nimufuchiilila, nimuba abahulili abakholanga aka mulakwa,
kho mulaliitsanga ebilayi ebiomushialo;
20ne nimuba nimukhaya nimuba abeinumba, mulamululwa nolukanga;
okhuba omunwa kwOMWAMI nikwo okuboolile yaka.
Obuyaasibwi bwaSayuni, nende obununulwi bwalio
21Shimulola shinga litookho eliisikwa olwa liikholile omutamba!
Omwenoyo owalinji niyeetsuulemwo obukhalachi bwatoto!
Obulunjishi bwalinji nibumenyanga muye,
ne bulaano nabeeri.
22Ifeetsayo yikaluule amamuma,
idivaiyo nayo yitsokaanilemwo amatsi.
23Abakhulundubo nabakhayi,
nabeetsa babeebi;
buli mundu khubo ayanzanga ebiomufuusi,
nibalondachilila amatani;
shibakabukhasinjia ababisandu amakhuwa,
kata amakhuwa kabakhasi abalekhwa shikoolanga imbeli wabwe ta.
24Niko akachila Omwami naboola,
niye OMWAMI omwene mahe,
Omwene Bunyali waIsiraeli, mbu
E, ndaleehuluusilia khubo abafukulanga,
nimbamalila abasuku banje eshikwoli;
25khandi ndalakhushiukhasilia omukhono kwanje,
nikhusiiyila elala amamumako mushisambilo,
nikhurusiliamwo ibaati yosi eyatsokana mwiwe;
26khandi ndalakalusiaho abakhalachibo beshiina shinga olwa bali olwambeli,
nende abeebaalibo shinga olwa bali khukhuchaaka;
nolunyumakhwo olalangungwa mbu Litookho liobulunjishi, litookho eliisiikwa.
27Mubukhalachi Sayuni alanunulwa,
nabebe abakalukha, mubulunjishi.
28Ne obusasishi bwabakhayi nende obwaboonooni bulaba halala,
nabamuleshile OMWAMI nabo balatibibwa.
29Okhuba mulatiililwa tsisoni emiruba echia mweekombile,
nimufwimbwa omurwe khulwa ebianyi biebiraache ebia mwaloboola.
30Okhuba mulaba shinga omuruba okwa amasaafu kakwo kaniala,
khandi shinga ebianyi biebiraache ebihumamwo amatsi.
31Naye owamaani alaba shinga tsinanga,
khandi emilimochie shinga inzese;
alayia halala ninashio,
nabulaho oulasimia.
Currently Selected:
Isaya 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
