Omwilwatsi 10
10
Akarula mubusilu
1Tsisi tsifu tsichila amafura kabakasii bamalesi keshing'aari nikahunya obubolo;
ne nindio obuyingwa obutuutu nobusiro okhushila obuchesi noluyali.
2Omwoyo kwomuchesi kumuyeesia khumukhono musaatsa,
nokwomuyingwa, khumukhono mukhasi.
3Kata olwa omusilu achenda khunjila atamba oburechelefu,
naboola khubuli mundu mbu nomusilu.
4Oburima bwomuruchi nibuba nibukhubuushilakhwo, orarula mubwikhalobwo ta;
okhuba obwongoli buhootselesia obusinyisii obukhongo.
5Buliho obubii bundi obwa endolanga hasi weliuba, obwinga shinga okhukorwa, okhurula khumuruchi; 6mbu obuyingwa nibwikhasibwa emukulu, nabo abayinda nibeekhasibwa emwalo. 7Ndaluutsi abasumba nibachendela khufarasi, abakhulundu nibachenda hasi shinga abasumba.
8Ouyaba obuko, omwene alakwamwo;
ousasia olukaka, inzokha yilamurema.
9Ouyaba amachina, kalamutsuunia;
owasiaka tsikhwi anyala okhunyoola amaraba.
10Eshibia nishiba eshifuhu, omundu narashiyiakala ta,
kho khatimba ameetekhwo amaani;
ne obuchesi bumunyalila okhukaasa.
11Inzokha niyirema niyirashiarukwa ta,
kho omuruchi abula inganga.
12Amakhuwa akarula mumunwa kwomuchesi nakobukoosia;
ne omunwa kwomuyingwa kulamumila milu.
13Okhuchaaka khwamakhuwa komunwakwe nobuyingwa,
ne obumaliilishi bwokhusungakhwe namalalu amabii.
14Khandi omusilu yeenjiyinjia amakhuwa,
kata olwa omundu aramanya akali okhubaho ta;
ali heena oulamuboolela akeetsa okhubaho inyumawe?
15Emilimo chiomuyingwa chimuchoonyinjia;
kata shiamanyanga injila eyitsia mwitookho ta.
16Woowe, iwe eshialo, olwa omuruchiwo ali omwana,
abakhulundubo nibaliitsanga amasabo nikushili mutsuli!
17Oli oweikhabi, iwe eshialo, olwa omuruchiwo ali omwana wabeene shialo,
abakhulundubo nibaliitsanga khushise eshikhoyeele,
okhunyoola amaani, ne khulwa okhumeela ta!
18Khulwa obukara eshilama shihobokha;
ne khulwa obutofu bwamakhono inzu yiraatsangamwo ifula.
19Amasabo kakholwa khulwa tsinzekho;
idivai yitsatsahasia obulamu;
amapeesa nako niko amakalusio khumakhuwa kosi.
20Orafwola omuruchi, kata mumapaaroko;
kata orafwola abayinda noli mushisikashio shiokhukona ta;
okhuba linyonyi eliomulwanga lilachinga omwoyokwo;
eshili netsimbaha shilabuula likhuwa.
Currently Selected:
Omwilwatsi 10: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
