Okhukalushila 24
24
Amalako khukobukabukhani bwomusaatsa nomukhasiwe
1Olwa omundu aba naleera omukhasi, namuteeshia, naye naramuchamisia ta, shichila anyoolile muye likhuwa elirakhoyeele ta, kho amuhandiichile ibarwa yobukabukhani, nachimuheelesia mumukhono, namurusia munzuye. 2Ne olwa aba niyeenyooshe narulile munzuye, anyala okhutsia okhuteeshela omusaatsa undi. 3Ne omusaatsa oyo wakhabili naba namukiya, namuhandiichila ibarwa yobukabukhani, namurusia munzuye; kata omusaatsa owamuleera wakhabili oyo naba nafwa; 4kho omusaatsa owambeli, oyo owamuseebula, aramuleera abe omukhasiwe khandi ta, olwa aba namalile okhwonoonibwa; okhuba likhuwa elo neshisinyo imbeli wOMWAMI; orachila eshialo nishionoona, eshia OMWAMI Nyasayewo yakhuheelesia mbu shibe obulaame.
5Olwa omundu aba naleerile omukhasi omweha, aleshe okhurula atsie mwihe, kata okhulachilisibwa emilimo chindi ta; abe hango nali omulekhuule omuyika mulala, amusangaasie omukhasiwe owa aleerile.
Amalako kandi nakandi
6Omundu yesi aleshe okhubukula oluchina kata isio shibe omusingo ta; okhuba yakhaba nabukuule obulamu bwomundu bube omusingo.
7Omundu yesi naba nanyoolelesibwa niyeeba oundi owomubaana babwe, owomubaana baIsiraeli, namukholela shinga omukula, kata okhumukusia, kho omwibi oyo afwe; nilwo olwa olarusia obubii obuli hakari weenywe.
8Wiyile kahala muluumbe lwobuchele, mbu witsulilenje bulayi nokhola kosi aka abakuhani abaLawi balamwibaalila; shinga olwa ndabalaka, neenyu mwitsulilenje okhukhola murio. 9Witsulilenje aka OMWAMI Nyasayewo yakholela Miriamu khunjila olwa mwali nimurula eMisiri.
10Olwa oba nomuhosia owashio eshindu shiosi shiosi, oreenjila munzuye okhwenda omusingo ta. 11Osinjile butswa elwanyi, naye omundu owa ohosiye akhurusilie omusingo ewa oli elwanyi. 12Ne naba nali omumanani, orakona noli nomusingokwe ta; 13okhukalusia omukalusilie omusingo tsana olwa eliuba liyeela, mbu akone neinguboye, nakhusabila ikhabi; mana kalakhubeela obulunjishi imbeli wOMWAMI Nyasayewo.
14Oramumiina omukholi owahandiikwa omushaara, nali omumanani omutakha, kata olwa yakhaba owokhubaana beenywe, kata owokhubarende abomushialoshio, mwitaalalio, ta. 15Omuheelesinjie omushaarakwe buli nyanga, kata oralekha eliuba liyeele nikushili ta; okhuba nomumanani, khandi akureelekhwo omwoyo; aleshe okhuhaabila OMWAMI khukoko, nako nikaba mwiwe eshionoono.
16Basamwana baleshe okhwirwa khulwa akabaana babwe, kata abaana okhwirwa khulwa akabasamwana; buli mundu yeerwe khulwa eshio-noono shishie omwene.
17Orashiamia eshiina shiomurende kata omubisandu kata okhubukula eshiifwalo shiomukhasi omulekhwa shibe omusingo ta; 18ne mbu witsulilenje shinga olwa walinji omusumba muMisiri, naye OMWAMI Nyasayewo yakhununula nakhurusiayo; niko akachila nikhulaka mbu okhole likhuwa lino.
19Olwa oba nochesa lichesa eliomukundakwo, ne niwibiliile eshinywa eshiba mumukunda, orakalukhayo okhushienda ta; shibe eshiomurende, neshiomubisandu, neshiomukhasi omulekhwa; mbu OMWAMI Nyasayewo akhuheelesie ikhabi mumilimo chiosi chiamakhonoko.
20Olwa oba nobungulusia omutseitunikwo, oreeluula mutsisaka ta; tsibe etsiomurende, netsiomubisandu, netsiomukhasi omulekhwa. 21Olwa oba nonoka tsinzabibu etsiomumukundakwo, orarulumanga inyuma ta; tsibe etsiomurende, netsiomubisandu, netsiomukhasi omulekhwa. 22Witsulilenje shinga olwa walinji omusumba mushibala shiaMisiri; niko akachila nikhulaka mbu okhole likhuwa lino.
Currently Selected:
Okhukalushila 24: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
