Danieli 12
12
Akeshise shiobumaliilishi
1Mundaalo etsio Mikaeli alabuukha, omukhulundu oyo omukhongo ousinjilila abandubo; mana shilabaho eshise shiamasila; kata akafwana kario shikalikhwoho ta, okhurula olwa amahanga kachaaka okhubaho okhuula khushise eshio; ne khushise eshio abandubo balahonibwa, buli mundu oulanyoolekha niyahandiikwa mushitabu. 2Abanji khubeenabo abakona mulufu lweliloba balasisimukha, abandi khubulamu oburahwaho ta, nabandi khutsisoni nokhufwolwa okhurakhwaho ta. 3Abo abali abachesi balaakha shinga okhwakha khwobwiyangu obwihaanyu; kata abo abashiukhasia abanji khubulunjishi, balaakha shinga tsinyininyini, obushia nobushia. 4Nebutswa iwe, Danieli, yikala amakhuwa kano noboha eshitabu, okhuula khushise shiobumaliilishi; abanji baleelukhanga eyi nende eyi, obumanyi nibumeetekha.
5Mana isie Danieli ndahenga, ne mbabo, abandu babili nibasinjiile, oundi khundulo womwalo injelekha yino noundi khandi khundulo womwalo injelekha yilia. 6Mulala nasunjila omundu tsana owali niyeefwalile tsingubo tsieikitani, owali emukulukhwo hamatsi komwalo, ari Tsilaba tsindaalo tsinga okhuula khubumaliilishi bwakamakana kano? 7Nimbulila omundu tsana owali niyeefwalile tsingubo tsieikitani, owali emukulukhwo hamatsi komwalo, nachinguula omukhonokwe musaatsa nomukhonokwe mukhasi khwikulu, niyeetsuba khu oyo oubeetsangaho mwoyo ebisoni nebisoni, mbu kakhabaho eshise, nebise bibili, neinusu yeshise; khandi mbu olwa balaba nibamalile okhutubula obunyali bwabandu abatakatifu, ako kosi kalahl nikahweele. 8Nimbulila, ne shindatiila khushisina ta; mana nireeba mbu E omwami, akalarula mumakhuwa kano kalaba karie? 9Naye nasunga mbu Tsia butsia, Danieli; okhuba amakhuwa kano keekaalwe nikabohwa okhuula khushise shiobumaliilishi. 10Abanji balasiiywa nibalabibwa nibateemwa; ne ababii balakholanga obubii; kata abulaho khubabii oulatiila khushisina; ne abachesi nibo abalatiila khushisina. 11Okhurula khushise olwa omusango omusambe kwakhatsotso kularusibwaho, eshisinyo tsana eshionooninjia nishisinjisibwa, tsilaba tsindaalo eshikhumila ebikhumi bibili namakhumi shienda. 12Noweikhabi oulindiilila, niyoola khundaalo etsio eshikhumila ebikhumi bitaru amakhumi kataru natsiraano. 13Nebutswa iwe, tsia butsia, okhuula olwa obumaliilishi buliula; okhuba olahuluukha, ne olabuushila khumukabokwo khubumaliilishi bwetsindaalo.
Currently Selected:
Danieli 12: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
