Rom-noba 9
9
Naaŋmen Naŋ Kaa-iri Izerayɛl Noba
1N yele la a yelmeŋɛ a Kirista eŋɛ, N ba ŋmaara zirii. N zoma di la danseɛ a Vooroŋ Soŋ eŋɛ. 2N taa la posãã-kpoŋ ka n sukyiri dɔɔnɔ ma yaga zaa a ba taa baaroo. 3#Yiib 32:32 Bonso, N da na nɔnɔ la ka N meŋɛ da na waa neŋkaa-ennaa, ka ba ŋmaa ma iri bare a Kirista eŋɛ, a n noba zuiŋ, noba naŋ waa n zẽẽ noba, a nensaaloŋ poɔ. 4#Yiib 4:22; Begɛ 7:6; 14:1 Ba waa la Izerayɛl biiri ka Naaŋmen da e ka ba leɛ O bibiiri, ka ba so a puubu, a nɔ-eŋnee, a bege ane a O puoruu yɛlɛ ane a nɔɛ O naŋ da eŋ ko ba. 5#Mat 1; Luk 3:23-34; Gyn 1:1 Bana la so a sããkommine, a ba boorɔ poɔ la ka a Kirista yi a nensaaloŋ poɔ, Ona la di naaloŋ a noba zaa zu. Ka Naaŋmen nyɛ puubu tegitegilɛ. Ameena.
6 #
Sɔr 23:19; Rom 2:28 A ba e ŋa a Naaŋmen yelbiri da e kpaaɛ la. Bonso, a Izerayɛl biiri zaa naane sereŋ waa a Izerayɛl noba, 7#Piil 21:12 ka a Aboraham biiri meŋ zaa naane sereŋ waa o biiri; kyɛ, “A Aizik biiri la ka ba na boɔlɔ fo biiri.” 8#Gal 4:23 A ŋaa tɛgɛ la, ka a ba e biiri ba naŋ dɔge a nensaaloŋ poɔ la waa a Naaŋmen biiri, kyɛ a nɔ-eŋnaa biiri la waa O boorɔ noba. 9#Piil 18:10 Bonso, ŋaa la ka a nɔ-eŋnaa da yeli, “A saŋ ŋa tɔ, N na leɛ waana ka Saara taa la bidɔɔ.” 10#Piil 25:21 A zaa naane lɛ; yeli kaŋ naŋ yi ne a yeli ŋa da e la Rebɛka zie, saŋ na o serɛ a te sããkoma Aizik naŋ da e ka o taa o biiri poɔ. 11Haali sɛre kyɛ ka ba wa dɔge ba, bee ka ba da wa e yelsoŋ bee yelfaa zaa, (ka ka bon naŋ so ka Naaŋmen maŋ kaa-iri noba naŋ kyɛnɛ bebe gɛrɛ, 12#Piil 25:23 ka a ta e ka toma zuiŋ la kyɛ ka a e O boɔlaa zuiŋ) ba da yeli ko la a Rebɛka, “A bikpoŋ na tonɔ korɔ la a bibile.” 13#Mal 1:2-3 Aŋa ba naŋ da sɛge lɛ:
“N da nɔŋ la Gyekɔb,
kyɛ da kyiiri Esɔ.”
14 #
Begɛ 32:4
Boŋ ka te pãã na yeli? Naaŋmen mɔɔ boorɔ la bokyɛŋkyɛgre be? A koŋ baŋ waa lɛ togitogi! 15#Yiib 33:19 Bonso, O da yeli ko la Mooziz:
“N na zo la nyonono ne soba na zaa N naŋ boɔrɔ ka N zo o nyonono,
kyɛ taa nembaaloŋ ne soba na zaa N naŋ boɔrɔ ka N zo o nembaaloŋ.”
16 #
Efe 2:8
A lɛ zuiŋ a ba e nensaala poboɔbo bee o toma zie, kyɛ Naaŋmen naŋ zoro nembaaloŋ zie la ka a yi. 17#Yiib 9:16 Bonso, a gansoŋ yeli ko la Faaro, “N zɛge fo la ka fo do ka N wuli N kpeɛ̃õ naŋ be fo poɔ, ka ka ba na moɔle N yuori a tendaa zaa poɔ.” 18#Yiib 4:21 A lɛ zuiŋ la ka O pãã maŋ taa nyonono ne soba na zaa O naŋ boɔrɔ ka O zo o nyonono, a kyɛ dare soba na zaa sukyiri O naŋ boɔrɔ.
Naaŋmen Supuriyaaraa Ane O Nyonono Zoobu
19Fo pãã na yeli ko ma la, “Ka boŋ pãã so ka O naŋ kyɛnɛ nyɛrɛ te saanaa? Ka aŋ la na toɔ̃ zɔɔ ne Naaŋmen poboɔbo?” 20#Aza 45:9 Kyɛ nembuo sereŋ la fõõ nensaala, a na ŋmɛ nɔkpeɛne ne Naaŋmen? Bon ba naŋ meɛrɛ mɔɔ na toɔ̃ soore la a o meɛrɛ, “Bonso ka fo mɛ ma a ŋaa?” 21A dog-meɛrɛ ba taa faŋ a na de a yagraa o naŋ meɛrɛ ne, mɛ ne bon naŋ taa yuori ane bon naŋ ba taa yuori be? 22#Rom 2:4 Naaŋmen naŋ da boɔrɔ ka O wuli O supuriyaaraa, kyɛ e ka ba baŋ O kpeɛ̃õ, O da nyɔge la O meŋɛ a di kannyiri yaga ne a noba O suuri naŋ iri ne yaga zaa, bana ka ba da nare bare ka ba wɛ. 23#Efe 1:3-12; Rom 8:29 O da e la a lɛ ka ka ba baŋ O puubu naŋ e kpoŋ seŋ lɛ a ko noba na O naŋ zoro ba nyonono, bana la ka O da daŋ nare biŋ O puubu eŋɛ; 24a laŋ ne te meŋ O naŋ da boɔle, a ba e a Gyuumine yoŋ poɔ kyɛ a Nemboore-yobo meŋ poɔ. 25#Hoz 2:23 Aŋa O naŋ da sereŋ yeli a Hoziya gane poɔ lɛ:
“Banaŋ naŋ da ba waa N noba, N na boɔle ba la ‘N noba,’
ka noba na N naŋ da ba nɔŋ, N na boɔle ba la N ‘poyɛŋ noba.’ ”
26 #
Hoz 1:10
“Kyɛ a zie na ne o zu ba naŋ da yeli ko ba, ‘Yɛ ba waa N noba,’
be la ka ba na boɔlɔ ba a Naaŋmen-vore biiri.”
27 #
Aza 10:22-23; Rom 11:5 Kyɛ Azaaya ŋmeɛrɛ la kpɛlle kyaara ne Izerayɛl, “Aneazaa ka a Izerayɛl biiri da waa yaga aŋa mane biiree, kyɛ ba fẽẽ zie la na nyɛ faabo; 28bonso, a Daana na di la a andonɛɛ sɛrɛɛ wieũ zaa ane lɛ a naŋ seŋ ka a waa.” 29#Aza 1:9 Aŋa lɛ Azaaya naŋ da daŋ yeli:
“Ka a boma zaa Daana da ba bare a noba mine ko te ka ba voorɔ,
te zaa da na baare ŋa Sodom,
kyɛ da e ka te waa ŋa Gomora.”
A Izerayɛl Biiri Naŋ Ba Sage De Yɛlɛ
30 #
Rom 10:20
Boŋ ka te pãã na yeli? A Nemboore-yobo naŋ da moɔ nimiri boɔrɔ sonnoŋ, da nyɛ la mennoŋ, ona la, mennoŋ naŋ yi yeldeebo zie; 31#Rom 10:2-3 kyɛ a Izerayɛl biiri naŋ waa noba naŋ da moɔ nimiri boɔrɔ mennoŋ yire a bege poɔ, ba toɔ̃ tu a bege ka a tori. 32Boŋ pãã da so ka a ba waa lɛ? Bonso, ba da ba bɔ a mennoŋ ne yeldeebo, kyɛ da erɛ aŋa toma eŋɛ la ka mennoŋ yire. Ba da ŋmɛ la gbɛre a gbɛŋmɛ-le kuuri eŋɛ, 33#Aza 8:14; 28:16; Mat 21:42; 21:44 aŋa ba naŋ da sɛge lɛ:
“Yɛ nyɛ, N binne la kuuri Zaayɔn poɔ naŋ na e ka noba ŋmɛ gbɛɛ, piiri naŋ na e ka ba le,
kyɛ soba na zaa naŋ sage de O yɛlɛ koŋ di vi.”
Currently Selected:
Rom-noba 9: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.