Sɔroo 26
26
A Izerayɛl Biiri Nensɔre Boyi Soba
1A baaloŋ faa waabo puoriŋ, a DAANA da yeli ko la Mooziz ane a Naaŋmen bagmaala Aarɔn bidɔɔ Eleyaza: 2#Sɔr 1:2-47 “Yɛ sɔre a Izerayɛl laŋne noba zaa. Yɛ sɔre banaŋ zaa naŋ nyɛ yuomo lezare kyɛ duoro a yi ba sããkom-yie poɔ, a Izerayɛl biiri banaŋ zaa naŋ na toɔ̃ yi tammo.” 3A Mooziz ane a Naaŋmen bagmaala Eleyaza da yeli ko a Izerayɛl biiri a Mowab gbaŋgbalaa poɔ naŋ peɛle a Gyɔɔdan baa a tori a Gyeriko, a yele: 4“Yɛ sɔre a noba zaa naŋ nyɛ yuomo lezare kyɛ duoro” a seŋ lɛ a DAANA naŋ da yeli ko a Mooziz.
A Izerayɛl biiri banaŋ naŋ da wa yi a Igyipiti teŋɛ poɔ da waa la:
5 #
Piil 46:8-27; 1 Teŋ 4:7 Rubin a Izerayɛl bidɛndɛŋ. A Rubin biiri da la Hanɔk ka o bale noba da waa a Hanɔk noba ane Palu ka o bale noba waa a Palu noba; 6ka Hɛzerɔn bale noba waa Hɛzerɔn noba, ka Kaami bale meŋ waa Kaami noba. 7A Rubin bale noba yoe ba naŋ da sɛge noɔre da waa la dɔbɔ turi lezaayi ne ata a dɔgle kɔɔraayopoĩ ne lezare ne pie (43,730). 8A Palu biiri da la Eliyab, 9#Sɔr 16 ka a Eliyab meŋ biiri e Nemuwɛl, Deetan ane Abiram. A Deetan ane Abiram ŋa la ka a laŋne deme da kaa-iri kyɛ ka ba da leɛ zɔɔrɔ ne a Mooziz ane a Aarɔn a de ne a Koora saŋ ba naŋ da zɔɔ ne a DAANA. 10Kyɛ a teŋɛ da yuo la o noɔre a vɔle ba a laŋ ne a Koora, kyɛ ka vũũ wa di ba noba kɔɔraayi ane lezaayi ne pie (250) ko, ka lɛ e kpaamo ko a noba zaa. 11Anealɛzaa a Koora bidɔbɔ da ba kpi a lɛ daare.
12A Simion biiri bale da la; Nemuwɛl ka o bale noba waa a Nemuwɛl noba; ka Gyamin bale noba waa a Gyamin noba; ka Gyakin bale waa a Gyakin noba, 13ka Zɛra bale waa Zɛra noba; ka Sawul bale waa a Sawul noba. 14A Simion boorɔ noba zaa da waa la noba turi lezare ne ayi dɔgle kɔɔraayi (22,200).
15A Gad biiri a yi ba bale bale la bama: a Zɛfon bale da waa la Zɛfon noba; ka Haggi bale waa a Haggi noba; ka Suni bale waa Suni noba. 16Ozeni meŋ bale da waa la Ozeni noba, ka Eri bale waa Eri noba; 17ka Arɔd bale waa Arɔd noba; ka Areli bale waa Areli noba. 18A Gad bale noba ba naŋ da sɛge ba yoe da waa la noba turi lezaayi a dɔgle kɔɔraanuu (40,500).
19 #
Piil 38:7, 10 A Gyuda bidɔbɔ da la Ɛɛr ane Onan. A ba zaa bayi da kpi la a Keeina teŋɛ poɔ. 20A Gyuda bale noba la a bama: Sɛla ka o bale waa Sɛla noba; ka Pɛrɛz bale waa Pɛrɛz noba, ka Zɛra bale waa Zɛra noba. 21#Ruf 4:18 A Pɛrɛz boorɔ meŋ la ama: Hɛzerɔn, ka ba boɔlɔ o boorɔ noba Hɛzerɔn noba; ka Hamul bale waa Hamul noba. 22A Gyuda bale noba da la a bama. A noba ba naŋ da sɔre noɔre da waa la noba turi lezaata ne pie ane ayoɔbo a dɔgle kɔɔraanuu (76,500).
23A Isaka bale noba la tu taa a kyɛ: Tola bale la waa a Tola noba; ka Puva bale waa Pun noba; 24ka Gyasub bale waa Gyasub noba; ka Simirɔn bale waa Simirɔn noba. 25A Isaka bale noba ba naŋ da sɔre la bama. Ba da waa la noba turi lezaata ane anaare a dɔgle kɔɔraata (64,300).
26A Zɛbulun boorɔ meŋ la bama: Serɛd bale la waa a Serɛd noba; ka Elɔn bale waa Elɔn noba; ka Gyaaleel bale waa Gyaaleel noba. 27A Zɛbulun noba ba naŋ da sɔre la a bama. Ba da waa la noba turi lezaata a dɔgle kɔɔraanuu (60,500).
28A Gyosɛf bidɔbɔ ba naŋ da sɔre bale bale la bama: Manaasɛ ane Efirem. 29#Gyos 17:1-3 Manaasɛ boorɔ la bama: Makiri bale la ka ba da boɔlɔ a Makiri noba; a Makiri bidɔɔ la Gileyad. A Gileyad bale la a Gileyad noba. 30A Gileyad boorɔ la bama: Iyeza bale la Iyeza noba; ka Helɛk bale waa Helɛk noba; 31ka Asereyɛl bale waa Asereyɛl noba; ka Sɛkɛm bale waa Sɛkɛm noba. 32Ka Sɛmmida bale waa Sɛmmida noba; ka Hɛfa bale waa Hɛfa. 33#Sɔr 27:1 A Hɛfa bidɔɔ Zɛlofɛhad eŋ da ba taa bidɔɔ kyɛ pɔgeyaare yoŋ la ka o da dɔge. A Zɛlofɛhad pɔgeyaare yoe la ama: Maalah, Nowa, Hogila, Milka ane Tiriza. 34A Manaasɛ bale noba ba naŋ da sɔre la a bama. Ba da waa la noba turi lezaayi ne pie ane ayi a dɔgle kɔɔraayopoĩ (52,700).
35A Efirem boorɔ la bama: Sutɛla bale la a Sutɛla noba; ka Bɛkya bale waa a Bɛkya noba; ka Tahan bale waa Tahan noba. 36A Sutɛla biiri la bama: Eran bale ka o noba waa a Eran noba. 37A Efirem boorɔ noba banaŋ ba naŋ da sɔre da waa la noba turi lezare ne pie ane ayi a dɔgle kɔɔraanuu (32,500). A Gyosɛf biiri a yi ba bale la a bama.
38A Bɛngyamen biiri a yi ba bale la bama: Bɛla bale la waa a Bɛla noba; ka Asebɛl bale waa Asebɛl noba; ka Ahiram bale waa Ahiram noba. 39Sɛfufam bale la a Sufam noba; ka Hufam bale waa Hufam noba. 40Kyɛ a Bɛla bidɔbɔ la Aad ane Naiman. A Aad bale noba da la a Aad noba; ka a Naiman bale waa Naiman noba. 41A Bɛngyamen biiri bale noba banaŋ ba naŋ da sɔre yi ba bale la ŋa: ba da waa la noba turi lezaayi ne anuu a dɔgle kɔɔraayoɔbo (45,600).
42A Dan biiri bale la bama: Suham bale la ka ba da boɔlɔ a Suham noba. A Dan bale noba bale la bama. 43A Suham noba ba naŋ da sɔre da waa la noba turi lezaata ne anaare a dɔgle kɔɔraanaare (64,400).
44A Asɛ biiri a yi ba yideme poɔ la bama: Imnah bale ka ba boɔlɔ Imnah noba; ka Isevi bale waa Isevi noba; ka Beriya bale waa Beriya noba. 45A yi a Beriya biiri poɔ la ka a bale bama da yi; Heberi bale la ka ba boɔlɔ Heberi noba; ka Malkyiyɛl bale waa Malkyiyɛl noba. 46Kyɛ ka ba da boɔlɔ a Asɛ pɔgeyaa yuori ka Sɛra. 47A Asɛ bale noba ba naŋ da sɔre da waa la noba turi lezaayi ne pie ne ata a dɔgle kɔɔraanaare (53,400).
48Nafetali biiri a yi ba bale la bama: Gyaazeel bale ka ba boɔlɔ a Gyɛza noba; ka Guni bale waa Guni noba; 49ka Gyɛza bale waa Gyɛza noba; ka Silem bale waa Silem noba.
50A Nafetali noba bale ba naŋ da sɔre la a bama. Ba da waa la dɔbɔ turi lezaayi ne anuu a dɔgle kɔɔraanaare (45,400). 51A Izerayɛl biiri ba naŋ da sɔre da waa la dɔbɔ turi kɔɔraayoɔbo ne yeni a dɔgle kɔɔraayopoĩ ane lezare ne pie (601,730).
52A DAANA da yeli la yɛlɛ ko a Mooziz a yele: 53Poŋ a teŋɛ ko a noba bama fo naŋ sɔre ka o waa ba gbandi-bon a seŋ fo naŋ sɔre ba lɛ. 54Bale zaa noba naŋ waa yaga, fo na maŋ ko ba la zikpoŋ, kyɛ maŋ ko bale noba naŋ ba waa yaga zifẽẽ ka o waa ba gbandi-bon. Ko bale zaa gbandi-boma seŋ ba noba noɔre naŋ seŋ lɛ. 55#Sɔr 33:54; Gyos 14:2 Kyɛ ka yɛnee wa ponno a teŋɛ, yɛ ŋmɛ gbaŋ ka sããkom-yiri dendɔre zaa maŋ de ba gbandi-bon, a seŋ lɛ ba yoe naŋ da sɛge. 56A ba gbandi-bombɛrɛ ane a bombilii zaa ka yɛ na ŋmɛ a gbaŋ kyɛ di.
57 #
Yiib 6:16-25
A Levi noba ba naŋ da sɔre kyɛ sɛge ba bale yoe la ama; Gɛsɔn bale la ka ba boɔlɔ a Gɛsɔn noba; ka Kohat bale waa Kohat noba; ka Mɛrari bale noba waa Mɛrari noba. 58A Levi bale noba la bama: Libini bale, Hɛberɔn bale, Maali bale, Musi bale ane Koora bale. A Amiram saa da la Kohat. 59A Amiram pɔge naŋ da waa Levi pɔgeyaa yuori da la Gyokyɛbɛd. A Levi da dɔge la a o pɔgeyaa a saŋ ba naŋ da be a Igyipiti teŋɛ poɔ, ka a Amiram de o dɔge ne o biiri bama: Aarɔn, Mooziz ane ba yɔɔpuulee Miriyam. 60Aarɔn meŋ da dɔge la Nadab, Abihu, Eleyaza ane Itama. 61#Bag 10:1-2 Kyɛ a Nadab ane Abihu da kpie la ba naŋ da wa nyege vũũ naŋ ba seŋ ne a DAANA niŋesogɔ. 62A Levi bale dɔbɔ naŋ da nyɛ kyuu-gbuli kyɛ dɔgle ka ba da sɔre ba noɔre da waa la noba turi lezare ne ata (23,000). Ba da ba sɔre a Levi bale poɔ a Izerayɛl biiri poɔ bonso ba da ba eŋ ba nu a Izerayɛl biiri boma pommu poɔ.
63A noba bama la ka a Mooziz ane a Naaŋmen bagmaala Eleyaza da sɔre ka ba da be a Mowab wɛgyɛŋ naŋ peɛle a Gyɔɔdan baa a kyaare a Gyeriko teŋɛ. 64#Sɔr 3:1-39 A Izerayɛl biiri bama a Mooziz ane a Naaŋmen bagmaala Aarɔn naŋ da sɔre kanzaa da ba poɔ a nensɔre dɛndɛŋ ba naŋ da sɔre a saŋ ba naŋ da be a Sanae wɛgyɛŋ poɔ. 65#Sɔr 14:22-38 Bonso, a DAANA da yeli ko ba la, “Ba zaa na kpi la a wɛgyɛŋ poɔ.” Ba kanzaa da ba kyɛre a voorɔ ka Gyɛfunɛ bidɔɔ Kalɛb ane Nun bidɔɔ Gyosuwa yoŋ naane.
Dagaare First Bible © The Bible Society of Ghana, 2025.