Luk 23
23
Ba Naŋ Taa Yeezu Wa Ne Pilato Zie
(Matio 27:1-2, 11-14; Mak 15:1-5; Gyɔɔn 18:28-38)
1Lɛ la ka a noba zaa da iri lantaa, a taa Yeezu gaa ne Pilato zie. 2#Luk 20:25 A noba da piili ŋmaara la yɛlɛ dɔglɔ a Yeezu, a yele, “Te nyɛ la a dɔɔ ŋa ka O saana a teŋɛ. O ba sagra ka te yɔɔ zuyɔɔ ko a Naa Siiza, kyɛ yele ka Ona la a Kirista, a Naa.” 3Lɛ la ka Pilato soore a Yeezu, “Fõõ la a Gyuumine Naa be?” Ka a Yeezu yelsɔge, “Fõõ la yeli a lɛ.” 4A Pilato pãã da leɛ yeli ko la a Naaŋmen bagmaalkare ane a noba, “Maa eŋ ba nyɛ a dɔɔ ŋa yelsaanaa.” 5Kyɛ ka a noba maaleŋ yeli, “O toɔrɔ la a noba eŋnɛ taa ne a O kannoo a Gyudiya paaloŋ zaa poɔ, a yi a Galili teŋɛ O naŋ da piili a wa te tɔ a kyɛ.”
Ba Naŋ Wa Ne Yeezu A Hɛrɔd Zie
6A Pilato naŋ da woŋ a lɛ o da soorɛɛ la ka a dɔɔ e la Galili neɛ. 7#Luk 3:1 O naŋ da wa baŋ ka Hɛrɔd paaloŋ neɛ la, o da eɛɛ la ka ba taa O gaa ne a Hɛrɔd zie. A Hɛrɔd da be la a Gyeruzɛlɛm poɔ a lɛ saŋ. 8#Luk 9:9 A Hɛrɔd naŋ da wa nyɛ a Yeezu, O poɔ da pɛlɛɛ la yaga, bonso, o da woŋ la a O yɛlɛ ka a kɔɔre, a da boɔrɔ ka o nyɛ O ka O toŋ a toŋkpeɛne na mine ka o meŋ nyɛ. 9A Hɛrɔd da soore la a Yeezu yɛlɛ yaga te kɔɔre kyɛ O da ba yeli yeli zaa sɔge o. 10A Naaŋmen bagmaalkare ane a Naaŋmen bege wulwulibo da be la a be a toɔrɔ vũũ eŋnɛ. 11A Hɛrɔd ne a o sogyɛre gba da dɛge la a Yeezu yaga, a e O la. A de kpar-kpoŋ su O, kyɛ e ka ba leɛ taa O gaa ne a Pilato zie. 12A yi a lɛ daare gɛrɛ, Hɛrɔd ne Pilato naŋ da ba noma da leɛ e la bamine.
A Yeezu Kũũ Sɛrɛɛ Yɛlɛ
(Matio 27:15-26; Mak 15:6-15; Gyɔɔn 18:39—19:16)
13A Pilato pãã da boɔle la a Naaŋmen bagmaalkare ane a noba lantaa, 14a yeli ko ba, “Yɛ taa la a dɔɔ ŋa wa ne n zie, a yeli ka O dɔɔnɔ la a noba. N peɛre O la yɛ niŋesogɔ kyɛ N ba nyɛ O yelsaanaa zaa. 15A Hɛrɔd meŋ da ba nyɛ O yelsaanaa zaa lɛnso ka o e ka ba leɛ taa O wa ne a te zie. Serɛzaa, a dɔɔ ŋa ba taa yelsaanaa zaa naŋ seŋ ne kũũ. 16Azuiŋ, N na e la ka ba feɛ O kyɛ de O bare.” [17A Ista tigri saŋ naŋ da maŋ wa tara, a da maŋ fere la ka Pilato iri a nempɔgre kaŋ bare.]
18A noba zaa pãã da laŋ la taa a kyeere yaga zaa, “Yɛ ko a dɔɔ ŋa! Kyɛ iri Barabas ko te!” 19(Ba da pɔge la a Barabas ŋa, o naŋ da dɔ̃ɔ̃ a teŋɛ kyɛ ko noba zuiŋ.) 20A Pilato naŋ da boɔrɔ ka o iri a Yeezu bare zuiŋ, o da la yelee yɛlɛ ko a noba; 21kyɛ ka a noba da naŋ kyeerɛ yele, “Kpa O dagaraa zu, kpa O dagaraa zu!” 22A Pilato laboreŋ soore la a noba a gbɛre bota soba, “Wola, boŋ yeli faa ka O e? Maa eŋ ba nyɛ O yelsaanaa zaa naŋ seŋ ka ba ko O. N na e la ka ba feɛ O kyɛ bare O.” 23Kyɛ a noba da ba sage kyɛ yele ne nimizeɛ zaa ane kɔkɔkpeɛne ka ba kpa O dagaraa zu. A noba gɔmɔ da do gaŋ la a Pilato deni. 24Lɛ la ka a Pilato da fãã kyɛ tere noɔre ka ba e seŋ ba naŋ boɔrɔ lɛ. 25A Pilato da iri la a neɛ na ba naŋ boɔrɔ a bare. A neɛ ŋa la ka ba da pɔge nempagdie tendɔ̃ɔ̃ ane o neŋko zuiŋ kyɛ da de a Yeezu ko ba aŋa lɛ ba naŋ boɔrɔ.
Ba Naŋ Kpa Yeezu Dagaraa Zu
(Matio 27:32-44; Mak 15:21-32; Gyɔɔn 19:17-27)
26 #
Mat 27:32; Mak 15:21 Ba naŋ da taa a Yeezu gɛrɛ ne, ba te tuori la dɔɔ kaŋ ka o yi weɛ waana. A dɔɔ ŋa da yi la Saarin, ka o yuori di Saamon. Ba da nyɔge o la a e ka o tuo a dagaraa tuuro ne a Yeezu. 27Nembeɛoŋ da tuuro O la, ka pɔgeba da poɔ a kono gbɛlɛ nuuri a Yeezu zuiŋ. 28Kyɛ Yeezu da leɛ kaa ba la a yele, “Gyeruzɛlɛm pɔgeyaare, yɛ ta kono maa zuiŋ, kyɛ yɛ kono yɛmenne ane yɛ biiri yɛlɛ. 29#Luk 21:23 Bonso, a bebie waana la ka ba na yeli, ‘Pɔg-ɔɛ ane pɔgeba naŋ daŋ ba dɔge biiri, ane berɛ biiri naŋ daŋ ba ɛnne zu noma la.’ 30#Hoz 10:8; Yuo 6:16; 9:6 A noba pãã na piili yele korɔ la a taŋkponni, ‘Yɛ le dɔgle te zu,’ kyɛ yeli ko a tambilii, ‘Yɛ pɔge te.’ 31#1 Pit 4:17 Ka ba naŋ wa erɛ damaara ŋaa, wola ka ba na e a dakuoni?”
32Ba da taa la noba mine bayi naŋ e nenfaare, a poɔ a Yeezu eŋɛ a na te kpa a dagaraa zu. 33Ba naŋ da wa te ta a zie na ba naŋ boɔlɔ Zukoɔre, ba da kpa la a Yeezu dagaraa zu ane a nenfaare na bayi, kaŋ a O doloŋ seŋ, kaŋ meŋ a O gɔɔ seŋ. [34#Mat 5:44; Aza 53:12; Yiel 22:18 Lɛ la ka a Yeezu da yeli, “N Saa, di suuri ko ba, bonso, ba ba baŋ bonna ba naŋ erɛ.” Ba da de la a Yeezu bonsuuri ŋmɛ gbaŋ a poŋ taa.] 35Ka a noba da are a be kaara, kyɛ ka a nembɛrɛ da erɛ O laara a yele, “O faa la ba mine, O pãã faa O meŋɛ, ka O naŋ wa waa a Kirista, a Naaŋmen neŋkaa-iraa!” 36A sogyɛre meŋ da e O la la, a taa dããmiiruŋ mine a wa ko O, 37a yele, “Ka fõõ wa waa a Gyuumine Naa, faa fo meŋɛ wɛ!” 38Ba da sɛge la sɛgre a O zu sogɔŋ, “A Gyuumine Naa La A Ŋa.”
39A nenfaare na kaŋ ba naŋ da kpa a dagaraa zu meŋ da erɛ la a Yeezu laara a yele, “Fõõ naane a Kirista be? Faa fo meŋɛ ane te meŋ wɛ!” 40Ka a nenfaa kaŋ na soba nyare a o tɔsoba na zu a yele, “Ka lɛ fo ba zoro Naaŋmen, fõõ ne a dɔɔ ŋa dɔgroŋ naŋ waa yeni? 41Tenee eŋ seŋ ne la a dɔgroŋ ŋa, bonso, te nyɛrɛ la dɔgroŋ na te meŋɛ naŋ bɔ, kyɛ a dɔɔ ŋa eŋ ba e yeli faa zaa.” 42#Mat 16:28 Lɛ la ka o pãã yeli, “Yeezu, ta inni n yɛlɛ, ka fõõ wa kpɛ a fo naaloŋ poɔ.” 43Ka a Yeezu yelsɔge o, “Serɛzaa ka N yele korɔ fo, a zenɛ ŋa, fõõ ne ma na laŋ la taa a tenvelaa poɔ.”
A Yeezu Kũũ Yɛlɛ
(Matio 27:45-56; Mak 15:33-41; Gyɔɔn 19:28-30)
44A naŋ da wa peɛlɛ a ŋmenaa pozentaa, ligruŋ da pɔge la a tendaa zaa, a te ta ŋmenaa gbelli ata saŋ, 45#Yiib 36:35 ka a ŋmenaa da ligi, kyɛ ka a Naaŋmen die patiisa da kyeɛ̃, a poŋ ziiri ayi. 46#Yiel 31:5; Tom 7:59 A Yeezu pãã da kyeere la yaga zaa a yeli, “N Saa, fo nuuriŋ la ka N de N vooroŋ eŋ.” O naŋ da yeli a ŋaa la ka O da ŋmaa vooroŋ. 47A sogyɛre kɔɔ neŋkpoŋ naŋ da nyɛ lɛ a yɛlɛ zaa naŋ e, o da iri la Naaŋmen yuori a yele, “Serɛzaa, a dɔɔ ŋa da ba sãã yeli zaa.” 48A noba zaa naŋ da wa ka ba nyɛ a Yeezu dagaraa kpaabo, naŋ wa nyɛ a lɛ zaa naŋ e, ba da leɛ kuli ne la nuyoɔre. 49#Luk 8:2-3 Kyɛ a Yeezu nembaŋne ane a pɔgeba na zaa naŋ da tuuro O a yi a Gyudiya paaloŋ poɔ, da te are la tɔɔre zaa kyɛ kaara a yɛlɛ ama.
A Yeezu Ũũmu Yɛlɛ
(Matio 27:57-61; Mak 15:42-47; Gyɔɔn 19:38-42)
50A Gyuumine neŋkpoŋ kaŋ naŋ da waa nensoŋ kyɛ e nemmeŋɛ, ka o yuori da di Gyosɛf, 51#Luk 2:25; 2:38 eŋ da ba sage ne a ba poteɛrɛ ane a ba yel-erre kyaare ne a Yeezu koobo. A dɔɔ ŋa da yi la a Gyuumine teŋɛ kaŋ yuori naŋ di Aremateya, a da kyɛllɛ ka o nyɛ a Naaŋmen naaloŋ. 52A dɔɔ ŋa da gaa la a Pilato zie a te sɔre ka o ko o a Yeezu eŋɛ. 53Lɛ la ka o da yage a Yeezu eŋɛ, a de pɛmpelaa pilli page ne O, a gaa te ũũ yaa kaŋ ba naŋ nyɛ piiri zu, ka ba daŋ ba ũũ neɛzaa o poɔ sɛre. 54A da e la a Naroo bebiri daare, kyɛ ka a pɛnnoo bebiri da piili. 55#Luk 23:49 A pɔgeba na naŋ da tu a Yeezu yi a Galili wa, da tu gaa te nyɛ la O ũũmu zie ane lɛ ba naŋ gaale O a bogi poɔ. 56#Yiib 20:10 Ba pãã da leɛ kulee la a te nare turaali ane kãã-nyunoɔ.
Ba da pɛnnɛɛ la a pɛnnoo bebiri daare a seŋ lɛ a Naaŋmen nɔɛ naŋ biŋ.
Currently Selected:
Luk 23: DGA
Highlight
Share
Copy
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.
