Gyosuwa 2
2
Ba Naŋ Toŋ Pigripigribe Ka Ba Te Pigri A Gyeriko Teŋɛ Nyɛ
1 #
Gye 2:25; Hib 11:31 A Nun bidɔɔ Gyosuwa pãã da sɔgle toŋ la dɔbɔ bayi ka ba yi a Sitim teŋɛ gaa te sɔgle pigri a teŋɛ nyɛ. O da yeli ko ba la, “Yɛ gaa te sɔgle pigri a teŋɛ nyɛ, zuo a zaa a Gyeriko teŋɛ.” Lɛ la ka ba da gaa te kpɛ pɔg-gyɛnterɛ kaŋ yuori naŋ di Rahab yiri poɔ a te gaŋ be a tensogɔ saŋ. 2Ba da yeli ko la a Gyeriko teŋɛ naa, “Izerayɛl noba mine wa la a kyɛ a tensogɔ ŋa ka ba sɔgle pigri a teŋɛ nyɛ.” 3Lɛ la ka a Gyeriko teŋɛ naa da toŋ ka ba yeli ko a Rahab, “Taa a dɔbɔ na naŋ wa a fo zie, a wa kpɛ a fo yiri poɔ wa ne, bonso, ba waɛ la ka ba sɔgle pigri a teŋɛ zaa nyɛ.” 4Kyɛ a pɔge da taa la a dɔbɔ bayi te sɔgle. O pãã da yelee la, “Serɛzaa, a dɔbɔ wa la n zie kyɛ N ba baŋ zie na ba naŋ yi. 5A zie naŋ da wa te sɔɔrɔ, ka saŋ ta ka ba page a teŋɛ dendɔ-kpoŋ, a dɔbɔ da yi gaaɛ la. N ba baŋ zie na ba naŋ gaa. Yɛ digi ba wieũ zaa, bonso, yɛ na toɔ̃ digi page ba la.” 6Kyɛ a pɔge da taa ba la do ne a peɛzu a te e ka ba sɔgle mue o naŋ da biŋ a peɛzu poɔ. 7Azuiŋ, a noba a naa naŋ toŋ da yi tu la a Gyɔɔdan Baa sori a digi tu ba te ta ziiri na ba naŋ maŋ tu ŋmaa a baa. A noba na naŋ da digre ba naŋ deɛ da wa yi, ba da page la a teŋɛ dendɔ-kpoŋ.
8A noba naŋ da ba gbiri sɛre, a pɔge da do gaa la ba zie a peɛzu, 9#Yiib 23:27 a te yeli ko ba, “N baŋ ka a DAANA de la a teŋɛ ŋa ko yɛ, ka a lɛ e ka dabeɛ̃ kpɛ te kyɛ ka a teŋɛ noba zaa miine a yɛ niŋeŋ. 10#Yiib 14:21; Sɔr 21:24, 35 Bonso, te woŋ la lɛ a DAANA naŋ da e ka a Kantɛrɛɛ Mane#2:10 Kantɛrɛɛ Mane: Noba yaga maŋ boɔlɔ la a Kantɛrɛɛ Mane ka Manzeɛ. sere a saŋ yɛ naŋ da wa yi a Igyipiti teŋɛ poɔ. Te meŋ woŋ la lɛ yɛ naŋ e a Sihon ane Ɔge, a Amɔre deme namine bayi naŋ be a Gyɔɔdan man-gaŋne, lɛ yɛ naŋ da sãã ba zaa bare. 11#Yiib 15:14-15; Begɛ 4:39 Te naŋ deɛ da wa woŋ a lɛ, dabeɛ̃ da kpɛ te la ka te nuuri zaa yoɔre a yɛ zuiŋ. A DAANA yɛ Naaŋmen sereŋ waa la a saluoni naŋ be sazu ane a teŋɛ naŋ be a pareŋ Naaŋmen. 12#Gyos 6:23, 25 Pampana, N naŋ pãã e soŋ ko yɛ, yɛ pɔ a DAANA ka yɛ meŋ na e la soŋ ko a n yideme. Yɛ ko ma yelwulaa naŋ e meŋɛ 13ka yɛ na bare la a n saa ane n ma, a n yɔɔdɔbɔ ane n yɔɔpuuli ane a ba noba zaa, a faa te nyɔvoɛ yi kũũ poɔ.” 14Ka a dɔbɔ da yeli ko a pɔge, “Te de la a te nyɔvoɛ biŋ a fo nyɔvore zuiŋ! Ka fõõ ba wa yeli a te yeli ŋa ko neɛzaa, lɛ eŋ, te na e la soŋ ko fo kyɛ taa yelmeŋɛ ne fo ka a DAANA wa de a teŋɛ eŋ te nuuriŋ.”
15A Rahab pãã da eɛɛ la ka a dɔbɔ tu a takoro a zalle miri te sigi, bonso, a o yiri da mɛ mare la a teŋkpoŋ dankyini. O da kpeɛrɛ la a dankyini meŋɛ eŋɛ. 16A pɔge da yeli ko ba la, “Yɛ zo tu a tanne zu paaloŋ ka a banaŋ naŋ digre yɛ koŋ page yɛ. Yɛ te sɔgle a be beri ata te ta saŋ a banaŋ naŋ digre yɛ naŋ leɛ wa; a lɛ puoriŋ, yɛ pãã na toɔ̃ yi gɛrɛ la.” 17A dɔbɔ da yeli ko o la, “A poɔbo ŋa fo naŋ e ka te pɔ koŋ tuuro te 18nyɛ, ka fõõ ba wa leŋ a mize-tõẽtõẽ ŋa fo naŋ e ka te mele sigi a fo takoro eŋɛ a e ka a fo saa ane fo ma, a fo yɔɔdɔbɔ ane a fo yideme zaa wa lantaa a fo yiri poɔ ka tenee wa kpɛ ka te ŋma a teŋɛ. 19Ka neɛzaa wa yi a fo yiri poɔ gaa yeŋe, o soba kũũ na dɔgle la o meŋɛ zu, ka te koŋ taa saanaa zaa; kyɛ ka ba naŋ wa ko neɛzaa a fo yiri poɔ, lɛ eŋ, a soba kũũ na dɔgle la te zu. 20Ka fõõ wa yeli a yɛlɛ ŋa te naŋ wa e a kyɛ ko neɛzaa, lɛ eŋ, a poɔbo ŋa fo naŋ e ka te pɔ koŋ tuuro te.” 21A pɔge da yeli ko ba la, “Ka a e seŋ lɛ yɛ naŋ yeli.” A lɛ puoriŋ, a pɔge da bare ba la ka ba gɛrɛ. O pãã da leŋ la a mize-tõẽtõẽ a o takoro eŋɛ.
22Ba da yi la a be gaa te kpeɛrɛ a tanne zu paaloŋ a te bebe beri ata te ta saŋ a noba na naŋ digre ba naŋ da leɛ wa. A noba na naŋ digre ba da bɔ ba la a sori zaa zu kyɛ da ba nyɛ ba. 23Lɛ la ka a dɔbɔ bayi na da yi a tanne poɔ leɛ sigi wa. Ba da ŋmaa la a Gyɔɔdan Baa wa a Nun bidɔɔ Gyosuwa zie, a wa manne yelzaa naŋ page ba ko o. 24#Gyos 2:9 Ba da yeli ko la a Gyosuwa, “Yelmeŋɛ zaa, a DAANA de la a teŋɛ zaa eŋ te nuuriŋ; zuo a zaa, a teŋɛ noba zaa zoro la te dabeɛ̃, a miine.”
Dagaare First Bible © The Bible Society of Ghana, 2025.