Toma 8
8
1 #
Tom 7:58; 11:19 A Sɔɔl da sage ne la a banaŋ naŋ da ko a Stevin.
A Sɔɔl Naŋ Dɔgre A Puoruu Laŋne Deme
A bebiri na ne o zu, dɔgroŋ kpoŋ da le la a puoruu laŋne deme zu a Gyeruzɛlɛm poɔ, ka a noba zaa da zo yaare a Gyudiya ane a Samaareya paaloŋ poɔ, kyɛ te kyɛre a apostoliimine yoŋ. 2#Mat 14:12 A puoruu nimizeɛ noba mine da ũũ la a Stevin kyɛ da koŋ o yaga zaa. 3#Tom 9:1; 22:4 Kyɛ Sɔɔl da iri la o nimiri eŋ a puoruu laŋne deme. O da maŋ kpɛ la yiri ŋa poɔ a yi te kpɛ yiri ŋa poɔ a nyɔgrɔ dɔbɔ ane pɔgeba vuuro a te eŋ nempagdie poɔ.
Filip Naŋ Moɔle A Yelbiri Samaareya Poɔ
4A banaŋ naŋ da zo yaare da yi yoɔrɔ la, a moɔlɔ a yelbiri. 5#Tom 6:5 Filip da sigi gaa la a Samaareya teŋkpoŋ poɔ a te moɔle a Kirista yɛlɛ ko ba. 6A nembeɛoŋ naŋ da wa woŋ kyɛ nyɛ a yelwulii a Filip naŋ da erɛ, ba da laŋ la noɔre a wa kyɛllɛ a yɛlɛ na o naŋ da yele, 7#Mak 16:17 bonso, sefaare da kyeerɛ la yaga zaa kyɛ yire a noba enneŋ; ka noba yaga naŋ da waa gbɛrɛɛ bee wɔɔre da nyɛ sammo. 8#Gyn 4:40-42 A lɛ zuiŋ popeɛloŋ kpoŋ da be la a teŋkpoŋ na poɔ.
9Dɔɔ kaŋ yuori naŋ da di Saamon da daŋ erɛ la yelbeere a teŋkpoŋ poɔ, ka a Samaareya teŋɛ noba nɔɛ da maa, kyɛ ka o da yele ka o waa la gandaa. 10A noba zaa, a yi ba bile a te tɔ ba kpoŋ soba da eŋ la toori a kyɛllɛ a o yɛlɛ, a yele, “A dɔɔ ŋa la a Naaŋmen kpeɛ̃õ na ba naŋ boɔlɔ Gandaa.” 11Ba da eŋ la toori a kyɛllɛ o yɛlɛ, bonso, o da toŋ la nɔmaa toma ka a maa ba nɔɛ ka a kɔɔre. 12#Mat 28:19 Kyɛ a Filip naŋ da wa moɔlɔ a Naaŋmen naaloŋ yelnoore ane a Yeezu Kirista yuori yelnoore, ba da sage de la a Filip yɛlɛ a de suobu, dɔbɔ ane pɔgeba. 13A Saamon meŋ gba da sage de la a yɛlɛ. O naŋ da wa de a suobu baare, o da be la a Filip zie tegitegilɛ. A dɔɔ ŋa noɔre da maaɛ la ne a yelwulii ane a tonseɛlɛ o naŋ da nyɛ.
14A apostoliimine naŋ da wa woŋ a Gyeruzɛlɛm poɔ ka a Samaareya noba sage de la a Naaŋmen yelbiri, ba da toŋ la Piita ane Gyɔɔn ba zie. 15A ba bayi da sigi la a Samaareya a te puori ko ba, ka ka ba na toɔ̃ de a Vooroŋ Soŋ, 16(bonso, a Vooroŋ Soŋ da naŋ ba sigi wa ba kanzaa zie sɛre. Suobu yoŋ la ka ba da de a Daana Yeezu yuori eŋɛ). 17Lɛ la ka a Piita ane a Gyɔɔn da de ba nuuri pare ba zuri ka ba da de a Vooroŋ Soŋ. 18A Saamon naŋ da wa nyɛ ka a apostoliimine de ba nuuri pare a noba zuri ka ba nyɛ a Vooroŋ Soŋ, o da ko ba la libie, 19a yele, “Yɛ ko n meŋ a kpeɛ̃õ ŋa ka maa meŋ wa de n nuuri pare neɛzaa zu ka o soba meŋ nyɛ a Vooroŋ Soŋ.” 20Kyɛ ka a Piita da yeli ko o, “Ka fõõ ne a fo libiri zaa wɛ, bonso, fo teɛre ka fo na toɔ̃ da la a Naaŋmen kyɔɔtaa ne libiri! 21Fo nu kye a toma ŋa poɔ, bonso, fo poteɛrɛ ba veɛlɛ Naaŋmen zie. 22Leɛ a fo eebo yi a fo potuyɛlɛ poɔ, kyɛ sɔre a Daana ka anaŋ wa taa eebo ka O di a fo poteɛre faare suuri ko fo. 23Bonso, N nyɛɛ la ka fo taa la pokpegri kyɛ ka potuoluŋ banzɔlɔ leŋ fo taa.” 24Ka a Saamon da yelsɔge, “Yɛ puori sɔre a Daana ko ma ka a yɛlɛ ama kanzaa fo naŋ yeli ta page ma.”
25A Piita ane a Gyɔɔn naŋ da wa di a yɛlɛ ama danseɛ a kyɛ manne a Daana yelbiri baare, ba da la leɛ gaa la a Gyeruzɛlɛm, a moɔlɔ a yelnoore a Samaareya tembilii yaga poore.
Filip Ane Itopiya Dɔɔ-varaa Yɛlɛ
26A Daana maleke pãã da yeli ko la a Filip, “Iri tu a sapare nudoloŋ seŋ sori naŋ yi Gyeruzɛlɛm a sigre Gaza.” (A sori ŋa e la a wɛgyɛŋ sori.) 27A lɛ la ka o da vaa-iri gaa. A Itopiya teŋɛ dɔɔ kaŋ naŋ da waa dɔɔ-varaa da e la Kandase sɛrediribe neŋkpoŋ. A dɔɔ ŋa da e la a Itopiya pɔgenaa tontonɔ naŋ da kaara a pɔgenaa libie zu. O da wa la Gyeruzɛlɛm ka o wa puori 28kyɛ pãã da leɛ kulo. O da zeŋ la o wie-toriko poɔ a kanna a ŋmen-yelmanna Azaaya gansɛgraa. 29Lɛ la ka a Vooroŋ Soŋ da yeli ko a Filip, “Gaa a wie-toriko ŋa zie a te do kpɛ zeŋ poɔ ba poɔ.” 30A Filip pãã da zo ta la a wie-toriko a woŋ a dɔɔ-varaa naŋ kanna a Ŋmen-yelmanna Azaaya gane. O da soore o la, “Fo baŋ la a yɛlɛ ama fo naŋ kanna tɛgɛ be?” 31Ka o yelsɔge, “N na e la wola baŋ a tɛgɛ ka neɛ kaŋ ba wuli ma?” O pãã da boɔle la a Filip ka o do kpɛ a wie-toriko poɔ ka ba laŋ zeŋ. 32#Aza 5:7-8 A gane zie na o naŋ da kanna la ŋa:
“O da waa ŋa peroo ba naŋ taa gaa ne o koobo zie,
aŋa pelee naŋ are neɛ naŋ ŋmaara o kɔɔloŋ niŋesogɔ gbili lɛ,
o da ba haa o noɔre.
33Ba da eŋ O la vi poɔ a ba di O sɛrɛɛ ne yelmennoŋ.
Aŋ na toɔ̃ manne a O saŋ noba yɛlɛ?
Bonso, ba iri la o nyɔvore yi a teŋɛzu.”
34A dɔɔ-varaa da soore la a Filip, “Nembuo yɛlɛ la ka a Ŋmen-yelmanna ŋa da yele? O meŋɛ yɛlɛ la ka o da yele bee neɛ kaŋ yɛlɛ la?” 35Lɛ la ka Filip pãã da piili a manna a Ŋmen-yelmanna sɛgebo ŋa, a moɔle a Yeezu yelnoore ko o. 36Ba naŋ da naŋ be a sobiriŋ gɛrɛ, ba da wa ta la koɔ̃ mine; ka a dɔɔ-varaa yeli, “Nyɛ, koɔ̃ la be kyɛ! Boŋ la na pigi n suobu deebo?” 37#Mak 16:16; Mat 16:16 [Ka Filip yeli, “Fo na de la a suobu ka fõõ wa sage de a yɛlɛ ne fo poɔ zaa.” Ka a dɔɔ-varaa da leɛ yelsɔge, “N deɛ la ka Yeezu Kirista la a Naaŋmen Bie.”] 38O da eɛɛ la ka a toriko are ka ba zaa bayi sigi te kpɛ a koɔ̃ poɔ ka a Filip ko o a suobu. 39#1 Nam 18:12 Ba naŋ da wa yi a koɔ̃ poɔ, a Daana Vooroŋ da de la a Filip gaa ne ka a dɔɔ-varaa da ba la nyɛ o, kyɛ o pãã da de la o sori gɛrɛ ne popeɛloŋ. 40#Tom 21:8-9 Kyɛ a Filip da nyɛ la o meŋɛ ka o be Azotus teŋɛ poɔ, kyɛ o naŋ da tɔlɔ a paaloŋ na poɔ, o da moɔlɔ la a yelnoore a tenne zaa poore a te ta a Sezaareya teŋɛ.
Currently Selected:
Toma 8: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.