Toma 18
18
Pɔɔl Naŋ Be Korint Teŋɛ Poɔ
1A lɛ puoriŋ, Pɔɔl da yi la a Atɛnse gaa Korint. 2#Rom 16:3 O da te nyɛ la Gyuu neɛ kaŋ yuori naŋ di Akuela a be. A Akuela da waa la Pɔntus teŋɛ neɛ. O ne o pɔge Peresela da yi la Itali wa a be ka a da naŋ ba kɔɔre, bonso Keladeo da tere la noɔre ka a Gyuumine zaa yi a Rom poɔ. A Pɔɔl da gaa te nyɛ ba la, 3#Tom 20:34; 1 Kor 4:12 kyɛ o ne ba zaa toma naŋ da waa yeni zuiŋ, o da te kpeɛrɛ ne ba la, ka ba zaa da laŋ tonɔ. A ba tonnoɔre da la tɛnte-wuobu#18:3 Tɛnte-wuobu: Tɛnte waa la sege ba naŋ de pɛmɛ wuo ne. 4A pɛnnoo bebiri zaa daare, o da maŋ ŋmɛ la nɔkpeɛne a puoruudie poɔ a kyɛ erɛ aneɛ ka o leɛre a Gyuumine ane a Girik noba teɛroŋ ka ba na sage de a yɛlɛ o naŋ kanna.
5 #
Tom 17:14-15
A Silas ane Timoti naŋ da yi Masedoniya wa ta, a Pɔɔl da bare la yelzaa kyɛ moɔlɔ a yelbiri, a dire danseɛ korɔ a Gyuumine ka Yeezu la a Kirista. 6#Tom 13:51; 20:26 Ba naŋ da zagre a yɛlɛ deebo kyɛ to o, a Pɔɔl da nyɔge la o kparoo uuruŋ piŋ a kyɛ yeli ko ba, “Ka a yɛ zẽẽ do yɛ! Maa eŋ ba taa saanaa. A naŋ yi ŋaa kyɛ gɛrɛ, N na gaa la a Nemboore-yobo zie.” 7Lɛ la ka o da yi a puoruudie a kyɛ gaa dɔɔ kaŋ yuori naŋ di Tiitus Gyustus yiri. A dɔɔ ŋa da puoro la Naaŋmen ka o yiri da peɛle a puoruudie. 8#1 Kor 1:14 Kirispus naŋ da e a puoruudie kaara ane o yideme zaa da de la a Daana yɛlɛ, ka a Korint deme yaga naŋ da woŋ a Pɔɔl kannoo meŋ da sage de a Daana yɛlɛ a kyɛ da de suobu. 9#1 Kor 2:3 Tensogɔ kaŋ, a Daana da yeli ko la a Pɔɔl o nyaabo poɔ, “Ta zoro dabeɛ̃, manna a yɛlɛ kyɛ ta pɔge fo noɔre; 10#Gyɛ 1:8; Gyn 10:16 bonso, N be la fo zie. Neɛzaa kyebe a na zɛge o nu tɔ ne fo ka o e fo yelfaa zaa, bonso, N taa la noba yaga a teŋɛ ŋa poɔ.” 11O da zeŋ la a be yuoni gbuli ane kyuuri ayoɔbo a wullo a noba a Naaŋmen yelbiri.
12Kyɛ a saŋ Gallio naŋ da wa e gɔbena a Akaaya poɔ, a Gyuumine da laŋ la taa a iri a Pɔɔl zu, a nyɔge o gaa ne a sɛrediribe zie. 13Ba da yelee la, “A dɔɔ ŋa wullo la noba ka ba puoro Naaŋmen lɛ naŋ ba tu a begɛ.” 14#Tom 25:18-20 A Pɔɔl naŋ da e ka o haa o noɔre, a Gallio da yeli ko la a Gyuumine, “Ka anaŋ da waa ka tonfaare la ka o da toŋ bee a sãã a bege kanzaa, N da na kyɛlle la yɛ yɛlɛ; 15#Gyn 18:31 kyɛ anaŋ waa nɔkpeɛne a kyaare ne yelbie ane yoe ane yɛmenne begɛ yɛlɛ, yɛ taa yɛ yɛlɛ. Maa eŋ ba boɔrɔ ka N di a yɛlɛ ama sɛrɛɛ.” 16Kyɛ da digi ba ka ba yi a sɛrɛɛdiibu zie. 17Lɛ la ka ba zaa da leɛ nyɔge Sosetenɛ, a puoruudie kaara, a ŋmɛ o a sɛrediribe niŋesogɔ. Kyɛ a Gallio da leɛ la o kpaare tere a yɛlɛ ama zaa naŋ da erɛ.
Pɔɔl Naŋ Leɛ Gaa Anteyɔk
18 #
Tom 21:24; Sɔr 6:9; 6:18 A Pɔɔl naŋ da zeŋ a be ka a kɔɔre belãã, o da bare la a yelderebɛ kyɛ ka o ne Peresela ane Akuela da kpɛ gbori a gaa Seeriya. A Pɔɔl da poŋ la o zu Seŋkereya teŋɛ poɔ, o naŋ da polle noɔre zuiŋ. 19Ba naŋ da wa te ta Efesus teŋɛ, o da bare ba la a be kyɛ ka o meŋɛ daŋ te kpɛ a puoruudie ka o ne a Gyuumine te yeli yɛlɛ. 20Ba naŋ da wa sɔre o ka o zeŋ be belãã, o da ba sage; 21#1 Kor 4:19; Gye 4:15 kyɛ o naŋ da wa bare ba, o da yelee la, “Ka Naaŋmen na sage, N na leɛ wa la yɛ zie.” A lɛ puoriŋ, o da kpɛ la gbori a yi a Efesus teŋɛ poɔ.
22 #
Tom 21:15
O naŋ da wa te ta Sezaareya, o da do la gaa Gyeruzɛlɛm a te puori a puoruu laŋne deme a kyɛ sigi gaa Anteyɔk. 23O naŋ da wa zeŋ a be ka a kɔɔre belãã, o da yie la a yoɔrɔ a ziiri zaa, a te tɔle gaa Galesiya paaloŋ ane Firigyeya, a yele yɛlɛ a teɛrɛ a potuuribo zaa.
Apolos Naŋ Moɔle A Yelnoore A Efesus Teŋɛ Poɔ
24 #
1 Kor 3:6
A Gyuumine kaŋ naŋ da waa Alɛzandereya teŋɛ neɛ, ka o yuori di Apolos, da wa la a Efesus teŋɛ. O noɔre da baŋ la yɛlɛ yeluu velaa kyɛ da baŋ a gansoŋ poɔ yɛlɛ meŋ weliweli. 25#Tom 19:3 Ba da wuli o la a Daana Sori yɛlɛ; kyɛ ka o eŋɛ da nyagra ne a yɛlɛ yeluu, ka o wullo a Yeezu yɛlɛ velaa zaa, aneazaa ka a Gyɔɔn suobu yɛlɛ yoŋ la ka o da baŋ. 26O da piili yele la a yɛlɛ a ba zoro dabeɛ̃ a puoruudie poɔ; kyɛ Peresela ane Akuela naŋ da wa woŋ o yelyelii, ba da taa o la yi ne ba yoŋ zie a te maaleŋ wuli o a Naaŋmen Sori yɛlɛ velaa. 27O naŋ da wa boɔrɔ ka o gaŋ gaa Akaaya, a yelderebɛ da yeli la yɛlɛ teɛ o, kyɛ sɛge gane ko a potuuribo naŋ be a be ka ba tuori de o. O naŋ da wa te ta, o da soŋ la a banaŋ a Naaŋmen garaaseɛ naŋ da e ka ba sage de O yɛlɛ yaga zaa, 28#Tom 9:22; 17:3 bonso, o da maŋ yeli toɔ̃ la a Gyuumine nen-yaga poɔ. O da maŋ tu la a gansoŋ poɔ yɛlɛ a wullo ka a Yeezu la a Kirista.
Currently Selected:
Toma 18: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.