Romanos 16
16
U Pablo kuya rtzil kwuch nk'aj ajkojnel
1Chewa chanim jare kwaj in che kiwit'amaj uwuch un qachlal il Febe. Jarewa jun qachlal ixoq che ajchak chikxo'l nk'aj qachlal chpam tinmit Cencrea. 2Kwaj che kik'laj un qachlal il Febe pub'i' Qajaw Jesucristo, jala peche k'an che uk'alxik jun qachlal che kjonaq. Kwaj che kito' ruk' runjel su nmister che, mal re, ik'i chke qachlal chi' che iyut'om, soq nut'om in.
3Chiy'a rtzil kwuch nk'aj qachlal Aquila rich'il rixqil Priscila. Jare ke qach ajchak qib' kuk' rech Qajaw Jesucristo. 4Ke xikya kib' chpam k'ax ast retal ya mer xikamsxik xa rmal wech in. Xa rmal, kintyoxij chke, per xaw taj in kintyoxij chke, soq jala kik'ano kunjel jumpa ajkojnel che iyaj Israel taj.
5Jnam chiy'a rtzil kwuch nk'aj ajkojnel che kikmol kib' chikchoch ke.
Chiy'a rtzil uwuch u Epeneto, che jare jun lo'laj wich'il. Jare re nab'e ajkojnel che Qajaw Jesucristo chla' pukwent Asia.
6Chiy'a rtzil uwuch i Mri'y. Re nimlaj chak unom chixo'l ix.
7Chiy'a rtzil kwuch nk'aj wachlal che soq jare wach iyaj Israel che iy'o chla' iwuk', che jare u Andrónico, rich'il u Junias. Ke jnam xujkje pkarsa kuk'. Jare ke iyutaqo'n Dios, y nmaq keqle'n chikxo'l nk'aj apóstol. Jare nab'e xiyikjon ke che Qajaw Jesucristo chinwuch in.
8Chiy'a rtzil uwuch u Amplias. Jare re jun lo'laj wich'il pub'i' Qajaw Jesucristo.
9Chiy'a rtzil uwuch u Urbano che jare qach ajchak qib' ruk' rech Qajaw Jesucristo.
Soq chiy'a rtzil uwuch u Estaquis, che jare jun lo'laj wich'il.
10Chiy'a rtzil uwuch u Apeles, che k'i b'welt uk'tum che nim uchu'ab' ukojb'al ruk' Cristo.
Soq chiy'a rtzil kwuch jumpa iy'o chirchoch u Aristóbulo.
11Chiy'a rtzil uwuch u Herodión che jare wachlal soq jare wach aj Israel.
Soq chiy'a rtzil kwuch jumpa iy'o chirchoch u Narciso che ikjonaq che Qajaw Jesucristo.
12Chiy'a rtzil kwuch il Trifena rich'il il Trifosa. Jare ke mas kkib'soj u'anik chak pub'i' Qajaw Jesucristo.
Soq chiy'a rtzil uwuch un lo'laj qachlal il Pérsida, che mas nim uchak unom pub'i' Qajaw Jesucristo.
13Chiy'a rtzil uwuch u Rufo che xchay rmal Qajaw Jesucristo, rich'il uchuch. Uchuch re, xu'on chwi'n che peche mow in nral re.
14Chiy'a rtzil kwuch u Asíncrito, rich'il u Flegonte, rich'il u Hermes, rich'il u Patrobas, rich'il u Hermas#16:14 U Hermas soq kb'ix Hermes che., rich'il jumpa qachlal che iy'o kuk'.
15Chiy'a rtzil uwuch u Filólogo, rich'il il Julia, rich'il u Nereo ruk' rnab', rich'il u Olimpas,#16:15 U Olimpas soq kb'ix Olimpo che. rich'il kunjel jumpa ityoxlaj taq ajkojnel che iy'o kuk'.
16Chitz'b'aj iplaj chiwuch ruk' ch'ajch'oj iwanma', mal jare jun tyoxlaj k'utb'al chjuch Dios che mas kiwaj iwib' chiwuch.#16:16 K'manaq chke mnaq kikjom utzij Jesucristo kkitz'b'aj jun chik mnaq ti kikya rtzil uwuch, we jnam kikjom utzij Jesucristo.
Jumpa mnaq kikjom utzij Dios iy'o chi' ptaq tinmit, kiktaq b'i rtzil iwuch.
17Kiximb'och'ij wachlal rech ki'an kwent iwib' chikuch nk'aj mnaq che xa kiktas kan nk'aj qachlal rich'il nk'aj che xa kikkoj kk'u'x rech kiyel chpam kkojb'al. Nk'aj mnaqe' xa kkixtuj uwuch utzij Dios ruk' su kik'ano che xa ustaj. Chitsa iwib' chkij, mal xa ustaj kik'ano. 18Nk'aj mnaqe', jare taj kiyichkun ruk' Qajaw Jesucristo, xa jare kik'ano su kurij kpinsar kik'ano che xaq kech ke. Ruk' utzlaj taq tzij che mas je'l utayik kikb'ij chke, xa kikkoj kk'u'x mnaq che ot mas kpinsar rech kiksub'u. 19Per kunjel mnaq ktom rson che ix mas kinmaj utzij Dios. Xa rmal o jun nimlaj ki'ktem chpam wanma' iwmal ix. Per jare kwaj in che kikje in'oj che u'anik utzil, y jare taj che u'anik k'ax. 20Jare Dios kusipaj nimlaj utzil chixo'l. Re ya mer kuya nitzel Satanás chuxe' iwqan rech kixch'kan na pujlom, rmal utzlaj ichak ki'an ruk' Qajaw Jesucristo. Jaretb'a Qajaw Jesucristo kuya chiwe che kikje ut'ob' iwuk'.
21U Timoteo wach ajchak, kuya rtzil iwuch. Soq kikya rtzil iwuch u Lucio, rich'il u Jasón, rich'il u Sosípater, che jare ke qachlal soq jare ke qach aj Israel, kikya rtzil iwuch.
22Jare in nTercio che kintjin che utz'ib'xik b'i un wuj chiwe ri', rech u Pablo, kinya rtzil iwuch pub'i' Qajaw Jesucristo.
23Jare u Gayo kuya rtzil iwuch. Re uy'om nposada chirchoch, soq jala ku'on chke nk'aj ajkojnel, kuya chke kikmol kib' chirchoch. Rich'il u Erasto che ajklol pwaq rech tinmit chi', soq kuya rtzil iwuch. Soq rich'il un qachlal Cuarto, kuya rtzil iwuch. 24Jaretb'a Qajaw Jesucristo kuya chiwe che kikje ut'ob' iwuk' iwunjel. Amén.#16:24 O nk'aj ujer taq wuj rech Tyox Wuj, manuscrito kb'ix che, che tz'ib'tal taj v. 24 chpam.
25Chqanmirsaj b'a u'ij qaDios, rmal che jare Re kikunik kixutak'b'a chpam ikojb'al rmal utzlaj taq rson chrij Qajaw Jesucristo, che xinya ub'ixik chiwe. Jarewa xuk'ut Dios chiquch miskini' peche mow xa ch'uqtal chiquch ujer taq tzij loq. 26Per chewa chanim jare Dios xu'alajsaj chsaq chikuch kunjel mnaq iy'o chi' chuchlew su kilwi ri utzij Dios che xiktz'ib'aj kan nk'aj ajb'il utzij Re. Ri Dios, che k'as runjel jumpa uwu ijsaq, jala xu'ono peche uchomam loq pupinsar ujer, rech jumpa mnaq chpam runjel jumpa tinmit chi' chuchlew, kiyikunik kikkub'a kk'u'x chrij Qajaw Jesucristo, soq kiyikjon na che, rech kik'ano su kub'ij. 27Ri qaDios, xaw Re Rjaw runjel jumpa n'oj. Chqanmirsaj u'ij rmal Qajaw Jesucristo runjel jumpa uwu ijsaq. Amén.
Currently Selected:
Romanos 16: qucSAS
Highlight
Copy
Compare
Share
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global