Romanos 14
14
Ustaj we kqab'ij tzij chkij nk'aj chik mnaq
1Chik'laj nk'aj qachlal che mja kyu'on ko chpam kkojb'al, miskini' jnam taj ipinsar ruk' kpinsar ke, per xaq chita na su kikb'ij chiwe. 2O jun k'amb'al n'oj kimb'ij chiwe. O nk'aj kikb'ij che utz kitjiw runjel uwuch rkil. Soq o nk'aj chik che ko taj itk'al chpam kkojb'al, kikb'ij ke che xaq xawi runjel jumpa uwuch ichaj o mow kiktijo, mal ustaj kiktij t'ij. 3Jare jun che kutij runjel uwuch rkil, xa muxtuj uwuch jun che xa jun uwuch rkil kutijo. We xa jun uwuch rkil kutij re, soq xa mub'ij tzij chrij jun che kutij runjel uwuch rkil mal Dios kyuk'am chikeb'. 4Pre taj chawe che ka'an atb'altzij pujlom jun awachlal. Xaq xaw Rjaw ya'tal che, che o mow kurilo we utz ku'ono. Xaq xaw Rjaw ya'tal che, che kurilo we xa ustaj ku'ono. Xaq xaw Re rit'am su ku'on ruk', mal jare Re upatrón. Ni Qajaw Dios che jare upatrón kikunik kuto' che u'anik uchak rech utz kel chjuch.
5O nk'aj mnaq che mas nim kikkil wi jun ij chjuch jun chik ij. O nk'aj chik mnaq che xaq jnam kikkil wi runjel jumpa ij. Nmister k'ut che chiqjunjnal, qunjel kqit'amaj piqk'u'x che utz kujtjin che u'anik, rech kqa'an ko chpam qakojb'al. 6Jare nk'aj mnaq che nim kikkil wi jun ij chjuch jun chik ij, jare kkinmirsaj u'ij Qajaw Jesucristo ruk'. Ni nk'aj mnaq che kiktij runjel uwuch rkil, jare kkinmirsaj u'ij Qajaw Jesucristo ruk', mal jare kkityoxij che Dios che o su kiktijo, jala peche kik'an nk'aj chik mnaq che kiktij taj runjel uwuch rkil. 7Ot mow che jun ajkojnel xaq utkel re ku'on chpam uk'asnmal su kraj re ku'ono. Ot b'a jun chqe che kikunik kik'se'ik we xaq utkel wi rech ku'ono chinchke kraj ku'ono. Jala' soq kumaj taj che jun che xaq utkel re kutzkuj ukmik chrij. 8Xa uy'om qak'asnmal Dios, pures che ujk'aslik, jare ujk'as che unmirsaxik u'ij Qajaw Jesucristo. Soq jala' miskini' kujkamik, unmirsaxik u'ij Dios kujtjin che ti kujkam b'ik, mal we ujkamnaq chik ujrech Dios. Xa jala' we ujk'aslik seno ujkamnaq chik, uj'o pu'ab' Qajaw Jesucristo. 9Jare uptan che xkam Qajaw Jesucristo soq xk'astaj chuwuch chikxo'l nk'aj kamnaq, rech ku'on utzlaj atb'altzij pkijlom kunjel mnaq, we ik'aslik, seno ikamnaq chik, mal jare Re Kjaw.
10Xa rmal, kqilo che pre taj che jun che ku'on atb'altzij pujlom jun rachlal, soq pre taj che jun che kuxtuj jun rachlal. Mal qunjel qo'j kujtk'e' na chjuch Qajaw Dios, echi' ku'on atb'altzij pqajlom. 11Qit'am chik ri', mal jala tz'ib'tal kan chpam Tyox Wuj che jawa kub'ij:
«Jare in Qajaw Dios. Qtzij che nk'aslik,
soq qtzij che kunjel mnaq kiyixke' na chinwuch.
Kunjel ke kkinmirsaj na n'ij, kunjel kikb'ij na che xaw in nDios», kcha'. (Is 45:23; Fil 2:10-11)
12Xa jala' k'alnik che kpi na jun ij echi' chiqjunjnal kqab'ij na chsaq su xqa'an chpam qak'asnmal chjuch Dios.
13Xa rmal che jare Dios ku'on na atb'altzij pqajlom, ile' xa mqa'an atb'altzij qo'j pqajlom chiquch. Xa chqakjo qachu'ab' rech ot su kqa'ano che xa rmal ktzaq jun qachlal chpam umak. 14In ruk' saqlaj tzij kinkojo che ot su kri' jun uwuch rkil che ustaj kitjiw chjuch Dios, mal runjel utz kitjiw chjuch Dios. Per we o jun kuchomaj che o rkil che ustaj kutijo, xa mutijo. 15We o su katij at, tik'ri xa rmal kuriq jun nimlaj b'is nawachlal, jare kilwi che xa kal'oj taj nawachlal. Xab'a ma'an che che kuriq jun nimlaj b'is rmal su katijo, mal ri Qajaw Jesucristo xkam rmal nawachlali', soq xkam rmal kech kunjel jumpa mnaq. 16Xa jala' wachlal, xaq pasu mi'ano, miskini' kib'ij ix che jare utz kixtjin che u'anik, we xa rmal kich'aw mnaq chiwij y kikb'ij che xa ustaj xa'ano. 17Ri utzlaj atb'altzij rech Dios jare taj wa mowni mi'na', jare taj jumpa sutaq'ik che kitjiwik. Ri utzlaj atb'altzij rech Dios jarewa ri': che kqaya qib' pu'ab' Tyoxlaj Uxlab'xel, rech kqa'ano chinchke sk'um chjuch Qajaw Dios, rech o utzil chiqxo'l kuk' nk'aj chik mnaq, rech jala' o ki'ktem chpam qanma'. 18Chin jun che jala ku'ono, ku'on uchak che rilik Qajaw Jesucristo ruk' utzlaj umow kuk' nk'aj chik mnaq. Jarela utz kiltaj wi rmal Dios, soq utz kiltaj wi kmal mnaq.
19Xa jala' chqakjo qachu'ab' che u'anik chinchke kuya utzil chiqxo'l kuk' nk'aj chik qachlal. Soq jnam chqataqej u'anik chinchke kuya qachu'ab' chpam qakojb'al. 20Xa masach uwuch su unom Dios chpam ranma' jun qachlal xa rmal su katijo, soq we xa rmal su kikb'ij nk'aj chik che ustaj. Qalom chik che runjel uwuch rkil utz kitjiwik, per we xa o jun awachlal ktzaq chpam umak rmal su katijo, jarela ustaj. 21Jare utz we katij taj t'ij, soq katij taj u'al uva, y ot su kri' ka'ano che xa rmal ktzaq jun awachlal chpam umak. Xaq pasu ma'ano che xa rmal otch uchu'ab' ukojb'al nawachlal, mal pent xa ku'on keb' uk'u'x chpam ukojb'al awmal. 22Jare akojb'al che o awuk' chrij su katijo, che awit'am pak'u'x su katitjin che u'anik, xaq atkel at kachomaj rij chjuch Dios. Mas utz re jun che kuna' puk'u'x che utz kitjin che u'anik. 23Chin ku'on keb' uk'u'x ruk' su kutijo, we utz, soq we ustaj kitjiwik, per jare mak echi' kutijo we xa ku'on keb' uk'u'x ruk'. Mal runjel jumpa sutaq'ik ku'on jun, we xa ku'on keb' uk'u'x ruk', jarela mak.
Currently Selected:
Romanos 14: qucSAS
Highlight
Copy
Compare
Share
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global