Romanos 13
13
Nmister che kqakoj k'ij nk'aj atb'altzij
1Kunjel nk'aj ajkojnel nmister kikya kib' ptaqik chke atb'altzij, xa pachinchke atb'altzij olik, rmal ot jun atb'altzij olik we jare taj Dios ukjom. Chinchke atb'altzij olik, jare Dios uy'om reqle'n rech ku'on atb'altzij. 2Xa rmal, chin jun che kuya t rib' pu'ab' atb'altzij, peche mow xa kuxtuj uwuch atb'altzij rech Dios. Chin jun che xa kuxtuj uwuch atb'altzij, xa kutzkuj k'ejsb'al uwuch chrij, mal jare Dios ukjom atb'altzij. 3Xa jala', nk'aj atb'altzij ikjom taj rech kkix'ej kib' nk'aj mnaq chikuch che kik'an utz, xani jare uptan atb'altzij ikjom rech kkix'ej kib' nk'aj mnaq chikuch che kik'an k'ax. We kiwaj che kix'ej t iwib' chjuch atb'altzij, jare china utz chpam ik'asnmal, rech jala' xa jare chik ke utz kixkkilo. 4Kunjel jumpa atb'altzij iy'olik, peche mow xa iyajchak ruk' Dios, rech amb'alre utzil chiwe, per we ix xa jare k'ax ki'ano, nmister che kix'ej iwib' chjuch, mal o atb'altzij pu'ab' rech kuk'ejsaj kwuch mnaq chin xa k'ax kik'ano. Jarewa ke iyajchak rech Dios rech kik'an sk'umlaj atb'altzij pkijlom mnaq jala peche tqal chke. 5Jare rmal che nmister kiya iwib' pik'ab' atb'altzij, per xaw taj rmal che kiriq k'ejsb'al iwuch rmal Dios we kikoj t ktzij, xani jare rmal che kina' chpam iwanma' che nmister ki'an utz.
6Xa rmal, nmister kitoj alkawal che atb'altzij, mal jare ke iyajchak rech Dios, rech kikk'am kb'e mnaq chpam jun tinmit. 7Chitjo ik'as kuk' kunjel nk'aj atb'altzij. Chitjo alkawal che naj'esal alkawal. Chitjo jumpa wuj che kub'ij un atb'altzij che nmister kitojo, chikjo k'ij mnaq che tqal chke kikoj k'ij. We o mnaq che nim reqle'n, nim chiwla wi mal nim u'ij.
Jare nmister kqa'an kuk' nk'aj chik mnaq
8Nmister kitoj ik'as ruk' jun chik mnaq we o ik'as ruk', rech peche mow xaq xaw ik'as olik che kil'oj iwib' chiwuch. Chin kul'oj urjil utz'qat, jare re kutz'qatsaj su kub'ij upxab' Dios. 9Jawa kub'ij keb' uxib' upxab' u Moisés: «Achi, xa matwar ruk' jun ixoq we awixqil taj, soq jala at ixoq, xa matwar ruk' jun achi we awichjil taj. Xa makamsaj jun chik mnaq. Xa ma'an ela'. Xa ma'an tzijtal chrij jun chik mnaq. Xa marij uwuch su o ruk' jun chik mnaq che awech taj at»,#Éx 20:13-15,17. kcha'. Per runjel nk'aj pxab'i' kuriq rib' y xa jun kilwi: jarewa kilwi: «Chil'oj arjil atz'qat jala peche kal'oj awib' at»,#Lv 19:18; Mt 22:39. kcha'. 10We kal'oj awjil atz'qat, y ka'an t k'ax che, jare k'utb'alre che katz'qatsaj runjel pxab', rmal che o lo'b'al ak'u'x chke nk'aj chik mnaq.
11Runjel ri' su ximb'ij chiwe che nmister ki'ano, xa rmal mel iwit'am chik su unom nk'aj ij kujriqtaj chpam chanim che mas k'ax. Chixk'ask'atoq, chik'suj iwib', mal mas nqaj chik k'wi nk'aj ij che kujuresaj Dios chpam k'ax rech kujukolo. Le' mas nqaj chik k'wi nk'aj ij chjuch ti xqakoj utzij Dios nab'e. 12Nk'aj ij che uy'om Dios chqe rech kujk'se' chi' chuchlew, ya mer kk'isik, jala u'anik peche jun a'ab' che su chanim k'axik, y kisqar jun chik ij. Xa rmal, chqay'a kan u'anik nk'aj k'axlaj taq chak che kik'an mnaq che peche mow iy'o chpam qu'm. Jare utz che kqataqej u'anik utzlaj taq chak, peche jun soldado che kukoj ritz'yaq kch'o'jan ruk'. 13Utz chqana chpam qak'asnmal. Chqak'tu chpam saq che utz kqa'an chpam qak'asnmal, jala peche kik'an mnaq che iy'o chpam saq ruk' Dios. Xa mqamol qib' che u'anik nim'ij rech tijb'al wa che su kujal uwi' qanojik kqa'an che, rich'il che u'anik nmaq taq mak. Xa muj'b'arik, xa mqa'an k'axlaj taq mak chiquch kuk' ixqib' seno kuk' achjab' che k'ixb'al rilik, che kurij qapinsar che xa rech uwuchlew. Xa mqachap qib' ruk' tzij, k'ax mikqil wi we o jun chik mnaq kuriq utzil. 14Jala taj kqa'ano, xani jare chqakjo Qajaw Jesucristo, peche mow jun atz'yaq rech kujuch'uqu rech k'alnik su chak xu'on chpam qak'asnmal. Xa mqab'soj urixik uwuch jumpa sutaq'ik che xa rech uwuchlew, mal ustaj.
Currently Selected:
Romanos 13: qucSAS
Highlight
Copy
Compare
Share
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global