Romanos 11
11
O keb' uxib' chke nk'aj aj Israel che ikoltajnaq chik rmal Dios
1Rmal che nk'aj aj Israel kkaj taj kikkojo su kub'ij Dios, le' kinta chiwe, ¿le xa xuxtuj Dios un tinmit Israel? Xuxtuj taj. Kna'taj chiwe che jare mismo in naj Israel. Jare nri'jal u Abraham, in jare xnalax chikxo'l nk'aj ri'y umam u Benjamín. 2Dios xuxtuj t uwuch utinmit Israel. Dios ujer uchomam loq chin mnaq che irech Re. ¿Le xa xsach chiwe su tz'ib'tal kan chpam Tyox Wuj ujer chrij u Elías? Re, jare jun ajb'il utzij Dios che xuk'eq tzijtal chkij nk'aj aj Israel y jarewa kub'ij: 3«Wjaw, xikkamsaj nk'aj ajb'il tzij la, xkiwlujsaj b'i nk'aj kojb'al a' rech kikkoj ij la chjuch. Xa nitkel chik in xinkanaj kanoq. Xaw in nikjonaq uk' la, y chanim kkitzkuj nkamsxik in».#1R 19:10,14. Jala xub'ij u Elías che Dios. 4¿Su k'ut xub'ij Dios che? Jawa xub'ij che ri': «In nitsom kan jqub' mil (7,000) achjab' che qatz wech in, che kiyixke' taj chjuch un dios che xa mnaq kinom, che Baal kb'ix che»,#1R 19:18. xche che. 5Soq jala le', ptaq ij chanim, iy'o keb' uxib' chke nk'aj aj Israel che ichaytajnaq chik rmal Dios, xa rmal ut'ob' Dios. 6Xa rmal kqilo, we ichaytajnaq kan rmal ut'ob' Dios, rmal taj kchak kinom chjuch Dios che xichayik. Wet xa rmal kchak kinom che xichayik, kilik che nut'ob' Dios sipnik taj, y nmister kiyichkun mnaq rech kikch'ak nut'ob' Dios, per jala taj.
7Ni le' chik, ¿su kilwi runjel ri'? Jare mas ik'i chke nk'aj aj Israel xikriq taj su kik'ano rech kyu'on sk'um chjuch Dios, miskini' xkitzkuj. Xa keb' uxib' chke che xyuchay Dios, jare ke xikriqo. Ni nk'aj chik xa x'an ko che kanma'. 8Jala x'antjik peche kub'ij chpam Tyox Wuj:
«Jare Dios xu'on chke che kikna' t chik. (Is 29:10)
Xuya kwuch per kika'y taj rmal,
xuya kixkin per kitan taj rmal, y jala unom loq chanim», kcha'. (Dt 29:4)
9Jarela peche xub'ij un rey David chpam Tyox Wuj:
«China chke che echi' kiktij kwa rech nim'ij, peche mow xa jare jun tzaqb'alke,
jala peche jun ataraya rech chapb'al kar, che xaq jare ke kitzaq chpam, rech k'ejsb'al kwuch.
10Jala k'an chke kpotz'ar na kwuch rech jala' kika'y t chik, jala k'an chke peche mow o jun al laj eqa'n chkij,
che su kikb'us kib' chuxe' mal mas al, y jala unom ot uk'isik», kcha'. (Sal 69:22-23)
11Ni le' chik kwaj kinta chna, nk'aj mnaq iyaj Israel che xitzaqik, ¿le su pxab' xitzaq kanoq mal xiyikjon taj? Jala taj. Jala x'antjik rech jare nk'aj aj Israel, mas kikrij na uwuch nimlaj utzil che kirqom nk'aj mnaq che iyaj Israel taj, rech jala' kiyikjon che Jesucristo peche xik'an nk'aj aj Israel taj che xiyikjonik. 12We rmal kmak nk'aj aj Israel, che Dios kuya u'ab' pkijlom nk'aj mnaq chjuch runjel uwuchlew, we xa rmal che xkaj taj nk'aj aj Israel xiyikjon che Qajaw Jesucristo pures che xikriq nimlaj utzil nk'aj mnaq che iyaj Israel taj, chiwit'amaj b'a', mas utz na kikriq nk'aj mnaq che iyaj Israel taj, echi' kiyikjon nk'aj aj Israel che Qajaw Jesucristo, jala peche kraj Dios chke.
13Per ni le' kwaj kimb'ij na jun tzij chiwe ix, che ixaj Israel taj. Mas nim reqlem nchak chinwuch, rmal che in napóstol rech Dios rech kinchkun iwuk' ix, che ixaj Israel taj. 14Jarewa kwaj in che jumpa nimnaq in kikrij uwuch iwuk' un nimlaj utzil che irqom ix rmal Dios, rech jala', kikoltaj na keb' uxib' chke. 15We Dios xyuxtuj kanoq jumpa nk'aj aj Israel che xiyikjon taj che, jare rmal che xikriq utzil nk'aj chik mnaq ruk' Dios, chich'b'o b'a' su k'antaj na echi' kiyikjon nk'aj aj Israel che Dios. ¿Le jala t k'ut peche jun k'ak' k'asnmal kuya chke, mal ke peche mow xa kamnaq kpinsar nab'e? Jala' wachlal. 16Jala peche ku'on jun rajchak Dios che kujach un nab'e wa pu'ab' Dios che tela kel chpam or. We jala', runjel b'ari wa che kel che un or ujchom pu'ab' Dios. We utz unom ra' jun che', runjel u'ab' utz unom. Xa jala', we kri'jal nk'aj aj Israel irech Dios, soq irech Dios nk'aj ri'y kmam.
17Keb' uxib' chke nk'aj aj Israel che peche mow, jare ke iyu'ab' un che', che xket rmal Dios. Tik'ri chla' jachi xket wi, xutik chuloq rib' jun chik u'ab' un che' rech olivos che xa aj uwutaq jyub'. Jare ix che ixaj Israel taj, jala u'anik peche un chik u'ab' che' che o chutaq jyub' nab'e, jala unom che ix kixk'se'ik, rmal ra' un che' b'enaq pulew, soq rmal che rax un che'. 18Per machomaj che mas nim aweqlem at chikuch nk'aj aj Israel che peche mow jare ke iyu'ab' un che' che xket b'ik. Xa machomaj jala' mal jare ix xixkanaj che kwuchb'al ke, xa minmirsaj iwib'. Chna'taj chiwe che jare taj u'ab' un che' uy'om uk'asnmal ra' un che', che b'enaq pulew, xani jare ra' un che' uy'om uk'asnmal u'ab' un che'. Jala unom che ix ik'mom tob'nik kiy'om nk'aj aj Israel chiwe, per ¿xatb'a jare ix iy'om chke nk'aj aj Israel su kuya un tob'nik chke ke? 19Ni ix che ixaj Israel taj, pent ni kib'ij: «Nk'aj Israel xa xiyixtux loq rmal Dios, jala peche nu'ab' un che' che xketik. Xa rmal, jare qo'j che ujaj Israel taj, kujkanaj che kwuchb'al chjuch Dios, peche u'anik jun chik u'ab' che' xutik rib' che un che'», kixcha'. 20Jala' puro qtzij peche kib'ij qachlal, per ni Dios xyuresaj nk'aj aj Israel, xa rmal mel xiyikjon taj che Jesucristo. Jare ix ixaj Israel taj, per xixkjon che, xa rmal kixkanaj che kwuchb'al ke. Per o jun munmirsaj rib' chiwe, xani kix'ej iwib' chjuch Dios, mal jare Re xu'on runjel ri'. 21Rmal k'ut, we jare Dios xukuy t kmak nk'aj aj Israel che jare ke peche mow qatz nab'e u'ab' che', xa pyor b'ari ix kukuy t imak. 22Ni le' chik chiwla b'a' che mas utz Dios quk', per soq mas k'a'n. Jare Re mas k'a'n kuk' mnaq iyaj Israel, mal xa xikkoj t utzij. Per mas utz iwuk' ix jumpa xikoj utzij, we kiya t kan nimlaj utzil che unom iwuk', per we xa kiya kan nimlaj utzil, kixuresaj pnoq, jala peche xu'on chke nk'aj aj Israel. 23Jare nk'aj aj Israel, we kiyitzlij chna ruk' Dios rech kiyikjon che Jesucristo, jare Dios kyuk'am chna, peche u'anik taq u'ab' che' che kiktik kib' che un che'. Mal jare Dios o uchu'ab' rech kyutik chik che uch'el un che'. 24Mal jumpa ix che ixaj Israel taj, che ixrech taj Dios nab'e, tik'ri xiriq to'b'aliwe ruk' miskini' xitzkuj taj, jala peche jun u'ab' che' che xa chutaq jyub' k'mom loq wi, tik'ri xtik koq che jun utzlaj che', miskini' kumaj taj che un che'. Xa rmal un k'utb'ali', kqilo che jare Dios mas chanim kyuk'am na nk'aj aj Israel we kiyitzlij na ruk' mal irech Re nab'e kanoq. Jarela peche u'anik nk'aj u'ab' che' che xket nab'e, kutik chna rib' che un utzlaj che' jachi xket wi nab'e kanoq.
25Qachlal, kwaj in che kiwit'amaj saqlaj tzij chrij ri' che uchomam loq Dios ujer che ot jun rit'am nab'e. Echi' kich'ob'o, kichomaj taj ix che mas nim iweqlem. O nk'aj aj Israel che unom ko kanma', y jala kinom kikanaj kanoq, ast retal echi' kunjel nk'aj mnaq che iyaj Israel taj kiyok na ruk' Dios. 26Echi' jala k'antjik, tik'ri kunjel nk'aj aj Israel kikoltaj na. Jala tz'ib'tal kan chpam Tyox Wuj:
«Kil nuloq jun chikxo'l nk'aj aj Israel che kyutzaqpij mnaq,
ku'on na chke nk'aj ri'y umam u Jacob che kikya kan u'anik jumpa sutaq'ik che xa rech itzel.
27Jarewa jun utzlaj trato ninom kuk' che kin'an na chke,
che kinkuy kmak kinom», kcha'. (Is 59:20-21; 27:9)
28Jala unom le' che nk'aj aj Israel xa xkixtuj utzlaj taq rson chrij Qajaw Jesucristo mal xikkoj taj, xa jala' xiyelik peche mow xa iyajch'oj ruk' Dios. Per xya chiwe ix che miskini' ixaj Israel taj per xixkjon che Dios. Per jare Dios xuk'utu che kyul'oj nk'aj aj Israel mal mas ujer loq xyuchayo che irech Re, echi' xub'ij che o su kuya na chke kti' kmam nk'aj aj Israel. 29Jare Dios echi' kub'ij che kuya jun sipnik, kuk'ex t upinsar. Jare Re echi' xyuchay nk'aj aj Israel, soq kuk'ex t upinsar chrij su kuya na chke. 30Jala ix ixaj Israel taj, mas ujer kanoq, ix xikoj taj Dios. Ni le' chik jare Dios xel uk'u'x chiwe ix, echi' xkaj taj nk'aj aj Israel xikkoj utzij su kub'ij chke. 31Jala kinom nk'aj aj Israel chanim peche xi'an ix ujer. Ke kikkoj taj su kub'ij Dios chke. Xa rmal che xa jare chik ix xel uk'u'x Dios chiwe. Tik'ri jala ku'on na chke ke, kel na uk'u'x chke. 32Ujer taq tzij unom Dios chke mnaq che ot su kri' jun kukoj utzij Dios per miskini' jala kinom, Dios ku'on na chke che kiyikjonik rech jala' Dios kuril na to'b'al kwuch kunjel mal mas kel uk'u'x chke.
Chqanmirsaj b'a u'ij Dios
33¡Jare qaDios mas nim! ¡Runjel jumpa nmaq taq utzil o ruk'!
¡Mas nim un'oj! Mas nim upinsar.
Ot su kri' jun mnaq kikunik kuch'ob'o su uchomam Dios ku'on che u'anik atb'altzij pkijlom mnaq.
Ot su kri' jun mnaq kikunik kurit'amaj su ku'on Dios.
34Jala peche kub'ij Tyox Wuj:
«¿Chin lo kuch'ob'o su upinsar Qajaw Dios? Ot su kri' jun.
¿Le o jun mnaq kikunik kuya un'oj Dios? Otaj. (Is 40:13; 1Co 2:16)
35¿Le o jun mnaq lo, che o su uy'om che Dios nab'e
rech o mow kutzlij uk'xel Dios che re? Ot su kri' jun», kcha'. (Job 41:11)
36Xa rmal che runjel jumpa sutaq'ik olik, ruk' Dios pitnaq wi.
Pu'ab' Re k'wi runjel jumpa sutaq'ik olik,
soq rech Re runjel jumpa sutaq'ik olik.
¡Chqanmirsaj b'a u'ij Dios runjel ij runjel jumpa uwu ijsaq! Amén.
Currently Selected:
Romanos 11: qucSAS
Highlight
Copy
Compare
Share
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global