2 Tesalonicenses 2
2
Jarewa k'ejsb'al wuch kuriq na jun itzel mnaq
1Chewa chanim qachlal kqaj kqab'ij chiwe su k'antaj na echi' kpi Qajaw Jesucristo che qamolik rech kqariq qib' ruk'.#1Ts 4:13-17. 2Kqab'ij chiwe che nmister ki'an kwent iwib' chikuch mnaq che kkaj kixksub'u, soq kikb'ij che ya xuriq ij che kpi Qajaw Jesucristo. Xa mikojo miskini' kikb'ij chiwe che xch'aw Tyoxlaj Uxlab'xel kuk', xa mikojo we kikb'ij chiwe che jare qo'j qab'im b'i tzij chke, soq xa mikojo we o wuj kjach chiwe y kb'ix chiwe che jare qo'j qatqom b'ik. Xa mikojo runjel jumpa wari'. 3Xa mixsub'tjik, mal echi' kuriq ij che kpi Qajaw Jesucristo, nab'e kiwa'laj na nk'aj itzel taq mnaq chrij Dios rech kkixtuj Dios soq kkik'le'lej utzij. Soq kuk'ut na rib' jun itzel achi che chomtal chik che ksach uwuch rmal Dios. 4Nitzel achi ri', kwa'laj na, soq ku'on na ch'oj ruk' runjel jumpa sutaq'ik che rech Dios, soq ku'on na ch'oj ruk' jumpa sutaq'ik che kikkoj u'ij mnaq, soq kikb'e' na chpam nimlaj rchoch Dios. Re mismo kukoj na rib' che Dios.
5¿Le xa kna'taj t chiwe che jala ximb'ij chiwe echi' xinkje iwuk'? Qtzij che jala ximb'ij chiwe. 6Ile' ya iwit'am chik che o su u'atim nitzel achi ri' pures che mja kuk'ut rib'. Per kurqa na jun ij echi' ktzaqpix loq tik'ri kuk'ut rib'. 7Runjel jumpa sutaq'ik che xa rech itzel, kitjin chik kichkun chpam kanma' mnaq el'al, xaw ri'em jumpa kesax jun che u'atim, tik'ri k'ut kuk'ut rib' jumpa uchu'ab' nitzel. 8Echi' k'ut esam chik jun che u'atim nitzel achi, nitzel achi kuk'ut na rib'. Per kkamsax na rmal Qajaw Jesús, xaq ruk' ruxlab' Jesús, kkamik. Nitzel achi ri', kkamik xaw kuril uwuch Qajaw Jesús che kpitik. Kuch'ij t rilik, chanim ksachtaj uwuch. 9Nitzel achi ri', xa ktaq loq rmal nitzel Satanás, ruk'am loq uchu'ab' nitzel. Ku'on na milagro rich'il nmaq taq k'utb'al, per xa ch'anik sutaq ku'ono rech kyusub' mnaq. 10Kukoj na runjel jumpa sutaq'ik che xa rech itzel che ksub'ik mnaq, rech ksach kin'oj rmal. Ksach taj na kwuch, xa rmal mel xkaj taj xikkoj saqlaj tzij rech kikoltaj na. 11Xa rmal wari', Dios kuya na chke che kisub'taj rmal sutaq kb'ix chke, miskini' xa ch'anik kb'ix chke. 12Xa rmal kk'ejsax na kwuch kunjel jumpa mnaq che xikkoj taj saqlaj tzij, y xa jare x'e kk'u'x che u'anik runjel jumpa sutaq'ik che xa rech itzel.
U Pablo kyupixb'ej nk'aj mnaq rech kiktaqej chpam utzij Dios
13Ri ix qachlal, mas kixul'oj Qajaw Jesucristo. Qo'j kqana' chpam qanma' che kok'il nmister kqatyoxij che Dios iwmal ix, mal mas ujer ixchaytajnaq rmal Dios rech kixkoltaj na rmal Re. Kixkoltaj na, xa rmal Tyoxlaj Uxlab'xel che ku'on ch'ajch'oj che iwanma' soq xa rmal che kikub'a ik'u'x chrij saqlaj tzij. 14Ri Qajaw Dios xixusk'ij rech kixkoltaj na rmal utzlaj taq rson chrij Qajaw Jesús che xqab'ij chiwe, rech jnam kixkje ruk' Qajaw Jesucristo echi' kinmirsax u'ij, soq jnam kiriq iwe ruk' su o chla' chkaj. 15Xa jala' qachlal, ko chixtk'al chpam ikojb'al, jare chitaqej u'anik runjel jumpa xqak'ut chiwuch. Jumpa xqab'ij chiwe, rich'il jumpa xqatz'ib'aj b'i chiwe chjuch wuj, jarela chitaqej u'anik.
16Jaretb'a Qajaw Jesucristo rich'il qaQaw Dios che mas kel uk'u'x chke kunjel mnaq, xa rmal ut'ob' xuya jun kub'sb'al qak'u'x che ot uk'isik soq xu'on chqe che kikb'e' qak'u'x chrij Jesús, 17kuya jun kowlaj k'u'x chpam iwanma' soq kuya ichu'ab' chpam runjel jumpa utzlaj taq chak ki'ano rich'il jumpa utzlaj taq tzij kib'ij.
Currently Selected:
2 Tesalonicenses 2: qucSAS
Highlight
Copy
Compare
Share
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global