Marɨko 3

Yesʉ alamya mʉndʉ ekɨro ky'eSabato

(Mat 12:9-14; Luk 6:6-11)

1Yesʉ mwashʉbɨngɨra mo sinakoki. N'omo sinakoki eyo mwabyaga mʉndʉ mʉgʉma wa kʉboko kulehemire. 2Abandʉ babyagamo bagenda abayɨthegeretsya Yesʉ bʉshana balole nga alamya omʉndʉ oyo mo kɨro ky'eSabato, babone ekyangaleka nibamusitaka.

3Aho Yesʉ mwabwɨra ow'okʉboko kulehemire athɨ: «Wimana aha mo kathi k'abandʉ.» 4Honyuma kw'aho mwabʉtsyabo athɨ: «Iki ky'oMʉgomba ethʉ athuhamulire thʉgende othʉkola mo kɨro ky'eSabato? N'ɨkola bɨbʉya kʉtse ɨkola ebɨbɨ? Ilamya mʉndʉ kʉtse imwitha?» Hewethuwe abandʉ abo mobayɨtsɨrɨra. 5Yesʉ mwahanda kʉbo kw'amesho niatsibukire, na abyaga na bulige kʉshangwa mobatsibuhya emɨthɨma yabo. Mwabwɨra omʉndʉ oyo athɨ: «Lambʉla okʉboko kwawe.» Mwalambʉlako, nako mokwalama.

6Aho n'aho aBafarisayo mobathoka mo Sinakoki n'ɨya hindana n'abandʉ ba Herote bʉshana bakomye mbitha y'itha Yesʉ.

Muhindano mʉnene wa bandʉ ahikira Yesʉ

(Mat 4:25; 12:15-16; Luk 6:17-19)

7Yesʉ n'abɨga bʉwe mobayɨhɨgʉla n'ɨya emʉsɨke w'engetsɨ y'iNgalilaya. Muhindano mʉnene wa bandʉ mobamʉkwama. Abandʉ abo bagenda abathoka mo kɨhʉgo ky'iNgalilaya na ky'iYuteya, 8na mo muyi w'ɨYerʉsalemʉ, na mo kɨhʉgo ky'Indumea, na mo bɨhʉgo bya ko lʉndɨ lʉnda lw'olwitsi lw'eYorotani na ko mʉnda w'omuyi w'iTiro na w'iSitona. Omuhindano mʉnene w'abandʉ oyo, mwahikira Yesʉ kʉshangwa abyaga niamalire ɨonvwa emyatsɨ y'ebyoshi agenda akola.

9Yesʉ mwabwɨra abɨga bʉwe bamʉshondetsye bwatho bʉke nɨmo omuhindano athangamʉyɨndɨrɨtsya. 10Bandʉ bangɨ bo babyaga nibamalire inubibwa n'amakoni, bagenda abayɨhʉtha bʉshana bayakole kʉ Yesʉ, kʉshangwa abyaga niamalamya bandʉ bangɨ. 11Abo babyagako emɨtsɨmʉ mɨbɨ babere bashʉnga Yesʉ, mobawa embere sɨwe nɨabahambala bathɨ: «Ɨwe ʉlɨ Mʉgala wa Gongo.» 12Hewethuwe Yesʉ mwakemera emɨtsɨmʉ eyo yo kʉtsɨbʉ ɨthanegenaga ɨye nga nɨ ndɨ.

Yesʉ ashombola bathʉmwa ikumi na babɨrɨ

(Mat 10:1-4; Luk 6:12-16)

13Honyuma kw'aho, Yesʉ mwɨrʉkɨra ko kɨthwa. Mwabɨrɨkɨra bandʉ abo abyaga ashashire yo wene, n'abandʉ abo mobamuhikira. 14Mwashombola mʉbo mo ikumi na babɨrɨ, abo alʉkagamo bathʉmwa, bʉshana bikale hagʉma naye na bʉshana athʉmebo bayafʉle eNgʉlʉ Mbʉya. 15Na mwahabo maka w'ɨbɨnga emɨtsɨmʉ mɨbɨ. 16Ano wo matsɨna w'abandʉ ikumi na babɨrɨ ashombolaga : Simoni yo Yesʉ alʉkagamo Petero. 17Yakobo na Yoani mʉgala wabo, ababɨrɨ babyaga bagala ba Sebetayo. Yesʉ mwahabo ɨtsɨna lya Boanereke, n'ɨnegena mbʉ «Bagala ba muhindo wa buthuku», 18Na Ndereya na Filipo, na Barɨtolomayo, na Matayo, na Tomasɨ, na Yakobo mʉgala wa Alʉfayo, na Tatei, na Simoni wa mo kɨkembe ky'abaselote 19na Yuta Isikariote oyo wahotheraga Yesʉ.

Yesʉ atsɨmbwa nga mʉsɨre

(Mat 12:24-32; Luk 11:15-23; 12:10)

20Honyuma kw'aho, Yesʉ mwashʉba eka. Muhindano mʉnene wa bandʉ mwashʉba hindana ihika ko kɨka Yesʉ n'abɨga bʉwe mobathabona ndambi y'erirya. 21Abandʉ b'omo lʉganda lʉwe babere bonvwa ebɨnwa ebyo, mobayamwenda kʉshangwa mobanegena bathɨ asirehire.

Yesʉ atsɨmbwa nga Belesebuli

(Mat 12:22-32; Luk 11:14-23; 12:10)

22Bakangɨrɨtsya b'oMʉgomba bo bandagalaga ɨthoka ɨYerʉsalemʉ, bagenda abanegena bathɨ: «Alɨko Belisebuli#3:22 Belisebuli: Ni mʉtsɨmʉ mʉkʉlʉ w'eyɨndɨ mɨtsɨmʉ mɨbɨ yoshi..» Na bandɨ ba mʉbo mobanegena bathɨ: «Nɨ mʉkʉlʉ w'emɨtsɨmʉ mɨbɨ yo ʉnamʉha amaka w'erɨbɨnga emɨtsɨmʉ mɨbɨ.» 23Aho Yesʉ mwabɨrɨkɨra aBakangɨrɨtsya b'oMʉgomba abo n'ɨthanga ɨbwɨrabo mo mishinga athɨ: «Sitani angakotsya athɨ ɨbɨnga Sitani? 24Abandʉ b'obwamɨ bʉgʉma bamagabana, obwamɨ obo nɨbwathera. 25Na bandʉ ba mʉ lʉganda lʉgʉma nabo bamalwa ɨbo kw'ɨbo, olʉganda olo ni lwahimbukala. 26Aho Sitani amayɨlwɨsa yowene, obwamɨ bʉwe nɨbwamagabana, athangashʉbayɨra kagala, hewethuwe nɨbwashambʉkala.

27«Mʉndʉ athangakostya ɨngɨra mʉ nyʉmba ya mʉndʉ wa kagala n'ɨshamʉla ebɨndʉ bɨwe athathangire amugalinga. Hewethuwe anabya amamala imugalinga aho angakotsya ɨshamʉla ebɨndʉ bɨwe byoshi.

28«Kwenene enyɨbabwɨra nyɨthɨ, abandʉ bandaganyɨrwa ebɨtsɨbʉ byabo n'erɨhatsya kʉ Gongo lyabo lyoshi. 29Hewethuwe omʉndʉ yo uhangya oMʉthɨma Mwerʉ, athɨndaganyɨrwe n'ahake, kʉshangwa ebɨtsɨbʉ ebyo byandamubyako ihika kera na kera.» 30Yesʉ mwabwɨrabo athyo kʉshangwa mobanegena bathɨ: «Alɨko mʉtsɨmʉ mʉbɨ.»

Ɨndɨ yo malɨ na bahɨ bo bagala bethʉ?

(Mat 12:46-50; Luk 8:19-21)

31Bagala babo Yesʉ na nyinya ʉwe mobahika, mobimana embʉga, mobathʉma mʉndʉ ayamʉbɨrɨkɨre. 32Mo nyʉmba eyo mwabyaga muhindano mʉnene wa bandʉ, nibikere, nibathimbire kʉ Yesʉ. Aho mobamʉbwɨra bathɨ: «Lola, nyoko na bagala benyu balɨ embʉga, abakushondya.»

33Yesʉ mwashʉbɨtsyabo athɨ: «Ɨndɨ yo malɨ na bahe bo bagala bethʉ?» 34Honyuma kw'aho Yesʉ mwathimbya kw'abo babyaga bamuthimbireko kw'amesho n'ɨnegena athɨ: «Abo bikere hano aba, bo malɨ na bagala bethʉ. 35Kʉshangwa omʉndʉ woshi-woshi yo ʉkola erɨshasha lya Gongo, oyo yo mʉgala ethʉ, na mwalɨ wethʉ na malɨ.»

Currently Selected:

Marɨko 3: ver

Highlight

Copy