Marɨko 4
4
Mushinga wa muheri wa mbʉtho
(Mat 13:1-9; Luk 8:4-8)
1Honyuma kw'aho, Yesʉ mwashʉbaya emʉsɨke w'engetsɨ y'iNgalilaya alɨ akangɨrɨtsya abandʉ. Muhindano mʉnene wa bandʉ mwamuthimbako. Bʉshana n'ekyo, Yesʉ mwɨngɨra mʉ bwatho bʉgʉma bwabyaga bwimene ko ngetsɨ kw'aho na mwikala mʉbo. Abandʉ mobimana ko kɨthaka, emʉsɨke w'engetsɨ. 2Yesʉ agenda akangɨrɨtsyabo bɨnwa bɨngɨ mu mishinga. Mo makangɨrɨtsya ʉwe mwabwɨrabo athɨ: 3«Mʉhʉlɨkɨrɨtsye! Kwabyaga muhingi mʉgʉma mwaya hera mbʉtho. 4Abere anemʉhera, mbʉtho ngʉma mosathogongera emʉsɨke w'enzɨra. Ebɨronge mobyahika n'iryatho. 5Esɨndɨ mbʉtho mosathogera handʉ halɨ mabwe, ahathalɨ bʉthaka bʉngɨ. Esombʉtho etho mosalasha tsʉba kʉshangwa hathabyaga bʉthaka bʉngɨ. 6Hewethuwe elɨshɨ lyabere lyakola, mosashashʉka na mosʉma kʉshangwa sɨthabyaga na mirihi mɨre-mɨre. 7Sɨndɨ mbʉtho mosathogongera mu kathi ka mɨshakɨ. Emɨshakɨ eyo yabere yalasha, moyayɨndɨrɨtsya esombʉtho, ihika ko kɨka mosɨthaheka biguma. 8Hewethuwe esɨndɨ mbʉtho ɨtho mosathogongera kʉ bʉthaka bukwirire. Emyaka moyalasha, moyakʉla n'ɨheka biguma: ngʉma mosaheka mbulu makumi ashathʉ ashathʉ, sɨndɨ kɨrathʉ kɨrathʉ na sɨndɨ, mbulu igana igana.»
9Honyuma kw'aho Yesʉ mwabwɨrabo athɨ: «Yo uwithe mathwi w'ɨonvwa onvwe!»
Ekyalekaga Yesʉ nɨagenda anegena mu mishinga
(Mat 13:10-17; Luk 8:9-10)
10Yesʉ abere ahera yowene, aBathʉmwa bʉwe ikumi na babɨrɨ hagʉma n'abandʉ babyaga bamuthimbireko, mobamʉbʉtsya akumbulirebo emishinga eyo. 11Yesʉ mwashʉbɨtsyabo athɨ: «Imwe momwahabwa ɨmɨnya olʉfʉmɨ lw'oBwamɨ bwa Gongo, hewethuwe abandɨ bo bathalɨ mo kɨkembe kyenyu, ɨbo, enyɨnegena nabo ebɨnwa byoshi ɨtsʉkɨra emishinga, 12bʉshana
“ɨlola bagende abalola,
hewethuwe bathamɨnyaga,
ɨovnwa bagende abonvwa,
hewethuwe bathabyaga na bwenge,
bʉshana bathabonaga bwenge bw'ɨbɨndʉkɨra Gongo
bʉshana baganyɨrwe.”»
Yesʉ akumbulira omushinga w'omuheri w'embʉtho
(Mat 13:18-23; Luk 8:11-15)
13Yesʉ mwashʉba bwɨrabo athɨ: «Mwamabya muthonvwire omushinga oyu, mʉthɨ ko mwangonvwa eyɨndɨ mishinga? 14Embʉtho yo muheri aheraga, nɨ eKɨnwa kya Gongo. 15Esombʉtho so sathogongeraga emʉsɨke w'enzɨra, nɨ abandʉ bo banonvwa eKɨnwa kya Gongo, hewethuwe aho n'aho Sitani niyahika niathokya eKɨnwa kɨthaherwa mo mɨthɨma yabo. 16Esombʉtho so sathogongeraga ko mabwe, sishoshekanibwe n'abandʉ bo banonvwa eKɨnwa kya Gongo, aho n'aho nɨbangɨrɨrakyo mo lʉmogo. 17Hewethuwe kɨthalɨ ekinashika mo mɨthɨma yabo ng'emirihi ko inashika mo kɨthaka, abanakwamakyo kʉ kathambi kake. Na mo ndambi amalɨgo n'obwagali ebinabya byahikirabo bʉshana n'eKɨnwa kya Gongo ekyo, aho n'aho nibalika olwɨkɨrɨtsyo lwabo. 18Esombʉtho so sathogongeraga mo mɨshakɨ sishoshekanibwe n'abandʉ bo banonvwa eKɨnwa kya Gongo, 19hewethuwe emɨnʉbo ya hano ishi, erɨlengwako ly'obushoki, n'eyɨndɨ mɨhanda y'erɨlengwako inabya yahikirabo, nɨbyayɨndɨrɨtsya eKɨnwa ekyo, nakyo nɨkɨthɨheke biguma. 20N'esombʉtho sathogongeraga ko bʉthaka bʉlɨmo bʉyɨnʉ ɨtho, sishoshekanibwe na bandʉ bo banonvwa eKɨnwa kya Gongo n'ikokyakyo, ihika ko kɨka nɨbabʉtha biguma. Bagʉma nɨbabʉtha biguma makumi ashathʉ ashathʉ, na bandɨ kɨrathʉ kɨrathʉ na bandɨ igana igana.»
Mushinga wa tara
(Luk 8:16-18)
21Honyuma kw'aho Yesʉ mwabwɨrabo athɨ: «Omʉndʉ anganaletha etara honyuma kw'aho nɨashwɨkaro kɨthonga kʉtse niahiraro mwisha-ngɨngo? Ɨhɨ! ndɨ eyinahirwa kw'ihango! 22Kʉshangwa hathalɨ kɨndʉ kibishire kyo kithindabishulwe kʉtse hathalɨ lʉfʉmɨ lo lʉthɨndamɨnyɨkale. 23Yo uwithe mathwi w'ɨonvwa onvwe!»
24Yesʉ mwashʉbabwɨrabo athɨ: «Mʉhʉlɨkɨrɨtsye kʉbʉya ebɨnwa enyɨbabwɨra! Olʉlengo omʉnalengeramo abandɨ, lona lʉlengo Gongo andabalengeramo, na mwandongererwa kʉtsɨbʉ. 25Kʉshangwa yo uwithe kʉ kɨndʉ anahabwa kɨndɨ, hewethuwe yo uthawithe kʉ kɨndʉ, andanyagʉlwa n'akake awitheko.»
Mushinga w'erɨlasha ly'embʉtho
26Yesʉ mwanegena athɨ: «oBwamɨ bwa Gongo bwangalinganibwa na mʉndʉ mʉgʉma yo waheraga embʉtho mw'ɨshwa lɨwe. 27Embʉtho eyɨnalasha n'ɨkʉla kɨro na mwɨshɨ, omʉndʉ oyo abyetho kʉtse abye mesho athamɨnya ko yɨlasha n'ɨkʉla. 28Obʉthaka bobwene bobunalashya emyaka. Emyaka ɨnathanga ihulukya bɨthɨ, honyuma kw'aho niyahulukya bɨkʉmba, nabyo nibyaheka mbulu. 29Mo ndambi esombulu sɨrɨ mo bɨkʉmba samera, omʉndʉ nɨagesharo, kʉshangwa nɨ bɨro by'erɨgesha.»
Mushinga wa mbulu ya haratali
(Mat 13:31-32; Luk 13:18-19)
30Yesʉ mwashʉba negena athɨ: «Thwangalingania oBwamɨ bwa Gongo na ki? Kʉtse thwangalinganiabo na mushinga ohɨ? 31Obwamɨ obo bwangalinganibwa na kambulu ka haratali. Akambulu ako ko kake ko sɨndɨ mbulu soshi sosɨnaherwa mo bʉthaka hano ishi. 32Hewethuwe akanabya kamaherwa, nɨkalasha nikabya mʉthɨ mʉnene kʉtsɨbʉ kʉlenga emyaka yoshi. Akanathahʉla mɨthahɨ mɨnene-mɨnene ihika ko kɨka ebɨronge by'omo kyanya nibyahimba sonyʉthʉ sabyo ko mɨthahɨ yago.»
33Yesʉ agenda akangɨrɨtsya abandʉ mʉ mishinga mɨngɨ eyɨrɨ ng'eyi, ɨkwamana na nga ko bangakotsya ɨonvwa kʉbʉya. 34Hathalɨ kɨnwa abwɨraga abandʉ ɨthalɨ mo mishinga. Hewethuwe abere alɨ hagʉma n'abɨga bʉwe ɨbo bene, agenda akumbulirabo ebɨnwa byoshi.
Yesʉ abombetsya emibimbi
(Mat 8:18,23-27; Luk 8:22-25)
35Ekɨro ekyo, bwabere bwagoroba, Yesʉ mwabwɨra abɨga bʉwe athɨ: «Thʉshabʉkɨre ko ʉndɨ mwishirya w'engetsɨ.»
36Aho abɨga mobalaga omuhindano w'abandʉ, mobɨngɨra mo bwatho bo Yesʉ abyagamo n'ɨgenda hagʉma naye. Na wandɨ matho mwamʉherekeretsya. 37Kɨhʉnga kɨnene mokyabya ko ngetsɨ. Emibimbi moyayɨbanda ko bwatho ihika ko kɨka mobwathanga iotsulamo metsi. 38Yesʉ abyaga nɨalɨ mo bwatho mw'enyuma, nɨalɨtho nɨashegemere ko mʉshegemero. Abɨga bʉwe mobamubukya n'ɨmʉbwɨra bathɨ: «Mʉkangɨrɨtsya, bithakubwire kɨndʉ ɨlola kw'ithwe bano thwashenda?»
39Yesʉ mwabʉka, mwakemera ekɨhʉnga ekyo n'ɨbwɨra engetsɨ athɨ: «Tsɨra! Yɨbombeke!»
Aho ekɨhʉnga mokyatsɨra n'engetsɨ moyabombera. 40Honyuma kw'aho, Yesʉ mwabwɨra abɨga athɨ: «Bʉshana na ki mwubahire kʉtsɨbʉ? Ihika lɨno muthanetsi mwabya na lwɨkɨrɨtsyo?»
41Abɨga abo mobʉbaha kʉtsɨbʉ, nabo mobathanga ibutsania bathɨ: «Oyu nɨ mʉndʉ ki, yo emibimbi n'engetsɨ ebimushikya?»
Currently Selected:
Marɨko 4: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development
