Mariko 1
1
Amahubiri ma Yohana Murubiki
(Mat 3:1-12; Luk 3:1-18; Yoh 1:19-28)
1Ino yo ndangiro ya Mwatsi Mubuya wa Yesu Kirisitu Muala wa Ongo, 2ngakuno kokyaandikwaa mwa kitabo kya mutahwa Isaya mbu:
«Ongo aneena mbu:
‹Muumpfe! Nalika andumwa yani mbu ikuxondolere,
kwebula mbu ikutemulire anchira.›#1:2 Soma Malaki 3:1.
3Amulenge ahuluka mwa bweru mbu:
‹Mutunganyanye anchira ya Ninakuwetu!
Mulingiriranye anchira yakatsukamo!›#1:3 Soma Isaya 40:3.»
4Niyo Yohana Murubiki apfumbuka ni arubika mwa bweru, nehubiri abandu mbu bahingye amiberere yabo, ne Ongo akashashirabo asantsambi sabo.
5Becha mwa kyango kye Yuteya na bangi be Yerusalemu bashingana Yohana. Niabanaikiritsa asantsambi sabo soshe, ne Yohana ni ererubikabo mwa lwichi lwe Yorotani.
6Yohana abaa anereimbala lukimba lolukolirwe mu byoya bya ngamiya na mukoba wa luhu mwa mbindi. Abaa analya mikuku na buki. 7Yohana abaa anabwira abandu mbu: «Yahika ira nyuma kwingye anilengitse maala, nani nitalirene kiro na hake, iyindama kweminula amiriki ya kwa bilyato biwe. 8Ingye anibarubika mu mechi, wetuwe iye akabarubika mu Mutima Akomire.»
Yesu arubikwa
(Mat 3:13-17; Luk 3:21-22)
9Mo kianiro umo, Yesu nianatenga i Nasareti mwa kyango kye Ngalilaya, nianarubikwa ne Yohana mwa lwichi lwe Yorotani. 10Yesu abere amerubikwa netenga mwa mechi, nianaxunga kwa mbingu yamekingukala na Mutima Akomire nianamukimirako ngakuno ikuku. 11Na mulenge nianaumpfibwa ni atenga mu mbingu mbu: «Iwe, we Muala wani mutsiyirwa, unanimoya kutsibu.»
12Mo kashangi umoho, aMutima Akomire nianatwala Yesu mwa bweru, 13nianashibamo biro makumi ane. Neyo, Shitani nianamuereka. Aikalaa iyo mwa kati ka sanyamexwa, na bamalaika ni abamukolera.
Yesu abirangira abemitsa babere.
(Mat 4:12-22; Luk 4:14-15; 5:1-11)
14Yohana abere amehirwa mwa nyumba ya muliki, Yesu nianaya mwa kyango kye Ngalilaya. Iyo nianapfula aMwatsi Mubuya watenga ira mwa Ongo. 15Abaa ereneena mbu: «Akashangi kameeraho, na bwami bwa Ongo bwahara hofi. Muhingye amiberere yenyu neimirira aMwatsi Mubuya.»
16Mwa mango Yesu abaa atsuka kwa musike wa ngetsi ye Ngalilaya, nianaxunga bahyana babiri, Simoni ne Andereya muala wabo, ni abauma amakira mabo mwa ngetsi. 17Yesu nianabwirabo mbu: «Munikulikire nikabaira bahyana ba bandu.» 18Mo kashangi umoho niabanasiya amakira mabo nemukulikira.
19Yesu nianaya ira buxondotsi hake, nianaxunga Yakobo muala wa Sebetayo, ne Yohana muala wabo. Babaa bali mu bwato bwabo ni abaxuwa amakira mabo. 20Mo kashangi umoho, Yesu nianabirangirabo, niabanasiya Sebetayo ishe wabo mwa bwato na bakotsi bewe, niabanakulikira Yesu.
Yesu alamya mundu wa bixwatsi
(Luk 4:31-37)
21Inyuma kwaho, Yesu na bemitsa bewe niabanaya mwa mulungu we Kaperenaumu. Mwa lwire lwa Sabato, Yesu nianaingira mwa sinakoki netangira iiyisa. 22Abandu bobahulikyaa abinwa byabaa aiyisa bashishala kutsibu, kubwishi abaa ataiyisa ngakuno abeyisa ba Muomba, wetuwe ni aiyisabo mu maala.
23Mo kashangi umoho, mundu muuma yabaa aundirwe na kixwatsi abaa ali mwa sinakoki umo. Amundu uyo nianalaka mbu: 24«Ee, Yesu we Nasareti! Autuxondakoki? Mbeni uhikire kwetuhwerekeretsa? Nikwichi kushe. Iwe, wo Ukomire yalikirwe ne Ongo.»
25Yesu nianakemera akixwatsi ikyo kutsibu mbu: «Tsira, ube netenga mwa mundu uyu!» 26Akixwatsi ikyo kihiriyanya amundu uyo kutsibu, netenga muye, ni akilaka kutsibu. 27Abandu boshe niabanashishala kutsibu, nebutsabutsanya mbu: «Tutatsatwaxunga ku kiri ngeki! Mwa kuli ameyiso aya ma iyisa mali na maala! Amundu uyu, binabe na bixwatsi, ateekabyo mu maala nabyo ni byaba nemuumpfirsa!» 28Angulu mbuya ya Yesu niainashanchana chuba mwa kyango kyoshe kye Ngalilaya.
Yesu alamya bakoni bangi
(Mat 8:14-17; Luk 4:38-41)
29Yesu na bemitsa bewe babere bahuluka mwa sinakoki, niabanaya mwa nyumba ya Simoni ne Andereya, ni bali kuuma ne Yakobo ne Yohana. 30Netsala wa Simoni ni aonchire ku ngyingo, kubwishi ni alwere shishira. Yesu abere ahika iyo, niabanamupfulira amwatsi wa bukoni bwa mukatsi uyo. 31Yesu nianaipfunda hofi naye, nianamutsimba kwa kuboko nemuimanya; nianalama, aba netangira imutekulira bilyo.
32Mwe luoloolo, aretsuba rabere ramehumbirira, niabanaletera Yesu abandu boshe bobabaa balwere, na bobabaa baundirwe na bixwatsi. 33Abandu boshe ba kwa mutsi babaa babuanene ha lukyo lwa nyumba iyo. 34Yesu nianalamya bandu bangi bobabaa balwere makoni ma lwawelwawe. Nianahentsa bixwatsi bingi, atasiyiraabyo kiro na kashangi keneena, kubwishi ni bichi ku Yesu yende.
Yesu atenga i Kaperenaumu
(Luk 4:42-44)
35Mwe lutumbi, Yesu nianasisimuka, nianatenga mwa mutsi, nianaya handu ho hatali bandu. Iyo nianatangira ihema. 36Simoni na balikyabo niabanaya imuxonda. 37Nabo babere bamemuxunga, niabanamubwira mbu: «Abandu boshe abakuxonda.» 38Wetuwe Yesu nianaxubitsabo mbu: «Tuye mu indi mitsi yo iri hofi na uno nge naya ipfula iyo Amwatsi wa Ongo. Kubwishi ikyo kyo kituma nihika.» 39Nianatsuka mwa kyango kyoshe kye Ngalilaya, ni ahubiri mwa masinakoki nehentsa abixwatsi.
Yesu akomya mubentsi
(Mat 8:1-4; Luk 5:12-16)
40Mubentsi muuma nianawicha ho Yesu ali, nepfukama mwa mbere siwe. Nianaitondoola kwiye mbu: «Uli ushashire, ungakocha inikomya.» 41Yesu nianamupfira bwoncho, nianalambula aminwe, nianamupfulako, nemubwira mbu: «Anixonda mbu ukomibwe!» 42Mo kashangi umumoho abibentsi bya mundu uyo nianakomibwa. 43Inyuma kwaho, Yesu nianamuteeka kutsibu nemubwira mbu: 44«Umpfa kushe, utabwiraa kiro na mundu akinwa iki. Wetuwe youibwerekye kwa mukungu wa hekalu, inyuma kwaho ni waleta mutulo nga ko Musa ateekaa, kweba kaliho kwa bandu boshe ku wamekomibwa.» 45Wetuwe amundu uyo abere aenda, nianatangira ipfula amwatsi uyo ahoshe. Na kubwishi bwekyo Yesu atakocha kandi iingira kyenene mu mutsi woshewoshe, wetuwe aikala hale ho hatali bandu. Na bandu beremuhikira ni abatenga kwa minda yoshe.
Currently Selected:
Mariko 1: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
