Yohana 6
6
Yesu aha balume bihumbi bitano bo bilyo
1Inyuma wa binwa ibyo, Yesu nianaya kwa lindi ishirya ra angetsi, ye Ngalilaya, yoilukwa kandi mbu Tiberiya#6:1 Tiberiya Alindi tsina iri ra ngetsi ye Ngalilaya alibwerekya amulungu we Tiberiya yali kwa munda wa malenga itsuba wa ngetsi.. 2Mubuanano munene wa bandu niaunamukulikira, kubwishi abandu abo baxungaa kwa tulolero twabwerekyaa kwalamya abakoni. 3Yesu nianauruka kwa kitwa, neikala iyo kuuma na bemitsa bewe. 4aPasaka, lwire lukulu lwa Bayahuti, lwabaa lwahara hofi. 5Yesu abere alalamira, nianaxunga mubuanano munene wa bandu ni amuhikira. Ni yabutsa Firipo mbu: «Hayi hotungakocha iula bilyo kwehabyo abandu aba?» 6Aneenaatyo kweereka Firipo, kubwishi iye abaa echi kyakakola. 7Firipo nianamuxubyitsa mbu: «Nakiro twaula mikati ya tinari maana mabiri, kintsi mundu ni atitole kiro na kiche kya mukati.» 8Undi mwimitsa uwe yalukwa mbu ye Andereya, muala wabo Simoni Petero, nianamubwira mbu: 9«Hano hali mwana muuma yawete ku mikati itano ya shayiri#6:9 Shayiri Shano ishushire nga bulo. kuuma na fi ibiri. Wetuwe abilyo ibi bitangauutya bandu bangaha.»
10Yesu niananeena mbu: «Mubwire abandu mbu baikale hashi.» Aho habaa hali biti bingi. Niabanaikala hashi, na muancho wa balume abaa ashembashemba bihumbi bitano. 11Inyuma kwaho, Yesu nianatsimba amikati iyo, nianasima Ongo, neabirayo kwa bandu bobabaa baiekere aho. Nianahabo na fi nga kobashashire. 12Babere bameuuta, Yesu nianabwira abemitsa bewe mbu: «Mutololere abisialitsa, kwebula mbu hataheraa kindu.» 13Ni yobatololerabyo neuchutsa bitonga ikumi na bibiri bya bisialitsa bya mikati itano iyo ya shayiri yobalyaa. 14Abandu babere baxunga kwa kalolero ako ko Yesu abwerekyaa, niabaneena mbu: «Mwa kuli, amundu uyo mutahwa yabaa alirene iwicha mwa kihuo!» 15Mwa mango Yesu akengulaa kwabaxonda ihika imutsimba mu maala, nemuira mbu abe mwami, nianaya kandi kwa kitwa yenawene.
Yesu atandaira kwa mechi
(Mat 14:22; Mar 6:45-52)
16Lwabere lwahara luoloolo, abemitsa bewe niabanakima neya kwa ngetsi. 17Niabanauruka mwa mashuwa neshabuka angetsi kweya i Kaperenaumu. Amutsimya abaa ni ameotola itowa, ne Yesu abaa ni atatsashinganabo. 18Kwa ngetsi niakunatsuka muhusi mutsibu, na mulaba. 19Abemitsa babere bamekola buende bwa bilometere bitano neri ndatu, baxunga ku Yesu ni ahara ali hofi na mashuwa, ni atandaira kwa nyancha. Kubwishi bwekyo, niabanaubaha. 20Wetuwe Yesu nianabwirabo mbu: «Ingye uno, mutaubahaa!» 21Ibobabaa abaxonda imuurukya mwa mashuwa, wetuwe mo kashangi umoho amashuwa mahika kwa kyambu kya hobabaa abaya.
Abandu baxonda Yesu
22Bwabere bwakya, abandu bobashibaa kweshirya ya ngetsi bakengula ku habaa hanaliho mashuwa mauma. Bakengulaa kandi ku Yesu ataingire mwa mashuwa kuuma na bemitsa bewe, wetuwe shabaenda bonabene. 23Ninakuwetu abere amesima Ongo, mandi mashuwa momatengaa mwa mulungu we Tiberiya mahika hofi na hobaliraa amikati. 24Abandu babere bakengula ku Yesu, banabe na bemitsa bewe batali aho, niabanauruka mwa bwato kweya i Kaperenaumu kwexonda Yesu.
Yesu ye mukati wa buingo
25Abandu abo niabanashingana Yesu kwa lindi ishirya ra ngetsi, baba nemubutsa mbu: «Mwiyisa shauhika hano mangoki?» 26Yesu nianaxubyitsabo mbu: «Mwa kuli, anibabwira ku mutamunixonda kubwishi bwa tulolero tonabwerekyaa, wetuwe amunixonda kubwishi mwalyaa neuuta mikati. 27Muterekolera abilyo byobinabiha. Wetuwe munerekolera abilyo byobingaleama neleta buingo bwa biro byoshe. Abilyo ibyo, byo Muala wa Mundu endebaha. Kubwishi iye ye Ongo, Tata amemuhirako akalolero ka bukulukulu buwe.» 28Niabanamubutsa mbu: «Tuire tute kwebula mbu tukoche ikola amulimo wa Ongo?» 29Yesu nianaxubyitsabo mbu: «Amulimo we Ongo axonda mbu mukole, ni ibula mbu muniimirire ingye, ngye nalikwaa naye.» 30Niabanamubutsa mbu: «Ukatubwerekya kaloleroki kwebula mbu tukuimirire? Ukakolaki?» 31Abotatakulitsa balyaa mana mwa bweru, nga kokiandikirwe mwa Maandiko Makomire momabwire mbu: «Nianahabo bilyo bya mukati watenga mu mbingu#6:31 Soma Mafuluko 16:4,15; Saburi 78:24..» 32Yesu nianaxubyitsabo mbu: «Mwa kuli, anibabwira, Musa atabahaa mukati wa mu mbingu, wetuwe Tata yabaha amukati wa kuli wa mu mbingu. 33Kubwishi amukati we Ongo ahana, ni wakima mu mbingu neleta buingo kwa kihuo.» 34Niyo bamubwira mbu: «Ninakuwetu, uneretuha amukati uyo abiro byoshe.» 35Yesu nianabwirabo mbu: «Ingye, ngye mukati wa buingo. Ula yakawicha yoniri, atikiendepfa nchala kiro na hake. Na yaniimirire, atikyiendepfa nyota kiro na hake. 36Wetuwe Yesu nianabwirabo mbu nakiro mwanilolako, wetuwe mutaimirire. 37Aboshe bo Tata aniha banawicha yoniri, nani nitendetinda kiro na hake ula yawicha yoniri. 38Kubwishi namekima mu mbingu kwebula mbu nikole areshasha ra yanilikaa, wetuwe litali areshasha rani. 39Na reshasha ra yanilikaa ni ibula mbu nitahetsaa kiro na muuma mu banihaa, wetuwe nipfukyebo mwa lwire lwa ntsindiro. 40Mwa kuli, areshasha ra Tata ni ibula mbu, aboshe bobaxunga ku Muala, nemwimirira ni baba na buingo bwa biro byoshe, nani nikendepfukyabo mwa lwire lwa ntsindiro.»
41aBayahuti batangira iyongwa, kubwishi Yesu ni amebula kwiye ye mukati wa buingo wakimaa itenga mu mbingu. 42Nabo niabanabula mbu: «Mbeni uyu atali ye Yesu muala wa Yosefu? Mbeni tutechi ishe ne nina? Angakocha ate ibula mbu akimaa itenga mu mbingu?» 43Yesu nianaxubyitsabo mbu: «Mutabaa na buyongwa mwa kati kenyu. 44Hatali mundu yangawicha yoniri ali ate Tata yamemulika kwingye, nani nikendemupfukya mwa lwire lwa ntsindiro. 45Mwa bitabo bya batahwa muandikirwe mbu: ‹Aboshe bakendeiyisibwa ne Ongo.›#6:45 Soma Isaya 54:13. Kintsi mundu yaumpfira Tata nekulikira ameyiso mewe, anawicha yoniri. 46Nitabwire ku hali mundu woshewoshe yaxungire ku Tata ali ate yatengaa ira mwa Ongo, uyo yaxungaa ku Tata. 47Mwa kuli, anibabwira ku yaimirire ni ali na buingo bwa biro byoshe. 48Ingye, ngye mukati wa buingo. 49Aboxokulitsa balyaa kwa mana mwa bweru, bapfa. 50Wetuwe hano hali mukati wakima itenga mu mbingu, yalya kuo atendepfa. 51Ingye, niri mukati wa buingo wakimaa itenga mu mbingu. Amundu ni angaba akelya kwa mukati uko, ni akabaho abiro byoshe. Amukati wonikendehana, wo mubiri wani, anihanao kwebula mbu akihuo kibe na buingo.»
52Niyo aBayahuti batangira ikuba buhaka butsibu bonabene ku bonabene mbu: «Amundu uyu angakocha ate ituha amubiri uwe mbu tulyeo?»
53Yesu nianabwirabo mbu: «Mwa kuli, anibabwira, mutalire kwa mubiri wa Muala wa Mundu na mutaxomire kwa shiama yiwe, ni mutendeba na buingo mwimwe. 54Kintsi yalya kwa mubiri wani nexoma kwa shiama yani ni ali na buingo bwa biro byoshe. Nani nikendemupfukya mwa lwire lwa ntsindiro. 55Amubiri wani bilyo bya kuli na shiama yani kixomyo kya kuli. 56Yalya kwa mubiri wani nexoma kwa shiama yani ni ali mwingye, nani ni niri mwiye. 57Nga ko Tata yaliho anilikaa, nani niriho mwa maala mewe. Na kintsi mundu yanilya, akabaho mwingye. 58Uyu wo mukati wakimaa itenga mu mbingu. Amukati uyu atali ngakuno wa botatakulitsa benyu balyaa mwa bweru, nepfa. Wetuwe yakalya kwa mukati uyu endebaho abiro byoshe.» 59Yesu aneenaa abinwa ibi mwa mango abaa aiyisa mwa sinakoki i Kaperenaumu.
Abinwa bya buingo bwa biro byoshe
60Mwa mango abemitsa ba Yesu baumpfaa abinwa ibyo, bangi mubo niabananeena mbu: «Abinwa byo Yesu aiyisa ibi bitsibu. Inde yangaikiritsabyo?» 61Yesu nianamenya kwa bemitsa bewe bameyongwa kubwishi bwa kinwa ikyo, nianabutsabo mbu: «Akinwa iki kyamebababatsa? 62Mungaanikira mute mukexunga Muala wa Mundu axuba iuruka habaa ali lubere? 63aMutima wa Ongo yahana abuingo, amundu yewene atangakocha. Abinwa byonaneenaa nemwe, binwa bya Mutima, nabyo abileta buingo bwa biro byoshe. 64Wetuwe bauma mwimwe bataniimirire.» Yesu abulaa atyo, kubwishi amenyaa lubere bobatamuimirire na yakendemuhota. 65Yesu nianaxuba ineena mbu: «Kubwishi bwekyo, nababwiraa ku hatali mundu yangahika yoniri, ali liteshasha ra Tata.» 66Kubwishi bwa binwa ibyo, bangi mwa bemitsa bewe niabanamusiya, bataxuba iimitsanya naye. 67Niyo Yesu abutsa abemitsa ikumi na babiri mbu: «Nemwe amuxonda ienda?» 68Simoni Petero nianaxubya mbu: «Ninakuwetu, tukaya ira mwande? Iwe auneena binwa bya buingo bwa biro byoshe. 69Netwe, tuimirire, twichi kwiwe uli mundu Akomire wa Ongo.» 70Yesu nianaxubyitsabo mbu: «Ngyewene ngyenabalondolaa mwe ikumi na babiri, wetuwe muuma mwimwe Shitani.» 71Aneenaa atyo kuluenda Yuta muala wa Simoni Isikariyote, yakendemuhota, naye ni muuma mwa bemitsa bewe ikumi na babiri.
Currently Selected:
Yohana 6: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
